ដីខាងមុខជាប់ខ្លោងទ្វារចេញ-ចូល និងជាប់ផ្លូវកៅស៊ូផងនោះ ដែលត្រូវគេដឹងថា គឺជាដីរបស់រដ្ឋ ហើយត្រូវបានកាត់ពុះឡូតិ៍លក់ ពេលនេះគេចាប់ផ្ដើមបុ.កគ្រឹះសង់ផ្ទះបណ្ដើរៗហើយ។ ដីដែលជាកម្មសិទ្ធិរបស់រដ្ឋ ហើយត្រូវកាត់លក់នេះ បើតាមប្រភពពី
ខេត្តកំពង់ស្ពឺ ៖ ដីខាងមុខជាប់ខ្លោងទ្វារចេញ-ចូល និងជាប់ផ្លូវកៅស៊ូផងនោះ ដែលត្រូវគេដឹងថា គឺជាដីរបស់រដ្ឋ ហើយត្រូវបានកាត់ពុះឡូតិ៍លក់ ពេលនេះគេចាប់ផ្ដើមបុ.កគ្រឹះសង់ផ្ទះបណ្ដើរៗហើយ។ ដីដែលជាកម្មសិទ្ធិរបស់រដ្ឋ ហើយត្រូវកាត់លក់នេះ បើតាមប្រភពពីមន្ត្រីនគរបាលជាច្រើនដែលនិយមផឹកកាហ្វេនៅមុខស្នងការ បានបង្ហើបថា ការកាត់ដីនេះ គឺជាការកាត់កងគ្នា ដោយធ្វើឡើងតាមរយៈការដោះដូរសាងសង់អគារទំហំ៩ម៉ែត្រគុណ៤៥ម៉ែត្រ កម្ពស់៣ជាន់ មិនសមនឹងទំហំដីដែលដោះដូរឡើយ។
យោងតាមប្រភពបានបញ្ជាក់ប្រាប់ថា ផ្ទៃដីរបស់ស្នងការដ្ឋាននគរបាលខេត្តកំពង់ស្ពឺ ប្រមាណជា៥ហិកតា ដែលជាសម្បត្តិរបស់រដ្ឋ ពេលនេះត្រូវបានកាត់ផ្នែកខាងមុខ (ខាងកើត) មួយចំនួន ទៅឲ្យឯកជនកាន់កា.ប់ និងពុះឡូតិ៍ ដើម្បីសង់ផ្ទះល្វែងលក់។ ការកាត់ដីនេះ បើតាមប្រភព គឺជាការដោះដូរជាមួយអគាររដ្ឋបាលមួយខ្នង ដែលមានទំហំ៩ម៉ែត្រគុណនឹង៤៥ម៉ែត្រ។
ហើយអ្នកដែលចេញលុយសាងសង់អគារនេះ ត្រូវបានគេដឹងថា គឺលោកឧកញ៉ា អ៊ុត ធី ចំពោះរាល់ការចំណាយលើការសាងសង់ជាបន្ទុករបស់ឧកញ៉ារូបនោះ។ ពីមុន រឿងនេះ បើតាមប្រភព គឺនៅមានភាពចម្រូងចម្រាស់រវាងម្ចាស់លុយ តែពេលនេះការចរចាបានត្រូវរ៉ូវគ្នារួចហើយ។ ចំពោះការកាត់ដីផ្នែកខាងមុខ ក៏បានព្រមព្រៀងគ្នាបញ្ចប់ប្រគល់ឲ្យឯកជនគ្រប់គ្រង និងសង់ផ្ទះវិញ។ ព្រោះពីមុន កាលពីមិនទាន់មានការព្រមព្រៀងគ្នា គឺដោយសារតែអ្នករត់ឯកសារចេះតែយកលុយពីលោកឧកញ៉ារូបនោះ ហើយឯកសារនៅមិនទាន់ស្រេចបាច់នៅឡើយ គឺរួចតែខាងមហាផ្ទៃ ដោយឡែកក្រសួងពាក់ព័ន្ធផ្សេងៗទៀតនៅមិនទាន់សម្រេចនៅឡើយ តែពេលនេះ គឺបានទៅទាំងបីទាំងទ្រហើយ ទើបអ្នកទទួលបានដី ហ៊ានពុះឡូតិ៍លក់ ហើយអ្នកទិញក៏ចាប់ផ្ដើមសង់ផ្ទះបណ្តើរៗដែរ។
សូមរំលឹកថា ចៀសវាងកុំអោយមានពាក្យចោទប្រកាន់ថា ជាព័ត៌មានមិនពិត និងប្រឌិតឡើង នៅព្រឹកថ្ងៃទី៤ ខែវិច្ឆិកា ឆ្នាំ២០២២ អ្នកយកព័ត៌មានយើងបានទំនាក់ទំនងទៅលោកឧត្តមសេនីយ៍ទោ សម សាមួន ស្នងការនគរបាលខេត្ត ដើម្បីសុំការពន្យល់បកស្រាយ។ ដោយលោកបានបញ្ជាក់តាមទូរស័ព្ទថា «រឿងការដោះដូរ ស្រេចបាច់សព្វគ្រប់អស់ហើយ លែងមានទើសអ្វីទៀតហើយ ថ្នាក់ដឹកនាំគ្រប់លំដាប់ថ្នាក់ឯកភាពអស់ហើយ មិនមាននៅសល់អីទៀតនោះទេ»។
ដោយឡែក លោកឧញ៉ា អ៊ុត ធី បានខលមកអ្នកសារព័ត៌មានយើងថា «រឿងលោកចំណាយលុយធ្វើអគារឱ្យលោក សម សាមួន ស្នងការនគរបាលខេត្តកំពង់ស្ពឺនេះ ដោះដូរយកដីនៅខាងមុខស្នងការដ្ឋាននគរបាលខេត្តកំពង់ស្ពឺ ផ្នែកខាងកើត រួចរាល់អស់ហើយ។
ដោយឡែក ដីពន្ធនាគារខេត្ត ក៏កំពុងតែធុំក្លិនរឿងមានអ្នករត់ការលក់អោយឯកជនដែរ ដោយឈ្មួញហ៊ានចំណាយលុយប្រមាណជាង៣លានដុល្លារ ដើម្បីបានទីតាំងមួយនេះ ហើយពន្ធនាគារត្រូវផ្លាស់ប្ដូរទៅកាន់ទីតាំងថ្មី។
នគរបាលមួយក្រុមបាននិយាយប្រាប់កោះសន្តិភាពឱ្យដឹងថា ការដោះដូរដីរបស់ស្នងការដ្ឋានដ៏ធំនេះ ប្រៀបដូចយកឆ្នាំងមាសដូរយកឆ្នាំងដីដូច្នេះដែរ ចំណេញតែបុគ្គលមេៗ ដែលគេត្រូវគ្នា ឯកូនចៅក្រៀមមាត់ទាំងអស់ ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ