ខេត្តស្ទឹងត្រែង ៖ សាលាដំបូងខេត្ត បានសម្រេចឃុំខ្លួនមនុស្សពីរនាក់កាលពីព្រឹកថ្ងៃទី១២ ឧសភា ដោយម្នាក់ជាប់ចោទពីបទប្រើប្រាស់គ្រឿងញៀ.ន និងម្នាក់ទៀតពីបទប្លន់ទ្រព្យសម្បត្តិតាំងពីឆ្នាំ២០១០។ សិស្សថ្នាក់ទី១២ម្នាក់នៃវិទ្យាល័យព្រះរាជបូជយនីកិច្ចឈ្មោះឡុំ ផល្លា ភេទប្រុស អាយុ២៥ឆ្នាំ ស្នាក់នៅភូមិកណ្តាល សង្កាត់ស្ទឹងត្រែង
ខេត្តស្ទឹងត្រែង ៖ សាលាដំបូងខេត្ត បានសម្រេចឃុំខ្លួនមនុស្សពីរនាក់កាលពីព្រឹកថ្ងៃទី១២ ឧសភា ដោយម្នាក់ជាប់ចោទពីបទប្រើប្រាស់គ្រឿងញៀន និងម្នាក់ទៀតពីបទប្លន់ទ្រព្យសម្បត្តិតាំងពីឆ្នាំ២០១០។ សិស្សថ្នាក់ទី១២ម្នាក់នៃវិទ្យាល័យព្រះរាជបូជយនីកិច្ចឈ្មោះឡុំ ផល្លា ភេទប្រុស អាយុ២៥ឆ្នាំ ស្នាក់នៅភូមិកណ្តាល សង្កាត់ស្ទឹងត្រែង ក្រុងស្ទឹងត្រែង បានត្រូវនគរបាលប្រឆាំងគ្រឿងញៀននៃស្នងការដ្ឋានខេត្តឃាត់ខ្លួន កាលពីវេលាម៉ោង១០និង៣០នាទីយប់ ថ្ងៃទី១០ ឧសភា នៅទល់មុខមន្ទីរអប់រំចាស់ ខណៈយុវជនរូបនេះ កំពុងសេពគ្រឿងញៀនប្រភេទម៉ាទឹកកកមួយកញ្ចប់តូច រួមវត្ថុតាងប្រើប្រាស់មួយចំនួនទៀតរួចនាំយកមកកាន់ស្នងការដ្ឋានកសាងសំណុំរឿងបញ្ជូនទៅសាលាដំបូង។ មន្ត្រីជំនាញនិយាយថា ក្នុងការបង្ក្រាបនោះដែរ មានម្នាក់បានរត់គេចខ្លួនរួច និងកំពុងតាមចាប់ខ្លួនបន្ត ។
មន្ត្រីសាលាដំបូងខេត្តបានបញ្ជាក់ថា ដោយផ្អែកលើការសារភាពពេលសាកសួរទើបចៅក្រមនៃសាលាដំបូងខេត្ត លោកអៀង គឹមផុល បានធ្វើការចោទប្រកាន់តាមនីតិវិធីច្បាប់ឲ្យជាប់ពន្ធនាគារជាបណ្តោះអាសន្ន។ ទោះបីជាយ៉ាងណា ការឃុំខ្លួនជាអ្នកទោសចំពោះអ្នកសេពគ្រឿងញៀន ហាក់បីដូចជាកំពុងអនុវត្តខុសពីអនុសាសន៍សម្តេចតេជោ ដែលសម្តេចចាត់ទុកពួកគេក៏ជាអ្នករងគ្រោះដែរ ។
ចំណែកជនម្នាក់ទៀតបានត្រូវកម្លាំងព្រហ្មទណ្ឌកំរិតធ្ងន់ខេត្ត ចាប់ខ្លួននៅវេលាម៉ោង៦ល្ងាច ថ្ងៃទី១២ ឧសភា ក្នុងដីឡូត៍របស់លោកផេង ជា ស្ថិតក្នុងភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ខណៈរត់មកលាក់ខ្លួនស៊ីឈ្នួលចាំចំការឲ្យគេ។ ជនម្នាក់នេះឈ្មោះតូល វឿន អាយុ៣៤ឆ្នាំ រស់នៅភូមិផាបាំង ឃុំថ្មកែវ ស្រុកសៀមប៉ាង ហើយការឃាត់ខ្លួនគឺតាមការបង្គាប់ឱ្យចាប់ខ្លួនរបស់សាលាដំបូងខេត្ត តាមដីកាលេខ៥៤៤ ចុះថ្ងៃទី១៦ ខែធ្នូ ២០១០ ដោយចៅក្រមស៊ើបសួរលោកអៀង គឹមថុល ក្រោយពីជនសង្ស័យរូបនេះ ជាប់ពាក់ព័ន្ធក្នុងការទិញកូនគោមួយក្បាលតម្លៃ១៥០.០០០រៀល កាលពីថ្ងៃទី២២ វិច្ឆិកា ២០១០ នៅភូមិផាបាំង ហើយក៏រត់គេចខ្លួនបាត់រហូត។
ព័ត៌មានពីសមត្ថកិច្ចឲ្យដឹងថា ជនសង្ស័យបានរត់គេចខ្លួនរយៈពេលជាងប្រាំខែមកហើយ បន្ទាប់ពីជាប់ពាក់ព័ន្ធនឹងករណីឃុបឃិតលួចគោគេលក់។
ជនជាប់ចោទរូបនេះបាននិយាយក្នុងតុលាការថា រឿងដើមឡើយមិនពិតដូចការចោទនេះទេ ហើយកូនគោនោះ គឺខ្លួនបានទិញតម្លៃ១៥០.០០០រៀល ដោយមានធ្វើលិខិតទទួលដឹងឮពីភូមិឃុំទៀតផង តែត្រង់ថា គេលួចមកលក់ឲ្យគឺខ្លួនពិតជាមិនបានដឹងទេ។ ទោះបីជាបែបណា ជនសង្ស័យទាំងពីរនាក់ត្រូវបានកម្លាំងជំនាញទាំងពីរនៃស្នងការដ្ឋានខេត្តបញ្ជូនសំណុំរឿងមកកាន់សាលាដំបូងនៅព្រឹកថ្ងៃទី១២ ឧសភា ហើយបន្តយកទៅឃុំក្នុងពន្ធនាគារផងដែរ៕
ចែករំលែកព័តមាននេះ