ក្រុងប៉ោយប៉ែត ៖ ខ្សែរ៉កតាមបន្ទាត់ព្រំដែនខាងត្បូងផ្លូវជាតិលេខ៥ ថ្វីដ្បិតតែមួយរយៈនេះត្រូវបានគេមើលឃើញថា ត្រូវកាត់ផ្តាច់អស់ក៏ដោយ ប៉ុន្តែទំនិញដែលឆ្លងទៅមកកាត់ព្រំដែនខ្មែរ-សៀម គឺនៅតែបន្តដដែល ខណៈឈ្មួញឃុបឃិតគ្នាជាមួយសមត្ថកិច្ចប្តូរយុទ្ធសាស្ត្រថ្មីគឺ ធ្វើស្ពាន និងក្បូនដើម្បីនាំទំនិញឆ្លងកាត់
ក្រុងប៉ោយប៉ែត ៖ ខ្សែរ៉កតាមបន្ទាត់ព្រំដែនខាងត្បូងផ្លូវជាតិលេខ៥ ថ្វីដ្បិតតែមួយរយៈនេះត្រូវបានគេមើលឃើញថា ត្រូវកាត់ផ្តាច់អស់ក៏ដោយ ប៉ុន្តែទំនិញដែលឆ្លងទៅមកកាត់ព្រំដែនខ្មែរ-សៀម គឺនៅតែបន្តដដែល ខណៈឈ្មួញឃុបឃិតគ្នាជាមួយសមត្ថកិច្ចប្តូរយុទ្ធសាស្ត្រថ្មីគឺ ធ្វើស្ពាន និងក្បូនដើម្បីនាំទំនិញឆ្លងកាត់ ។ ច្រករបៀងដែលនៅតែបន្តចម្លងទំនិញទៅមកក្នុងលក្ខណៈប្តូររូបភាពនេះគឺស្ថិតនៅក្នុងភូមិគីឡូម៉ែត្រលេខ៤ សង្កាត់ប៉ោយប៉ែត ។
ច្រកនោះគេឃើញមានធ្វើស្ពាន និងធ្វើក្បូន ប៉ុន្តែសម្រាប់ខ្សែរ៉កត្រូវបានគេរើអស់ហើយតាមបទបញ្ជាថ្នាក់លើ ។ ចំណែកទំនិញមានចម្លងទៅវិញទៅមកទាំងខ្មែរទាំងសៀមទាំងយប់ទាំងថ្ងៃ ។ នៅចំណុចច្រករបៀងនោះគេឃើញមានកម្មករប្រុស ស្រី ជាច្រើននាក់ ខ្លះលីទំនិញចូលពីដីសៀម ខ្លះកំពុងលើកដាក់ទំនិញលើរថយន្ត ។ នៅច្រករបៀងនោះថ្វីបើចម្លងទំនិញទៅមកទាំងយប់ទាំងថ្ងៃពិតមែន ប៉ុន្តែការដឹកទំនិញចេញពីច្រករបៀងចូលមកតាមបណ្តាខេត្តរាជធានីភ្នំពេញគេធ្វើឡើងតែពេលយប់ប៉ុណ្ណោះ ដោយដឹកតាមរថយន្តធំៗប្រភេទយីឌុបគ្របជិតៗពុំដឹងថា មានទំនិញអាថ៌កំបាំងអ្វីខ្លះទេ។
ជុំវិញការចម្លងទំនិញទៅមកតាមរយៈក្បួន និងស្ពានជំនួសខ្សែរ៉កតាមច្រករបៀងខាងត្បូងផ្លូវជាតិលេខ៥ក្នុងក្រុងប៉ោយប៉ែតនេះលោកឆែម ចំប៉ា មន្ត្រីសមត្ថកិច្ចប៉ូលិសព្រំដែនគោកវរសេនាតូចលេខ៨៩១ ទទួលខុសត្រូវនៅទីនោះប្រាប់តាមទូរស័ព្ទថា ពុំមានទំនិញអ្វីធំដុំទេ គឺមានចម្លងខោអាវជជុះបន្តិចបន្តួចតែប៉ុណ្ណោះ ហើយការធ្វើក្បូន ឬស្ពានគឺត្រូវតែមានបើពុំដូច្នេះទេ ប្រជាពលរដ្ឋពុំអាចដើរឆ្លងទឹកទៅទិញទំនិញពីសៀមបានឡើយ ៕
ចែករំលែកព័តមាននេះ