វៀតណាមកំពុងទាក់ទាញវិនិយោគិនអឺរ៉ុបខាងលិច និងអាមេរិក បន្ថែមពីលើវិនិយោគប្រពៃណី
វៀតណាម ៖ ប្រទេសវៀតណាមកំពុងមើលឃើញការកើនឡើង នៃការវិនិយោគផ្ទាល់ពីប្រទេសអឺរ៉ុប
វៀតណាម ៖ ប្រទេសវៀតណាមកំពុងមើលឃើញការកើនឡើង នៃការវិនិយោគផ្ទាល់ពីប្រទេសអឺរ៉ុបខាងលិច និងសហរដ្ឋអាមេរិក ជាពិសេសនៅក្នុងវិស័យថាមពលកកើតឡើងវិញ។
លោក Do Van Su អនុប្រធានទីភ្នាក់ងារវិនិយោគបរទេសក្រោមក្រសួងផែនការ និងវិនិយោគវៀតណាម បានថ្លែងថា ក្រៅពីអ្នកវិនិយោគបែបប្រពៃណី ដូចជាជប៉ុន កូរ៉េខាងត្បូង ចិន និងតៃវ៉ាន់ ជាមួយគ្នានោះ ក្រុមហ៊ុនថ្មីៗ កំពុងមកពីអាល្លឺម៉ង់ ហូឡង់ បារាំង និងអេស្ប៉ាញ ដោយផ្តោតលើថាមពលកកើតឡើងវិញ ខណៈធុរកិច្ចអាមេរិកក៏កំពុងបង្កើនផលប្រយោជន៍របស់ពួកគេនៅវៀតណាមផងដែរ។
លោកបានបន្តទៀតថា ថ្មីៗនេះ តំណាងសមាគមឧស្សាហកម្មផលិតគ្រឿងបង្គំអេឡិចត្រូនិចរបស់សហរដ្ឋអាមេរិក ដែលមានសមាជិកចំនួន៣២នាក់ បានមកធ្វើទស្សនាកិច្ចនៅប្រទេសវៀតណាម ដើម្បីស្វែងរកឱកាសវិនិយោគ។ ប្រទេសវៀតណាមបានបញ្ចេញសំឡេងគាំទ្រ សម្រាប់ការវិនិយោគលើវិស័យថាមពលកកើតឡើងវិញ និងការផលិតគ្រឿងបង្គំអេឡិចត្រូនិច ក្នុងប៉ុន្មានឆ្នាំថ្មីៗនេះ ហើយប្រទេសនេះ បានធ្វើការប្តេជ្ញាចិត្ត ដើម្បីសម្រេចបាននូវការបំភាយឧស្ម័នផ្ទះកញ្ចក់សូន្យ នៅត្រឹមឆ្នាំ ២០៥០។
លោកនាយករដ្ឋមន្ត្រីវៀតណាម Pham Minh Chinh កាលពីខែកក្កដាកន្លងទៅ បានបញ្ជាឱ្យស្ថាប័នរដ្ឋាភិបាលបង្កើតផែនការបណ្តុះបណ្តាលវិស្វកររហូតដល់ ៥ម៉ឺននាក់ និងអ្នកជំនាញចំនួន១០០នាក់ នៅក្នុងការផ្លាស់ប្តូរឌីជីថល និងការផលិតគ្រឿងបង្គំអេឡិចត្រូនិច។
សម្រាប់វិនិយោគិនប្រពៃណី បានបង្ហាញការទុកចិត្តរបស់ខ្លួនជាបន្ត នៅក្នុងប្រទេសវៀតណាម។ ជាក់ស្តែង លោក Choi Kyu Chul អនុប្រធានសភាធុរកិច្ចកូរ៉េប្រចាំវៀតណាមបានថ្លែងថា នឹងមានការកើនឡើងនៃការវិនិយោគពីកូរ៉េខាងត្បូងនៅវៀតណាមក្នុងប៉ុន្មានឆ្នាំខាងមុខ។
យ៉ាងណាមិញ បញ្ហាប្រឈមដែលវៀតណាម កំពុងជួបប្រទះគឺ បញ្ហាមួយចំនួនកំពុងបំបាក់ទឹកចិត្តអ្នកវិនិយោគបរទេស ដូចជាកង្វះដីសាងសង់រោងចក្រ ជាពិសេសនៅទីក្រុងហូជីមិញ។ ដោយសារតែកង្វះនេះហើយ ទើបអ្នកវិនិយោគជាច្រើនបានជ្រើសរើសខេត្ត Dong Nai ឬ Binh Duong ដើម្បីធ្វើជាមូលដ្ឋានរោងចក្ររបស់ពួកគេជំនួសវិញ៕ (ប្រភពពី VnExpress)
ចែករំលែកព័តមាននេះ