ជនសង្ស័យ២នាក់ធ្វើសកម្មភាពយ៉ាងសកម្ម និងឆ្លងខេត្តទៀត ត្រូវអស់លក្ខណ៍
ខេត្តកំពង់ស្ពឺ៖ ជនសង្ស័យចំនួន២នាក់ដែលជាមុខសញ្ញាចោរលួចយ៉ាងសកម្ម ឆ្លងខេត្តផងនោះ ត្រូវ
ខេត្តកំពង់ស្ពឺ៖ ជនសង្ស័យចំនួន២នាក់ដែលជាមុខសញ្ញាចោរលួចយ៉ាងសកម្ម ឆ្លងខេត្តផងនោះ ត្រូវបានកម្លាំងសមត្ថកិច្ចនគរបាលស្រុកភ្នំស្រួចធ្វើការឃាត់ខ្លួនបានជាបន្តបន្ទាប់ក្រោយធ្វើសកម្មភាពលួចបានសម្រេច។
ការឃាត់ខ្លួនក្រុមជនសង្ស័យខាងលើនេះបានធ្វើឡើងកាលពីវេលាម៉ោង៣រសៀល ថ្ងៃទី១២ ខែសីហា ឆ្នាំ២០២៣ នៅចំណុចភូមិក្រាំងខ្វាវ ឃុំគីរីវន្ត ស្រុកភ្នំស្រួច ខេត្តកំពង់ស្ពឺ។
មន្ត្រីសមត្ថកិច្ចនគរបាលស្រុកភ្នំស្រួចបាននិយាយឲ្យដឹងថា ជនសង្ស័យដែលត្រូវឃាត់ខ្លួនទាំង២នាក់ខាងលើនោះ ម្នាក់ឈ្មោះ នាង ភស្ដ័ ភេទប្រុស អាយុ២៣ឆ្នាំ រស់នៅក្នុងភូមិ ឃុំ ខាងលើ(ជាមុខសញ្ញាលួច) រួមជាមួយម៉ូតូមួយគ្រឿងម៉ាកហុងដា ធុនសេ១២៥ ស៊េរីឆ្នាំ២០២២ ពាក់ផ្លាកលេខម៉ូតូផ្សេង មកសាកសួរនៅអធិការដ្ឋាន។ជនសង្ស័យបានឆ្លើយសារភាពថាម៉ូតូ ដែលខ្លួនកំពុងជិះខាងលើនេះ គឺខ្លួនបានធ្វើសកម្មភាពលួចពីចំណុចមុខផ្ទះប្រជាពលរដ្ឋ ស្ថិតនៅក្រោយវត្តវាលមាស ជិតផ្សារវាលរិញ ស្ថិតក្នុងឃុំវាលរិញ ស្រុកព្រៃនប់ ខេត្តព្រះសីហនុ ។ ជនសង្ស័យបានសារភាពទៀតថា ខ្លួន និងបក្ខពួកម្នាក់ទៀតឈ្មោះ ឈឺន ទីណា ភេទប្រុស អាយុ២១ឆ្នាំ រស់នៅភូមិទី១(ហៅសម្បុកចាប) ឃុំត្រែងត្រយឹង ស្រុកភ្នំស្រួច។
ជនសង្ស័យទាំងពីរនាក់គឺធ្លាប់បានធ្វើសកម្មភាពលួចម៉ូតូនៅក្នុងភូមិសាស្ត្រស្រុកភ្នំស្រួចចំនួន២លើកផងដែរ។
តាមប្រភពបានបន្តទៀតថា លើកទី១-ជនសង្ស័យធ្វើសកម្មភាពនៅថ្ងៃទី៣ ខែកក្កដា ឆ្នាំ២០២៣ ចំណុចផ្សារតាឡាត ឃុំអូរ ស្រុកភ្នំស្រួច លួចបានម៉ូតូមួយគ្រឿងម៉ាក Scopy ពណ៌ស ស៊េរីឆ្នាំ២០២២ គ្មានផ្លាកលេខ យកទៅលក់នៅផ្សារវាលរិញ ខេត្តព្រះសីហនុ។
លើកទី២-នៅថ្ងៃទី៩ ខែកក្កដា ឆ្នាំ២០២៣ ចំណុចភូមិទី៥ ឃុំត្រែងត្រយឹង ស្រុកភ្នំស្រួច លួចបានម៉ូតូមួយគ្រឿងម៉ាកហុងដា ធុនសេ១២៥ ស៊េរីឆ្នាំ២០២១ ពាក់ផ្លាកលេខ កំពង់ស្ពឺ 1S-6561 លួចយកទៅលក់នៅស្រុកបសេដ្ឋ ខេត្តកំពង់ស្ពឺ។
បច្ចុប្បន្ន វត្ថុតាងដកហូតរួមមានម៉ូតូចំនួនពីរគ្រឿង និងជនសង្ស័យទាំងពីរនាក់ ត្រូវនាំទៅកាន់អធិការដ្ឋាន ដើម្បីកសាងសំណុំរឿងអនុវត្តបន្តតាមផ្លូវច្បាប់៕
ចែករំលែកព័តមាននេះ