រាជធានីភ្នពេញ ៖ នៅលើសង្វៀនស្ថានីយទូរទស្សន៍ ប៉ុស្តិ៍លេខ៣ នាថ្ងៃសៅរ៍ទី១៤ ឧសភាខាងមុខនេះ មានការប្រកួតប្រដាល់ជាលក្ខណៈអន្តរជាតិ២គូ ។ ខុន រាជ មកពីក្លឹបកងពលធំអន្តរាគមន៍លេខ៣ព្រះវិហារ ជួប ADAY TON ជនជាតិប្រេស៊ីល រីឯជ័យ កុសល មកពីក្លឹបព្រះខ័នរាជ្យ ជួបកីឡាករ SATOSHI ជនជាតិជប៉ុន ។
ADAY TON អ្នកប្រដាល់មកពីប្រេស៊ីល រូបនេះ ប្រវត្តិប្រកួតនៅលើសង្វៀនរបស់គេមានច្រើនគួរសម គឺរហូតដល់២៥លើក ឈ្នះ១៨លើក មិនដែលស្មើ ។ បើទោះជាគេគិតថា ចំនួនប្រកួតនេះមានតិចជាងខុន រាជក្តី តែមិនអាចមើលស្រាលលើអ្នកប្រដាល់ ជនជាតិប្រេស៊ីលម្នាក់នេះបានឡើយ ។ ខុន រាជ ពូកែស្នៀតកែងនិងជង្គង់ តែកម្លាំងរបស់គេមិនសូវជាខ្លាំងប៉ុន្មានឡើយ ។ រីឯ ADAY TON គេនៅមិនទាន់ដឹងថា មានល្បិចប្រយុទ្ធនៅលើសង្វៀនបែបណានោះទេ តែអ្នកទស្សនាភាគច្រើនតែងគិតថាកីឡាករបរទេសកម្លាំងស៊ុហ្វរបស់គេតែងតែខ្លាំងជានិច្ច ។
SATOSHI ធ្លាប់ឡើងសង្វៀនប្រកួតបាន២២លើក ចាញ់១៥លើក មិនដែលស្មើ ដែលប្រវត្តិនេះមិនស្មើនឹងប្រវត្តិឡើងសង្វៀនរបស់កុសលឡើយ ។ កុសលធ្លាប់ឡើងសង្វៀនជាង១០០លើក មិនតែប៉ុណ្ណោះល្បិចប្រយុទ្ធនិងកម្លាំងរបស់គេក៏ខ្លាំងណាស់ដែរ ដូច្នេះបើប្រៀបធៀបទៅលើប្រវត្តិគឺ SATOSHI មិនអាចទៅរួចឡើយ ។ ទោះជាយ៉ាងណា អ្នកដែលធ្លាប់តាមដានការប្រកួតភាគច្រើនមិនសូវហ៊ានទាយទុកមុនទេ គឺមានតែរង់ចាំអ៊ុតមើលការប្រកួតថ្ងៃនោះមកដល់សិន ទើបអាចដឹងបាន ។
សួង សុវណ្ណថា មកពីក្លឹបក្រសួងការពារ ជាតិ ជួបលាប សំណាង មកពីក្លឹបកងពលលេខ ៧០ ។ សារឹម ង៉ា មកពីក្លឹបក្រសួងការពារជាតិ ជួប សូយ សីហា មកពីក្លឹបអូដឹមកីឡា ។ ឡុង ឡាំដា មកពីក្លឹបសាលវ័ន្តកីឡា ប្រកួតជាលក្ខណៈសាកលអាជីពជាមួយផល សោភ័ណ្ឌ មកពីក្លឹប តាឡីដំរីមានឫទ្ធិ ៕
ចែករំលែកព័តមាននេះ