រាជធានីភ្នំពេញ ៖ នៅទីស្តីការគណៈរដ្ឋមន្ត្រីកាលពីថ្ងៃទី១១ ឧសភា លោកឧបនាយករដ្ឋមន្ត្រីកែ គឹមយ៉ាន ប្រធានអាជ្ញាធរប្រយុទ្ធប្រឆាំងគ្រឿងញៀនអនុញ្ញាតឱ្យលោកស្រី Penny Rechard ឯកអគ្គរដ្ឋទូតអូស្ត្រាលីថ្មីប្រចាំនៅកម្ពុជាចូលជួបសម្តែងការគួរសម និងពិភាក្សាអំពីបញ្ហាគ្រឿងញៀន
រាជធានីភ្នំពេញ ៖ នៅទីស្តីការគណៈរដ្ឋមន្ត្រីកាលពីថ្ងៃទី១១ ឧសភា លោកឧបនាយករដ្ឋមន្ត្រីកែ គឹមយ៉ាន ប្រធានអាជ្ញាធរប្រយុទ្ធប្រឆាំងគ្រឿងញៀនអនុញ្ញាតឱ្យលោកស្រី Penny Rechard ឯកអគ្គរដ្ឋទូតអូស្ត្រាលីថ្មីប្រចាំនៅកម្ពុជាចូលជួបសម្តែងការគួរសម និងពិភាក្សាអំពីបញ្ហាគ្រឿងញៀន។
ក្នុងឱកាសនោះលោកឧបនាយករដ្ឋមន្ត្រីកែ គឹមយ៉ាន បានជំរាបជូនភ្ញៀវអំពីសភាពការណ៍ទូទៅពីបញ្ហាគ្រឿងញៀននៅកម្ពុជាថា កម្ពុជាមិនមែនជាកន្លែងផលិតគ្រឿងញៀនទេ ប៉ុន្តែជាកន្លែងដែលឧក្រិដ្ឋជនជួញដូរគ្រឿងញៀនឆ្លងកាត់ ។ បញ្ហាគ្រឿងញៀននៅកម្ពុជាបានចាប់ផ្តើមមានសកម្មភាពនាអំឡុងឆ្នាំ១៩៩០ដែលជាដំបូងស្ថាប័នប្រយុទ្ធប្រឆាំងគ្រឿងញៀនរបស់កម្ពុជាដឹកនាំដោយសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បន្ទាប់មកសម្តេចបានផ្ទេរការដឹកនាំឱ្យទៅលោកឧបនាយករដ្ឋមន្ត្រីស ខេង ហើយបច្ចុប្បន្នត្រូវបានដឹកនាំដោយរូបលោកផ្ទាល់។
លោកឧបនាយករដ្ឋមន្ត្រីបានលើកឡើងពីកិច្ចសហប្រតិបត្តិការរវាងប្រទេសអូស្ត្រាលី និងកម្ពុជា ពិសេសកិច្ចសហប្រតិបត្តិការរវាងប៉ូលិសសហព័ន្ធអូស្ត្រាលីជាមួយនិងប៉ូលិសកម្ពុជា។ បញ្ហាគ្រឿងញៀនជាបញ្ហាសកល ជាបញ្ហារបស់ពិភពលោកទាំងមូល។ ប្រទេសអូស្ត្រាលីបានរួមចំណែកយ៉ាងធំធេងក្នុងការគាំទ្រអនុវត្តយុទ្ធសាស្ត្រពហុវិស័យស្តីពីការត្រួតពិនិត្យគ្រឿងញៀន ដែលក្នុងនោះបានគាំទ្រទៅលើយុទ្ធសាស្ត្រកាត់បន្ថយគ្រោះថ្នាក់តាមរយៈការផ្តល់ជំនួយឱ្យអនុវត្តកម្មវិធីផ្លាស់ប្តូរម្ជុលសឺរ៉ាំងសំរាប់អ្នកប្រើប្រាស់គ្រឿងញៀនដោយចាក់ និងការអនុវត្តកម្មវិធីប្រើឱសថជំនួសដែលហៅថាកម្មវិធីមេតាដូន។
លោកកែ គឹមយ៉ាន បានលើកឡើងថា ទីផ្សារគ្រឿងញៀន ATS កំពុងរីករាលដាល ព្រោះជាប្រភេទគ្រឿងញៀនដែលស្រួលផលិត បញ្ហានេះបាននិងកំពុងរាលដាលដល់កម្ពុជា។ លោកបានស្នើសុំឱ្យភាគីអូស្ត្រាលីពិនិត្យលទ្ធភាពគាំទ្រដល់កម្ពុជាលើការងារចំពោះមុខមួយចំនួន ដូចជាការផ្សព្វផ្សាយការអប់រំពីគ្រោះថ្នាក់របស់គ្រឿងញៀន និងពង្រឹងយន្តការព្យាបាលអ្នកញៀនគ្រឿងញៀនឱ្យមាននិរន្តរភាពជាដើម។
ក្នុងឱកាសនោះ លោកជំទាវឯកអគ្គរដ្ឋទូតថ្មីបានកោតសរសើរការខិតខំប្រឹងប្រែងរបស់អាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា ហើយសន្យាបន្តការគាំទ្រសម្ភារបច្ចេកទេស មន្ត្រីអនុវត្តច្បាប់ និងពង្រីកកម្មវិធីកាត់បន្ថយគ្រោះថ្នាក់ឱ្យបានទូលំទូលាយ ៕
ចែករំលែកព័តមាននេះ