នាយករដ្ឋមន្ត្រីឥណ្ឌាលោកម៉ាន់ ម៉ូហាន់ស៊ិញត្រូវចាប់ផ្តើមពីថ្ងៃទី១២ ឧសភា ទៅនូវទស្សនកិច្ចជាផ្លូវការរយៈពេល២ថ្ងៃ មួយនៅអាហ្វហ្គានីស្ថានសំដៅពង្រឹងទំនាក់ទំនងជាប្រពៃណីរវាងប្រទេសទាំង២។
ក្នុងសេចក្តីប្រកាសមួយចេញផ្សាយកាលពីថ្ងៃទី១១ ឧសភា ដោយក្រសួងការបរទេសឥណ្ឌា លោកស៊ិញមានប្រសាសន៍ថា ប្រសិនបើតំបន់របស់យើងចង់បានភាពរុងរឿង និងការរីកចំរើននោះអាហ្វហ្គានីស្ថានត្រូវតែសំរេចបានជោគជ័យក្នុងការកសាងឡើងវិញ។ យើងនឹងផ្លាស់ប្តូរទស្សនៈគ្នាលើការវិវត្តន៍ទាំងឡាយរបស់តំបន់ ព្រមទាំងលើការតស៊ូរួមរបស់យើងប្រឆាំងភេរវកម្ម។ បំណងប្រាថ្នារបស់ប្រជាជនអាហ្វហ្គានីស្ថាន គឺសន្តិភាព ស្ថេរភាព និងការបង្រួបបង្រួមដែលត្រូវការនូវការជួយទ្រទ្រង់របស់គ្រប់ប្រទេសក្នុងតំបន់ និងរបស់សហគមន៍អន្តរជាតិ។
នេះគឺជាទស្សនកិច្ចលើកដំបូងរបស់នាយករដ្ឋមន្ត្រីឥណ្ឌានៅអាហ្វហ្គានីស្ថានចាប់តាំងពីឆ្នាំ២០០៥មក។ ប្រទេសឥណ្ឌាបានពង្រឹងសន្តិសុខនៅតាមកន្លែងផលប្រយោជន៍ទាំងឡាយរបស់ខ្លួននៅអាហ្វហ្គានីស្ថានក្រោយការស្លាប់របស់អូសាម៉ា ប៊ីនឡាដេន មក។ ទីតាំងផលប្រយោជន៍របស់ឥណ្ឌានៅអាហ្វហ្គានីស្ថាន ក្នុងនោះមានស្ថានទូតរបស់ខ្លួនប្រចាំក្រុងកាប៊ុលផងរងការវាយប្រហារភេរវកម្មជាច្រើនលើករយៈពេលប៉ុន្មានឆ្នាំចុងក្រោយនេះ ៕
ចែករំលែកព័តមាននេះ