រាជធានីភ្នំពេញ ៖ ជនមិនស្គាល់មុខ និងអត្តសញ្ញាណបានបើកយករថយន្ត២គ្រឿងទៅប្លុងចោលចម្ងាយពីគ្នាប្រមាណ៣០ម៉ែត្រ នៅទីលានបញ្ចុះស.ពវត្តតាភេម ដោយពុំទាន់ដឹងថា រថយន្តទាំ២គ្រឿងនេះមានជាប់ពាក់ព័ន្ធទៅនឹងបទល្មើសអ្វី និងនៅក្នុងរថយន្តនេះមានដឹកសម្ភារៈអ្វីខុសច្បាប់នៅឡើយទេ ។ រថយន្តទាំង២គ្រឿងនេះ…
រាជធានីភ្នំពេញ ៖ ជនមិនស្គាល់មុខ និងអត្តសញ្ញាណបានបើកយករថយន្ត២គ្រឿងទៅប្លុងចោលចម្ងាយពីគ្នាប្រមាណ៣០ម៉ែត្រ នៅទីលានបញ្ចុះស.ពវត្តតាភេម ដោយពុំទាន់ដឹងថា រថយន្តទាំ២គ្រឿងនេះមានជាប់ពាក់ព័ន្ធទៅនឹងបទល្មើសអ្វី និងនៅក្នុងរថយន្តនេះមានដឹកសម្ភារៈអ្វីខុសច្បាប់នៅឡើយទេ ។
រថយន្តទាំង២គ្រឿងនេះ ត្រូវបានប្រទះឃើញ កាលពីវេលាម៉ោង៧ព្រឹកថ្ងៃទី២៥ ខែសីហា ឆ្នាំ២០២៣ នៅទីលានបញ្ចុះស.ព ឬអ្នកស្រុកហៅថា មុងវត្តតាភេម ស្ថិតនៅក្នុងភូមិកំបូល សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ ។
តាមប្រភពពីកន្លែងកើតហេតុបានប្រាប់ឲ្យដឹងថា រថយន្តខាងលើពណ៌សដូចគ្នា គឺខុសតែម៉ាកទេ ដោយ១គ្រឿង ម៉ាកតូយ៉ូតាឡិចស៊ិស RX-330 ពាក់ស្លាកលេខភ្នំពេញ 2AO-6532 ចំណែក១គ្រឿងទៀត ម៉ាកកាមរីស៊េរីឆ្នាំ២០០៧ ពាក់ស្លាកលេខភ្នំពេញ 2W-3488 ។ ពុំដឹងថា ជារថយន្តដែលម្ចាស់ជួលឲ្យជនជាតិចិនជិះ ហើយពេលជនជាតិចិនត្រឡប់ទៅស្រុកវិញជិះយកទៅប្លុងចោល ឬបែបណានោះទេ ព្រោះកន្លងមកក៏ធ្លាប់មានរឿងបែបនេះកើតឡើងជារឿងដែរ ។
បើតាមបុរសអ្នកមើលការខុសត្រូវនៅទីលានបញ្ចុះស.ពខាងលើបាននិយាយថា គាត់មិនបានដឹងថា តើមានអ្នកយករថយន្តនេះទៅប្លុងចោលនៅទីនោះតាំងពីពេលណាមកទេ គាត់បានប្រទះឃើញវានៅវេលាម៉ោង៧ព្រឹកទៅហើយ ។ ខណៈនោះគាត់ក៏មិនហ៊ានចូលទៅជិតឬចាប់អារម្មណ៍ថា គឺជារថយន្តដែលជនមិនស្គាល់មុខ និងអត្តសញ្ញាណយកទៅប្លុងចោលបែបនេះដែរ ។
ដំបូងឡើយគាត់នឹកស្មានថា ជារថយន្តដែលម្ចាស់ម៉ុងទៅអុជធូបសែនព្រេនស.ពឪពុក ម្ដាយ បងប្អូនសាច់ញាតិប៉ុណ្ណោះ ទើបគ្មានការភ្ញាក់ផ្អើលភ្លាមៗឡើយ ។
បុរសនោះបានប្រាប់ឲ្យដឹងបន្តទៀតថា ប៉ុន្តែក្រោយមកគាត់បានរង់ចាំមើលអត់ឃើញម្ចាស់ទៅក្បែរ ហើយពេលគាត់ដើរមើលនៅម្ដុំនោះស្ងាត់ឈឹងដូចចោរលួចសេះ ហើយនៅតែមិនឃើញម្ចាស់ទៀត ទើបសន្មត់ថា ជារថយន្តដែលមានអ្នកយកទៅប្លុងចោល ។ បន្ទាប់មកគាត់ក៏បានរាយការណ៍ជូនអាជ្ញាធរឲ្យជួយរាយការណ៍បន្តទៅកាន់នគរបាលឲ្យចុះទៅពិនិត្យមើល ជាក់ស្ដែង និងធ្វើការតាមជំនាញ ហើយគាត់មិនហ៊ានប៉ះពាល់វាឡើយ ។
ក្រោយពេលទទួលបានដំណឹងនេះភ្លាមៗ កម្លាំងនគរបាលប៉ុស្តិ៍កំបូលនិងនគរបាលនៃអធិការដ្ឋាននគរបាលខណ្ឌកំបូលបានចុះទៅកាន់ទីនោះ ហើយបានពិនិត្យមើលដល់ទីតាំងនោះភ្លាមៗដែរ ហើយបាននាំយករថយន្តទាំងនេះរក្សាទុករង់ចាំស្រាវជ្រាវរកម្ចាស់ និងត្រួតពិនិត្យតាមក្រោយ ៕
ចែករំលែកព័តមាននេះ