លោក កើត ឆែ ណែនាំមន្ត្រីមានឥរិយាបទល្អ បំរើសេវាជូនពលរដ្ឋឱ្យកាន់តែល្អ និងទាន់ពេលវេលា
- ភ្នំពេញ
រាជធានីភ្នំពេញ ៖ អភិបាលរង នៃគណៈអភិបាលរាជធានីភ្នំពេញ លោក កើត ឆែ បានណែនាំអោយ
រាជធានីភ្នំពេញ ៖ អភិបាលរង នៃគណៈអភិបាលរាជធានីភ្នំពេញ លោក កើត ឆែ បានណែនាំអោយមន្ត្រីចំណុះអោយរដ្ឋបាលរាជធានីភ្នំពេញទាំងអស់ ត្រូវមានឥរិយាបទល្អ ជាមួយនិងបំរើសេវា ជូនប្រជាពលរដ្ឋអោយកាន់តែល្អ និងទាន់ពេលវេលា សំដៅធ្វើយ៉ាងណាអោយពួកគាត់ជឿទុកចិត្តមកលើមន្ត្រីរបស់យើង។
ការណែនាំបែបនេះបានធ្វើឡើង នាព្រឹកថ្ងៃទី១៥ ខែសីហា ឆ្នាំ២០២៣នេះ ខណៈលោកអញ្ជើញជាតំណាងលោក ឃួង ស្រេង អភិបាល នៃគណៈអភិបាលរាជធានីភ្នំពេញ ក្នុង «វគ្គបណ្តុះបណ្តាល ស្ដីពីការបណ្ដុះផ្នត់គំនិត និងឥរិយាបថវិជ្ជមានរបស់បុគ្គលិក ក្នុងការបំពេញការងារ» នៅសាលារាជធានីភ្នំពេញ។
លោក កើត ឆែ បានមានប្រសាសន៍លើកឡើងថា វគ្គបណ្តុះបណ្តាលនេះ គឺជាការចែករំលែកអំពីវិធីសាស្ត្រ នៃការបណ្ដុះផ្នត់គំនិតវិជ្ជមាន ក្នុងទីកន្លែងបំពេញការងារ ជូនដល់ បុគ្គលិក-មន្ត្រីរាជការទាំងអស់ ឱ្យខិតខំបំពេញតួនាទី-ភារកិច្ចរបស់ខ្លួនកាន់តែល្អប្រសើរឡើងៗ ស័ក្តិសមជាប្រតិបត្តិករសេវាសាធារណៈ និងជាមន្ត្រី ពោរពេញដោយគុណសម្បត្តិ ចំនួន៤យ៉ាងនោះគឺ ឆន្ទៈម្ចាស់ការ ភក្តីភាព មនសិការ វិជ្ជាជីវៈ និងវប្បធម៌សេវាសាធារណៈ។
លោកបន្តថា តាមរយៈវគ្គបណ្តុះបណ្តាលនេះរំពឹងថា នឹងទទួលបាននូវធាតុចូលបន្ថែមអំពីវិធីសាស្ត្រ និង របៀបរបបនៃការគ្រប់គ្រងអង្គភាព និងបុគ្គលិក-មន្ត្រីរាជការ ក្រោមឱវាទ សំដៅធ្វើយ៉ាងណាធានា នូវប្រសិទ្ធភាព ការងារផង និងសុខដុមនីយកម្ម ក្នុងអង្គភាពផង។ វគ្គបណ្តុះបណ្តាលនេះ ក៏នឹងរួម ចំណែកផ្តល់ជូនបុគ្គលិក-មន្ត្រីរាជការទាំងអស់ នូវអានុភាព ថាមពល ភាពស្វាហាប់ គំនិតវិជ្ជមាន និងឆន្ទៈខ្ពស់ ក្នុងការបំពេញការងាររបស់ខ្លួន ព្រោះថាបុគ្គលិក-មន្ត្រីរាជការ គឺជាកោសិការបស់ស្ថាប័ន និងទ្រទ្រង់ដង្ហើម ស្ថាប័ន ឱ្យដំណើរការទៅប្រកបដោយចីរភាព ស្ថិរភាព និងនិរន្តរភាព។
លោកន្ថែមថា សា្ថប័នមួយដំណើរការទៅបាន លុះត្រាតែថ្នាក់ដឹកនាំ ជាបុគ្គលដែលមានសមត្ថភាព សុខភាព និងព្រហ្មវិហារធម៌ រីឯបុគ្គលិក ត្រូវជាបុគ្គលដែលមានចំណេះដឹង ជំនាញ ខិតខំតស៊ូ សំភីការងារ និងត្រូវគោរពនូវរាល់អនុសាសន៍ និង ការណែនាំរបស់ថ្នាក់ដឹកនាំ នោះទើបយើងអាចទទួលបាននូវ «សុខដុមនីយកម្ម»។ លោកសូមអោយមន្ត្រីដែលទទួលការផ្តល់សេវា ត្រូវតែមានលក្ខណទន់ភ្លន់ចំពោះប្រជាពលរដ្ឋ នៅពេលដែលពួកគាត់មកទទួលសេវា ហើយការផ្តល់សេវានេះ ត្រូវតែលឿន ដើម្បីអោយពួកគាត់ជឿទុកចិត្តមកលើមន្ត្រីរបស់យើង៕
ចែករំលែកព័តមាននេះ