ខេត្តកំពង់ស្ពឺ ៖ អាជ្ញាធរខេត្តកំពង់ស្ពឺ បានប្រាប់ឱ្យអាជីវករទាំងអស់ដែលបានយកទីតាំងសួនដើមលៀប ផ្សារកំពង់ស្ពឺ ដើម្បីលក់ដូរទំនិញផ្សេងៗ ត្រូវបញ្ឈប់សកម្មភាពលក់ដូរត្រឹមថ្ងៃទី០៤ ខែកញ្ញា ឆ្នាំ២០២៣ ខាងមុខនេះជាកំហិត…
ខេត្តកំពង់ស្ពឺ ៖ អាជ្ញាធរខេត្តកំពង់ស្ពឺ បានប្រាប់ឱ្យអាជីវករទាំងអស់ដែលបានយកទីតាំងសួនដើមលៀប ផ្សារកំពង់ស្ពឺ ដើម្បីលក់ដូរទំនិញផ្សេងៗ ត្រូវបញ្ឈប់សកម្មភាពលក់ដូរត្រឹមថ្ងៃទី០៤ ខែកញ្ញា ឆ្នាំ២០២៣ ខាងមុខនេះជាកំហិត ដោយចាត់ទុកថា ការយកទីតាំងសាធារណៈធ្វើការលក់ដូរយ៉ាងអនាធិបតេយ្យ ធ្វើឱ្យប៉ះពាល់ដល់សណ្តាប់ធ្នាប់ និងការកកស្ទះចរាចរណ៍ ។
ប៉ុន្តែជាក់ស្តែង កាលពីព្រឹកថ្ងៃទី២១ ខែសីហា ឆ្នាំ២០២៣ ស្រាប់តែមានការចម្រូងចម្រាស់គ្នារវាង អាជីវករ និងក្រុមសន្តិសុខសណ្តាប់ធ្នាប់ ដែលតែងតែរៀបចំនៅលើផ្លូវជុំវិញផ្សារនោះ ។ ការជូនដំណឹងនេះ ធ្វើឡើងតាមរយៈសេចក្តីណែនាំស្ដីពីការរៀបចំសណ្ដាប់ធ្នាប់របស់អភិបាលក្រុងច្បារមននៃខេត្តកំពង់ស្ពឺ លោក ទឹម ផានូ ចុះថ្ងៃទី១៦ ខែសីហា ឆ្នាំ២០២៣ ដែលបានជម្រាបជូនម្ចាស់អាជីវកម្ម លក់បន្លែ ត្រី សាច់ និងគ្រឿងឧបភោគ បរិភោគ ទាំងអស់ ដែលបានយកទីតាំងសួនដើមលៀប ដើម្បីដាក់លក់ទំនិញផ្សេងៗ យ៉ាងអនាធិបតេយ្យ ។
ក្នុងសេចក្តីជូនដំណឹងបញ្ជាក់ថា៖ «ការលក់ដូរនេះ ធ្វើឱ្យប៉ះពាល់ដល់សន្តិសុខ សណ្តាប់ធ្នាប់សាធារណៈ បាត់បង់សោភ័ណភាពក្រុង បើទោះបីជាមានការជូនដំណឹង និងចុះរៀបសណ្តាប់ធ្នាប់ជារៀងរាល់ថ្ងៃ ក៏បងប្អូនអាជីវករមិនព្រមចូលរួមអនុវត្តតាមការណែនាំរបស់អាជ្ញាធរឡើយ» ។
ក្នុងន័យនេះ រដ្ឋបាលក្រុងច្បារមន ជូនដំណឹងជាថ្មី ដល់បងប្អូនប្រជាពលរដ្ឋ ម្ចាស់អាជីវកម្ម លក់បន្លែ ត្រីសាច់ និងគ្រឿងឧបភោគបរិភោគទាំងអស់ សូមបញ្ឈប់ការលក់ដូរ នៅបរិវេណសួនដើមលៀប ចាប់ពីថ្ងៃជូនដំណឹងនេះ រហូតដល់ថ្ងៃទី៤ ខែកញ្ញា ឆ្នាំ ២០២៣ជាកំហិត ។
រដ្ឋបាលក្រុងបញ្ជាក់ទៀតថា ការរៀបចំសណ្តាប់ធ្នាប់នេះ គឺដើម្បីចូលរួមសហការរក្សាសន្តិសុខ សណ្តាប់ធ្នាប់សាធារណៈ ឱ្យមានរបៀបរៀបរយ ក្នុងន័យដោះស្រាយ ការកកស្ទះចរាចរណ៍ និងលើកកម្ពស់សោភ័ណភាពក្រុងផង។
ពាក់ព័ន្ធសេចក្តីជូនដំណឹងនេះដែរ អភិបាលខេត្តកំពង់ស្ពឺ ឯកឧត្តម វ៉ី សំណាង បានឱ្យដឹងថា ការជូនដំណឹងជាថ្មីម្តងទៀតនេះ គឺដើម្បីរៀបចំការគ្រប់គ្រងសណ្តាប់ធ្នាប់សារធារណៈ និងសោភ័ណភាពខេត្តឱ្យមានរបៀបរៀបរយ សំដៅលើកកម្ពស់វិស័យទេសចរណ៍ខេត្តឱ្យរីកចម្រើនបន្ថែម
ទៀត។
ឯកឧត្តមអភិបាលខេត្តបានបញ្ជាក់ថា៖ «កន្លងមករដ្ឋបាលខេត្តកំពង់ស្ពឺ បានរៀបចំកន្លែងលក់ដូរនៅផ្សារខេត្តពង់ស្ពឺឱ្យពួកគាត់លក់ដូររួចហើយ តែពួកគាត់មិនព្រមលក់ ចេះតែនាំគា្នមកលក់នៅខាងក្រៅផ្សារ តាមដងផ្លូវទៅវិញ ដែលធ្វើឱ្យប៉ះពាល់សណ្តាប់ធ្នាប់ និងបង្កការកកស្ទះផងដែរ ហេតុនេះសូមឱ្យអាជីវករទាំងអស់ចូលរួមសហការជាមួយអាជ្ញាធរមានសមត្ថកិច្ច»។
តាមរយៈសេចក្តីណែនាំរបស់រដ្ឋបាលក្រុងច្បារមន ក៏បានប្រកាសថា នឹងមានវិធានការចុះរុះរើ ឬដកហូតដោយមិនទទួលខុសត្រូវរាល់ការបាត់បង់ ខូចខាតទ្រព្យសម្បត្តិ និងសម្ភារផ្សេងៗ ដែលមាននៅទីតាំងនោះឡើយ។ ទន្ទឹមគ្នានេះ រដ្ឋបាលក្រុងច្បារមន សង្ឃឹមជឿជាក់យ៉ាងមុតមាំថា បងប្អូនអាជីវករ ទាំងអស់នឹងចូលរួមសហការ និងអនុវត្តតាមខ្លឹមសារនៃសេចក្ដីណែនាំនេះដោយស្មារតីទទួលខុសត្រូវខ្ពស់ចាប់ពីពេលនេះទៅ។
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ