រាជធានីភ្នំពេញ ៖ រថយន្តពីរគ្រឿង មួយគ្រឿងម៉ាកកាមរីធុនបាឡែន ពណ៌ស្ករ ស៊េរីឆ្នាំ២០០៣ ពាក់ស្លាកលេខភ្នំពេញ 2J-7281 និងមួយគ្រឿងទៀតម៉ាកមែរសឺដេស ពណ៌ខ្មៅ ស៊េរីអេស៤៣០ ពាក់ស្លាកលេខ ភ្នំពេញ 2M-2827 បានបើកដេញគ្នាលើកំណាត់មហាវិថីសហព័ន្ធរុស្ស៊ីឆ្ពោះទៅទិសខាងកើតបង្កឲ្យមានការភ្ញាក់ផ្អើលយ៉ាងខ្លាំង
រាជធានីភ្នំពេញ ៖ រថយន្តពីរគ្រឿង មួយគ្រឿងម៉ាកកាមរីធុនបាឡែន ពណ៌ស្ករ ស៊េរីឆ្នាំ២០០៣ ពាក់ស្លាកលេខភ្នំពេញ 2J-7281 និងមួយគ្រឿងទៀតម៉ាកមែរសឺដេស ពណ៌ខ្មៅ ស៊េរីអេស៤៣០ ពាក់ស្លាកលេខ ភ្នំពេញ 2M-2827 បានបើកដេញគ្នាលើកំណាត់មហាវិថីសហព័ន្ធរុស្ស៊ីឆ្ពោះទៅទិសខាងកើតបង្កឲ្យមានការភ្ញាក់ផ្អើលយ៉ាងខ្លាំង ដោយសារតែការប្រដេញគ្នានោះមិនខុសពីខ្សែភាពយន្តបរទេសទេ។
នៅទីបញ្ចប់រថយន្តកាមរីបាឡែនត្រូវរថយន្តមែរសឺដេសបុកពីក្រោយពេញទំហឹង នៅចំណុចភ្លើងស្តុបមន្ទីរពេទ្យព្រះអង្គឌួង កែងមហាវិថីព្រះនរោត្តម និងផ្លូវលេខ១១៤ ស្ថិតក្នុងសង្កាត់ផ្សារចាស់ ខណ្ឌដូនពេញ ហើយរថយន្តកាមរីបាឡែនក៏ជ្រុលទៅបុកបង្គោលភ្លើងស្តុបមួយដើមដាច់ដល់គល់ និងទៅបុកបង្គោលតាំងព្រះឆាយាលក្ខណ៍ព្រះមហាក្សត្រថែមទៀត។ ដោយឡែក រថយន្តមែរសឺដេស ដែលបុករថយន្តកាមរីបាឡែនពីក្រោយនោះ ក៏បានខ្ទេចមុខដែរ តែទាំងអ្នកបើកបរ និងអ្នករួមដំណើរនៃរថយន្តទាំង២គ្រឿង ពុំមាននរណាម្នាក់រងរបួសទេ ដោយសារបានពោងការពារសុវត្ថិភាព។
សាក្សីដែលឃើញហេតុការណ៍និយាយថា ក្នុងការបើករថយន្តដេញបុកគ្នានៅកណ្តាលរាជធានីនេះ គេឃើញភាគីខាងរថយន្តមែរសឺដេស ដែលជិះគ្នាពីរនាក់សុទ្ធតែបុរសបានដកកាំភ្លើងខ្លីមិនស្គាល់ម៉ាកភ្ជង់គំរាមទៅលើភាគីរថយន្តកាមរីបាឡែន ប៉ុន្តែពុំមានការផ្ទុះអាវុធទេ គ្រាន់តែធ្វើឲ្យទាំងអ្នកបើក និងអ្នករួមដំណើរខាងរថយន្តកាមរីបាឡែនដែលមានគ្នាបួននាក់រត់ចែកផ្លូវគ្នាទាំងព្រលឹងចុងសក់ ។
បុរសម្នាក់ដែលរួមដំណើរជាមួយភាគីរថយន្តកាមរីបាឡែននិយាយប្រាប់សមត្ថកិច្ចថា រថយន្តមែរសឺដេសបានបើកដេញបំបុករថយន្តរបស់គាត់តាំងពីនៅភ្លើងស្តុបអំបាសាឌ័រ ស្ថិតក្នុងខណ្ឌទួលគោកម៉្លេះ ដោយមិនដឹងថា មកពីមូលហេតុអ្វីទេ។ ពេលនោះរថយន្តគាត់បានព្យាយាមបើកគេច ព្រោះមិនចង់ឲ្យមានបញ្ហាដាក់គ្នា ដោយបើកតាមកំណាត់មហាវិថីសហព័ន្ធរុស្ស៊ីឆ្ពោះទៅទិសខាងកើត ស្រាប់តែរថយន្តមែរសឺដេសនោះនៅតែបើកដេញតាមពីក្រោយ។ លុះពេលបើកមកដល់ភ្លើងស្តុបមន្ទីរពេទ្យព្រះអង្គឌួង កែងមហាវិថីព្រះនរោត្តម ក៏បន្ថយល្បឿនបម្រុងបត់ទៅខាងស្តាំ ស្រាប់តែរថយន្តមែរសឺដេសនោះបុកពីក្រោយមួយទំហឹងដូចខឹងពីកាលណា បណ្តាលឱ្យរថយន្តរបស់គាត់ជ្រុលទៅបុកបង្គោលភ្លើងស្តុបដែលនៅម្ខាងផ្លូវក្បែររបងអតីតក្រសួងពាណិជ្ជកម្ម បាក់ដល់គល់ និងជ្រុលទៅបុកបង្គាលតាំងព្រះឆាយាលក្ខណ៍ ព្រះករុណាព្រះព្រះមហាក្សត្របន្តទៀត។
ភាគីម្ចាស់រថយន្តមែរសឺដេសត្រូវបានគេស្គាល់ថា ឈ្មោះចាន់ គង់់ ភេទប្រុស អាយុ៣៧ឆ្នាំ ស្នាក់នៅក្នុងខណ្ឌទួលគោក ។ បុរសនេះមិនបាននិយាយប្រាប់សមត្ថកិច្ចពីដើមចមដែលឈានដល់ការបើករថយន្តដេញបុកកាមរីបាឡែននោះទេ គឺអង្គុយយ៉ាងស្ងៀមស្ងាត់ និងមានទឹកមុខមាំ។ រីឯម្ចាស់រថយន្តកាមរីបាឡែនមានឈ្មោះខេង បូរា៉ ភេទប្រុស អាយុ២៦ឆ្នាំ ស្នាក់នៅក្នុងសង្កាត់អូរឫស្សីទី៤ ខណ្ឌ៧មករា ។
ចំណែកសមត្ថកិច្ចមូលដ្ឋានដែលចុះដល់ចំណុចកើតហេតុបានបង្ហើបឲ្យដឹងថា មូលហេតុឈានដល់បើករថយន្តដេញបុកគ្នាដូចក្នុងរឿងវីដេអូបរទេសនេះ គឺផ្ដើមចេញពីរឿងស្រីនៅក្នុងក្លឹបកម្សាន្តមួយម្តុំអគ្គនាយកដ្ឋានពន្ធដារ ស្ថិតក្នុងខណ្ឌទួលគោក។ ហេតុការណ៍នេះ ពិតជាសំណាងមួយដែរ ដែលមិនមានមនុស្សណាម្នាក់ស្លាប់ ឬរបួស ហើយរថយន្តទាំងពីរគ្រឿងត្រូវបានស្ទូចយកទៅរក្សាទុកនៅការិយាល័យនគរបាលចរាចរផ្លូវគោកនៃស្នងការដ្ឋាននគរបាលរាជធានីភ្នំពេញ ក្រោយពីសមត្ថកិច្ចជំនាញធ្វើការវាស់វែងរួច ៕
ចែករំលែកព័តមាននេះ