រាជធានីភ្នំពេញ ៖ សូយ យក្សតឿ អ្នកប្រដាល់មកពីក្លឹបអូដឹមកីឡា ដែលពីមុនគេស្គាល់ថា ឈ្មោះឆេង ធិធិ និងបានបាត់មុខពីសង្វៀនប្រដាល់ជាយូរមកហើយនោះ បានត្រឡប់មកចាប់យកអាជីពជាអ្នកប្រដាល់ម្តងទៀតហើយ ។ បន្ទាប់ពីបាត់មុខបែបនេះ ពេលត្រឡប់មកវិញ យក្សតឿ បានសាកល្បងវិជ្ជាគុន២ទៅ៣ប្រកួតហើយដែរ ។ លើកនេះយក្សតឿ បានប្រកាសជួបជាមួយពេជ្រ សម្បត្តិ ជើងខ្លាំងមកពីក្លឹបក្រសួងការពារជាតិដោយត្រូវប្រកួតគ្នានៅសង្វៀនបាយ័ន ថ្ងៃទី១៥ ឧសភា ខាងមុខនេះ។ សូយ យក្សតឿ កាលពីជំនាន់ដែលគេប្រើឈ្មោះឆេង ធិធិ នៅឡើយមិនអស្ចារ្យប៉ុន្មានទេ ហើយក៏មិនស័ក្តិសមចាប់ដៃគូជាមួយសម្បត្តិដែរ។ ប៉ុន្តែសម្រាប់ដំណាក់កាលនេះ ខណៈពេលដែលសម្បត្តិ ហាក់បីដូចជាចុះខ្សោយបន្តិចនោះ ទើបយក្សតឿ ប្រកាសសាកវិជ្ជាគុនតែម្តង ។ ទោះបីយ៉ាងណា សម្រាប់ទស្សនិកជនដែលបានតាមដាន និងធ្លាប់ស្គាល់ពីប្រវត្តិរបស់កីឡាករពិតប្រាកដ នៅតែមានជំនឿលើសម្បត្តិដដែលសម្រាប់ការប្រកួតនេះ ។
ឈាន រស្មី មកពីក្លឹបប្រដាល់ខេត្តរតនគិរី ត្រូវបានផ្គូផ្គងឱ្យជួបប្រកួតជាមួយម៉ន វិរៈ មកពីក្លឹបព្រែកឯងកីឡា ។ អ្នកប្រដាល់ទាំង២រូបនេះ ជារលកក្រោយទេ តែមានវិជ្ជាគុនល្អមិនចាញ់ជើងចាស់ឡើយ ហើយធ្លាប់បានបង្ហាញមុខញឹកញាប់ទៀតផង ។ តាមការប្រកួតកន្លងមកឈាន រស្មី ជាអ្នកពូកែជង្គង់ រីឯម៉ន វិរៈ ពូកែកណ្តាប់ដៃ ។ ចាំមើលមើល៍អ្នកលេងជើង និងអ្នកលេងដៃនរណាពូកែជាង?
អាន មុន្នី មកពីក្លឹបនិរោធមានជ័យ ត្រូវប្រកួតជាមួយនូវ សុខខេង មកពីក្លឹបមិត្តប៉ូលិស។ មុន្នី និងសុខខេង ជាជើងថ្មីដូចគ្នា តែមុន្នី មានស្ថិតិប្រកួតច្រើនជាងសុខខេង ហើយការប្រកួតលើកនេះទៀតសោត មុន្នី ក៏រំពឹងថា ទទួលបានជោគជ័យដែរ ។
ហែម ពៅ មកពីក្លឹបតោមាស ត្រូវប្រកួតជាមួយពេជ្រ ឈាន មកពីក្លឹបអារុណរះកីឡា ។ គូនេះប្រកួតជាលក្ខណៈសាកលក្នុងប្រភេទទម្ងន់៤៨គីឡូក្រាម ។ នៅមានការប្រកួតរវាងកីឡាការិនី១គូទៀត គឺធី កន្និកា មកពីក្លឹបឥន្ទ្រីកីឡា ជាមួយគិន ស្រីយ័ន មកពីក្លឹបដីឡូត៍មានឫទ្ធិ ខេត្តបាត់ដំបង ។ សង្វៀនប្រដាល់ប៉ុស្តិ៍បាយ័ន តែងដាក់កីឡាការិនីឱ្យប្រកួតមួយគូៗជារៀងរាល់សប្តាហ៍ ដែលនេះជាការគិតគូខ្ពស់សម្រាប់នារីក្នុងការចូលរួមក្នុងវិស័យកីឡា ៕
ចែករំលែកព័តមាននេះ