ជំហរយុត្តិធម៌របស់ម៉ាឡេស៊ីស្តីពីជម្លោះកម្ពុជា-ថៃ ពិតជាធ្វើឱ្យរដ្ឋាភិបាលសៀមបាក់មុខបាក់មាត់មិនធម្មតានោះទេ ដែលពុតត្បុតក្រឡិចក្រឡុចរបស់ខ្លួនត្រូវបានមើលឃើញ ។ តាមប្រសាសន៍របស់អនុរដ្ឋមន្ត្រីការបរទេសម៉ាឡេស៊ីលោករីឆាត រ៉ៃអត ជែម ដែលត្រូវបានស្រង់សម្តីចុះផ្សាយដោយបណ្តាញសារព័ត៌មាននានាកាលពីថ្ងៃទី៩ និងថ្ងៃទី១០ ឧសភា ឆ្នាំ ២០១១ មកនេះ បានលើកឡើងថា «ប្រសិនបើថៃឯកភាព និងគោរពតាមកិច្ចព្រមព្រៀងដែលអនុញ្ញាតឱ្យអ្នកសង្កេតការណ៍ឥណ្ឌូណេស៊ី មានវត្តមាននៅទីនោះ ការវាយប្រយុទ្ធគ្នាមិនអាចកើតមានឡើងបានទេ» ។
កម្ពុជាក៏សូមវាយតម្លៃខ្ពស់ចំពោះការយល់ដឹងជាក់ច្បាស់ និងមិនលំអៀងអំពីប្ញសគល់នៃជម្លោះ រវាងកម្ពុជា-ថៃ ដែលបានកើតឡើងជាបន្តបន្ទាប់ចាប់តាំងពីឆ្នាំ២០០៨មក និងអំពើឈ្លានពានដោយការវាយប្រហារទ្រង់ទ្រាយធំរបស់ទាហានថៃមកលើកម្ពុជានាពេលចុងក្រោយនេះ គឺមានសភាពធ្ងន់ធ្ងរបំផុត មិនត្រឹមតែបានបណ្តាលឱ្យមានការស្លាប់បាត់បង់អាយុជីវិតកងទ័ព និងប្រជាពលរដ្ឋស៊ីវិលកម្ពុជាជាច្រើននាក់ប៉ុណ្ណោះទេ ថែមទាំងមានជនភៀសសឹករាប់ម៉ឺននាក់ ត្រូវបានជម្លៀសចេញពីផ្ទះសម្បែងដែលរងការខូចខាតជាតំណំនៃការបាញ់ផ្លោងពីសំណាក់ទាហានឈ្លានពានថៃ ។ ការវាយប្រហារនេះ ក៏បានធ្វើឱ្យប៉ះពាល់យ៉ាងធ្ងន់ធ្ងរដល់ប្រាសាទព្រះវិហារដែលជាសម្បត្តិបេតិកភណ្ឌពិភពលោក ក៏ដូចជាប្រាសាទតាមាន់ និងប្រាសាទតាក្របីរបស់កម្ពុជាផងដែរ ។
កម្ពុជាជានិច្ចកាលតែងតែស្វាគមន៍វត្តមានរបស់អ្នកសង្កេតការណ៍ឥណ្ឌូណេស៊ីដែលបានផ្តល់អាណត្តិដោយអង្គប្រជុំថ្នាក់រដ្ឋមន្ត្រីការបរទេសអាស៊ាន កាលពីខែកុម្ភៈកន្លងទៅនេះ និងបានអំពាវនាវបន្ថែមទៀតដោយប្រមុខរដ្ឋ និងប្រមុខរដ្ឋាភិបាលអាស៊ាននៅទីក្រុងហ្សាការតានាពេលថ្មីៗនេះ ។ កម្ពុជាបានឯកភាពទទួលយកលក្ខខណ្ឌប្រតិបត្តិ (TOR) ដើម្បីកំណត់ឱ្យឃើញថា នរណាជាអ្នកចាប់ផ្តើមវាយប្រហារមុនក៏ដូចជាដើម្បីបញ្ចប់នូវអំពើឈ្លានពានរបស់ថៃមកលើកម្ពុជាម្តងហើយម្តងទៀតផងដែរ ។
ដើម្បីសម្តែងនូវឆន្ទៈរបស់ខ្លួនកម្ពុជាបានទទួលការកែសម្រួលលក្ខខណ្ឌប្រតិបត្តិដែលសម្របសម្រួលដោយប្រទេសឥណ្ឌូណេស៊ីជាបន្តបន្ទាប់ដូចខាងក្រោម៖
លើកទី១នៅថ្ងៃទី២៦ កុម្ភៈ ឆ្នាំ២០១១ ហើយបានឯកភាពលើខ្លឹមសារថ្ងៃទី២៧ កុម្ភៈ ។ លើកទី២នៅថ្ងៃទី៨ មីនា ឆ្នាំ២០១១ ហើយបានឯកភាពលើខ្លឹមសារថ្ងៃទី៩ មីនា ។ លើកទី៣នៅថ្ងៃទី១៥ មីនា ឆ្នាំ២០១១ ហើយបានឯកភាពលើខ្លឹមសារថ្ងៃទី១៦ មីនា ។ លើកទី៤នៅថ្ងៃទី៨ មេសា ឆ្នាំ២០១១ ហើយបានឯកភាពលើខ្លឹមសារថ្ងៃទី៨ មេសា ។ លើកទី៥នៅថ្ងៃទី១១ មេសា ឆ្នាំ២០១១ ហើយបានឯកភាពលើខ្លឹមសារថ្ងៃទី១២ មេសា ។ លើកទី៦នៅថ្ងៃទី២៨ មេសា ឆ្នាំ២០១១ ហើយបានឯកភាពលើខ្លឹមសារថ្ងៃទី៣០ មេសា ។ លើកទី៧នៅថ្ងៃទី១ ឧសភា ឆ្នាំ២០១១ ហើយបានឯកភាពលើខ្លឹមសារថ្ងៃទី២ ឧសភា ។
នៅថ្ងៃទី៣ ឧសភា កម្ពុជាបានចុះហត្ថលេខាលើលិខិតទទួលយកនូវលក្ខខណ្ឌប្រតបត្តិ ដែលអនុញ្ញាតឱ្យអ្នកសង្កេតការណ៍ឥណ្ឌូណេស៊ី មកបំពេញបេសកកម្ម នៅតំបន់ប្រាសាទព្រះវិហារ ។ ដើម្បីបិទបាំងនូវអំពើពុតត្បុតរបស់ខ្លួននៅថ្ងៃទី២១ កុម្ភៈ ឆ្នាំ២០០១ មួយថ្ងៃ មុនកិច្ច ប្រជុំថ្នាក់រដ្ឋមន្ត្រីការបរទេសនៅប្រទេសឥណ្ឌូ ណេស៊ី រដ្ឋាភិបាលថៃបែរជាប្រកាសថា ខ្លួនអាចស្វាគមន៍អ្នកសង្កេតការណ៍ឥណ្ឌូណេស៊ីមកកាន់តំបន់ជម្លោះព្រំដែន ប៉ុន្តែផ្ទុយទៅវិញ ថៃតែងតែប្រើប្រាស់ឧបាយកលគ្រប់យ៉ាង ដើម្បីអូសបន្លាយពេលដោយធ្វើការកែសម្រួលលក្ខខណ្ឌ ប្រតិបត្តិម្តងហើយម្តងទៀត រហូតមកដល់ពេលនេះ គឺមានចំនួន៧ដងរួចមកហើយ ហើយពុំដែលយល់ព្រមលក្ខខណ្ឌប្រតិបត្តិនេះម្តងណាឡើយ ។ ដូចការលើកឡើងរបស់អនុរដ្ឋមន្ត្រីការបរទេសម៉ាឡេស៊ី ដែលបានពោលថា «ខ្ញុំសូមបញ្ជាក់ថា ប្រទេសទាំង១០ រួមទាំងកម្ពុជា និងថៃផងបានឯកភាពគ្នាលើលក្ខខណ្ឌប្រតិបត្តិនេះ ប៉ុន្តែគួរឱ្យសោកស្តាយថា កិច្ចព្រមព្រៀងត្រូវបានបញ្ជូនទៅប្រទេសទាំងពីរ ហើយកម្ពុជាបានឯកភាពលើកិច្ចព្រមព្រៀងនេះ ចំណែកថៃមិនបានឯកភាពទេ» ។
ទោះបីជាមានកិច្ចខិតខំប្រឹងប្រែងរបស់រដ្ឋមន្ត្រីការបរទេស និងប្រធានាធិបតីឥណ្ឌូណេស៊ី ក្នុងការសម្របសម្រួលឱ្យមានការប្រជុំពិភាក្សា រវាងរដ្ឋមន្ត្រីការបរទេសកម្ពុជា និងថៃ ដើម្បីឈានដល់ការព្រមព្រៀងគ្នាក្នុងការដោះស្រាយជម្លោះព្រំដែនជាកញ្ចប់ ក្នុងនោះរួមមានការបញ្ជូនអ្នកសង្កេតការណ៍ឥណ្ឌូណេស៊ីមកកាន់តំបន់ប្រាសាទព្រះវិហារផងដែរក៏ដោយ ប៉ុន្តែគំនិតផ្តួចផ្តើមនេះ បានជាប់គាំងដោយសារតែនាយករដ្ឋមន្ត្រីថៃអាប់ភីស៊ីត បំផ្លាញចោលនូវរាល់កិច្ចខិតខំប្រឹងប្រែងទាំងនោះ ដោយបានថ្លែងកាលពីថ្ងៃទី១០ ឧសភា នេះថា «ថៃនៅតែប្រកាន់យកជំហរដូចពីមុនដដែល គឺប្រសិនបើកម្ពុជាមិនដកទ័ពចេញពីតំបន់ជម្លោះទេ អ្នកសង្កេតការណ៍ក៏មិនត្រូវបានបញ្ជូនទៅទីនោះដែរ»។ ថៃដឹងយ៉ាងច្បាស់ថា កម្ពុជាមិនអាចទទួលយកលក្ខខណ្ឌនេះបានទេ ពីព្រោះកម្ពុជាមិនអាចដកកងទ័ព និងប្រជាជនរបស់ខ្លួនចេញពីទឹកដីរបស់កម្ពុជាខ្លួនឯងបានឡើយ ។ សេចក្តីប្រកាសរបស់នាយករដ្ឋមន្ត្រីថៃបែបនេះ បញ្ជាក់ឱ្យឃើញយ៉ាងច្បាស់អំពីល្បិចកលក្នុងការរារាំងមិនឱ្យមានអ្នកសង្កេតការណ៍ឥណ្ឌូណេស៊ីចូលមកអង្កេតពីបទឈប់បាញ់គ្នាអចិន្ត្រៃយ៍ដែលនេះជានយោបាយបិទទ្វារវាយប្រហារកម្ពុជា ដើម្បីសម្រេចបាននូវអំពើឧក្រិដ្ឋ ដណ្តើមកាន់កាប់ទឹកដីមុននឹងអ្នកសង្កេតការណ៍ឥណ្ឌូណេស៊ីមកដល់ ។ ពីមួយថ្ងៃទៅមួយថ្ងៃ សហគមន៍អន្តរជាតិ យល់ដឹងកាន់តែច្បាស់ចំពោះអំពើពុតត្បុតរបស់ថៃ ហើយការបញ្ជូនអ្នកសង្កេតការណ៍មកកាន់តំបន់ប្រាសាទព្រះវិហារ គឺជាមធ្យោបាយតែមួយគត់ ដើម្បីសម្រេចបាននូវបទឈប់បាញ់គ្នាដ៏មានប្រសិទ្ធភាព និងជាស្ថាពរ ព្រមទាំងដើម្បីអាចបញ្ចៀសនូវការវាយប្រហារសាជាថ្មីដោយយោធាថៃមកលើកម្ពុជាបន្តទៀត ៕
ចែករំលែកព័តមាននេះ