ជប៉ុនប្រកាសបង្ហូរទឹកមានវិទ្យុសកម្មចូលសមុទ្រចាប់ផ្តើមនាថ្ងៃស្អែកនេះ
ប្រទេសជប៉ុន ៖ នាយករដ្ឋមន្ត្រីជប៉ុនលោកហ្វូមីអូគីស៊ីដា ថ្លែងកាលពីថ្ងៃទី២២ សីហាថា ការបង្ហូរទៅ
ប្រទេសជប៉ុន ៖ នាយករដ្ឋមន្ត្រីជប៉ុនលោកហ្វូមីអូគីស៊ីដា ថ្លែងកាលពីថ្ងៃទី២២ សីហាថា ការបង្ហូរទៅសមុទ្រទឹកនៃមជ្ឈមណ្ឌលនុយក្លេអ៊ែរមានឧប្បត្តិហេតុហ្វូគូស៊ីម៉ា ស្ថិតនៅភាគឦសានជប៉ុនត្រូវចាប់ផ្ដើមនាថ្ងៃទី២៤ សីហា ។
ជាការប្រុងប្រយ័ត្ន ចិន និងហុងកុងបានចាត់បណ្ដាវិធានការរិតត្បិត ការនាំចូលគ្រឿងបរិភាគពីប្រទេសជប៉ុន។ ការបញ្ចេញទឹកមានវិទ្យុសកម្មដែលស្តុកទុក នៅក្នុងអាងនានាក្រោយគ្រោះមហន្តរាយរញ្ជួយដីនិងរលកយក្សស៊ូណាមី វាយប្រហារលើមជ្ឈមណ្ឌលនុយក្លេអ៊ែរនៅទីនោះ ត្រូវបានផ្ដល់សុពលភាពរួចហើយតាំងពីដើមខែកក្កដាមក ដោយទីភ្នាក់ងារថាមពលបរមាណូអន្តរជាតិ។ ជាច្រើនលើកក្រុងតូក្យូអះអាងថា ទឹកនោះលែងមានគ្រោះថ្នាក់ទៀតហើយ សម្រាប់បរិស្ថាននិងសុខភាពមនុស្ស។
ទោះបីមានសេចក្ដីថ្លែងការណ៍បែបនោះក្ដី ក៏ការព្រួយបារម្ភនៅតែមានខ្ពស់ក្នុងចំណោមប្រទេសជាប់ជិតខាងជប៉ុន។ ក្រុងប៉េកាំងបានហាមឃាត់ចាប់តាំងពីខែមុនមក ការនាំចូលបណ្ដាផលិតផលស្បៀងមកពីខេត្ត១០របស់ជប៉ុន ក្នុងនោះមានខេត្តហ្វូគូស៊ីម៉ាដែរ។ ចាប់តាំងពីពេលនោះមកចិនបានធ្វើតេស្តវិទ្យុសកម្មផងដែរ លើបណ្ដាផលិតផលស្បៀងមកពីកន្លែងផ្សេងៗទៀតរបស់ជប៉ុន។ ចំណែកក្រុងហុងកុងវិញនឹងអនុវត្តភ្លាមៗ ការរិតត្បិតលើបណ្ដាផលិតផលស្បៀងមកពីជប៉ុន។
ក្រុងតូក្យូគ្រោងបញ្ចេញទៅក្នុងមហាសមុទ្រប៉ាស៊ីហ្វិកទឹកជាង១,៣លានតោននៃមជ្ឈមណ្ឌលហ្វូគូស៊ីម៉ាដាយអ៊ីជី។ ការបង្ហូរទឹកនោះគឺចាំបាច់ដើម្បីធ្វើឲ្យត្រជាក់ដល់បណ្ដារេអាក់ទ័រ ដែលរងការប៉ះពាល់ក្រោយស៊ូណាមីខែមីនាឆ្នាំ ២០១១។ ទឹកទាំងនោះត្រូវបានសម្អាតជាមុនយកចេញបណ្ដាសារធាតុវិទ្យុសកម្ម ៕
ចែករំលែកព័តមាននេះ