ខេត្តពោធិ៍សាត់ ៖ សាលាដំបូងខេត្តពោធិ៍សាត់នាព្រឹកថ្ងៃទី១២ ឧសភា បានធ្វើពិធីប្រកាសសាលក្រមតាមការគ្រោងទុកលើជនជាប់ចោទ តុប ច័ន្ទសិរីវុធ អតីតព្រះរាជអាជ្ញាខេត្តពោធិ៍សាត់ ពេជ គង់យូ ម្ចាស់ហាងរាត្រី រីករាយពោធិ៍សាត់ជាប្អូនថ្លៃ រស់ សំណាង ហៅវិត អង្គរក្សជាប្អូនថ្លៃ និងឈិត វុទ្ធី អ្នកបើកបររថយន្ត
ខេត្តពោធិ៍សាត់ ៖ សាលាដំបូងខេត្តពោធិ៍សាត់នាព្រឹកថ្ងៃទី១២ ឧសភា បានធ្វើពិធីប្រកាសសាលក្រមតាមការគ្រោងទុកលើជនជាប់ចោទ តុប ច័ន្ទសិរីវុធ អតីតព្រះរាជអាជ្ញាខេត្តពោធិ៍សាត់ ពេជ គង់យូ ម្ចាស់ហាងរាត្រី រីករាយពោធិ៍សាត់ជាប្អូនថ្លៃ រស់ សំណាង ហៅវិត អង្គរក្សជាប្អូនថ្លៃ និងឈិត វុទ្ធី អ្នកបើកបររថយន្ត។ ពិធីប្រកាសបានធ្វើឡើងក្នុងរយៈពេលកន្លះម៉ោងប៉ុណ្ណោះ ដោយមានការចូលរួមពីអ្នកសារព័ត៌មាន និងអង្គការសង្គមស៊ីវិលផងដែរ។
លោកចៅក្រម ឌុច ចន្ថា ប្រធានក្រុមប្រឹក្សាជំនុំជំរះបានអានដំណើររឿងសាជាថ្មីឱ្យជនជាប់ចោទទាំង៣នាក់ដែលឈរនៅពីមុខរង្វង់ក្រចកសេះស្តាប់ រួចហើយអាប៉ោងបានចាប់ផ្តើមបើកគ្រប។ ១-តុប ច័ន្ទសិរីវុធ ចោទប្រកាន់ពីបទចាប់ជំរិត បង្ខាំងមនុស្សខុសច្បាប់ និងស៊ីសំណូកត្រូវបានផ្តន្ទាទោសឱ្យជាប់ពន្ធនាគាររយៈពេល១៩ឆ្នាំ គិតពីថ្ងៃឃុំខ្លួនតាមច្បាប់ស្ថានទម្ងន់ទោសនៃបទឧក្រិដ្ឋ។ ២-ពេជ គង់យូ ដែលរត់គេចខ្លួនត្រូវកាត់ទោសកំបាំងមុខជាប់ពន្ធនាគាររយៈពេល១៨ឆ្នាំ គិតពីថ្ងៃចាប់ខ្លួនបាន។ ៣-ឈិត វុទ្ធី ជាប់ពន្ធនាគាររយៈពេល១៦ឆ្នាំ គិតពីថ្ងៃឃុំខ្លួន និង៤-រស់ សំណាង ហៅវិត ជាប់ពន្ធនាគាររយៈពេល១៥ឆ្នាំ គិតពីថ្ងៃឃុំខ្លួន។ ទាំង៣នាក់ដែលចាប់ខ្លួននេះចោទប្រកាន់ពីបទចាប់ជំរិតទារប្រាក់ និងបង្ខាំងមនុស្សខុសច្បាប់។ ជាមួយគ្នានេះច្បាប់ក៏តំរូវឱ្យទណ្ឌិតទាំង៤រូបរួមគ្នាសងជំងឺចិត្តទៅដើមបណ្តឹងចំនួន៤.០០០.០០០រៀល និងបើកឱ្យប្តឹងជំទាស់ទៅសាលាឧទ្ធរណ៍ផងដែរ។
សវនាការបានបញ្ចប់នៅម៉ោង៨ និង៣០នាទីព្រឹក មន្ត្រីអនុរក្សបានដឹកទណ្ឌិតទាំង៣នាក់យកទៅបញ្ចូលក្នុងពន្ធនាគារវិញ។ ខណៈពេលគ្រាហ៍ចូលក្នុងរថយន្តនោះគេឃើញតុប ច័ន្ទសិរីវុធ សើចញញឹម ហាក់បីដូចជាមិនតក់ស្លុតអ្វីទាំងអស់ ប៉ុន្តែមិនដឹងថា ភាពញញឹមរបស់គាត់ផុសចេញពីដួងចិត្ត ឬមួយក៏បង្ខំចិត្តឱ្យញញឹមដើម្បីបិទបាំងភាពអាម៉ាស់ចំពោះមុខមហាជននោះទេ។ ចំណែកនៅខាងក្រៅបន្ទប់សវនាការវិញមេធាវីរបស់តុប ច័ន្ទសិរីវុធ និយាយថា ការកាត់ក្តីនេះអយុត្តិធម៌ណាស់ចំពោះកូនក្តីរបស់គាត់ដូចនេះគាត់នឹងប្តឹងបន្តទៅឧទ្ធរណ៍ទៀត។
តាមការស្ទាបស្ទង់ពីមតិខាងក្រៅខ្លះនិយាយថា ការកាត់ទោសតុប ច័ន្ទសិរីវុធ ជាប់ពន្ធនាគាររយៈពេល១៩ឆ្នាំ និងពេជ គង់យូ ១៨ឆ្នាំ គឺសមរម្យនឹងទង្វើរបស់ពួកគេ។ ប៉ុន្តែឱ្យឈិត វុទ្ធី ជាប់១៦ឆ្នាំ និងរស់ សំណាង ១៥ឆ្នាំ ហាក់បីដូចជាច្រើនបនិ្តច ព្រោះពួកគេគ្រាន់តែជាអ្នកចូលដៃចូលជើងប៉ុណ្ណោះ។ ទោះជាយ៉ាងណាតុប ច័ន្ទសិរីវុធ នៅមានពាក្យបណ្តឹងជាបន្តបន្ទាប់ទៀតអាចសំរាកក្នុងពន្ធនាគាររហូតក៏មិនដឹង គួបផ្សំនឹងជំងឺដុនដាបរបស់គាត់ផងនោះ។ សូមបញ្ជាក់ថា តុប ច័ន្ទសិរីវុធ មានអាយុ៥៦ឆ្នាំ, ពេជ គង់យូ អាយុ៤២ឆ្នាំ, រស់ សំណាង ហៅវិត អាយុ៤០ឆ្នាំ និងឈិត វុទ្ធី អាយុ៤០ឆ្នាំ៕
ចែករំលែកព័តមាននេះ