ក្រុមឡានOff-RoadនិងOff-Road CamCar Racing Performanceនឹងទៅប្រកួតជាលក្ខណៈអន្តរជាតិ
- មណ្ឌលគិរី
ខេត្តមណ្ឌលគិរី ៖ ក្រុមរថយន្ត Off-Road គោព្រៃមណ្ឌលគិរី និងក្រុមរថយន្ត Off-Road CamCar Racing Performance…
ខេត្តមណ្ឌលគិរី ៖ ក្រុមរថយន្ត Off-Road គោព្រៃមណ្ឌលគិរី និងក្រុមរថយន្ត Off-Road CamCar Racing Performance បានទៅចូលរួមប្រកួតជាលក្ខណៈអន្តរជាតិ នៅខេត្តដាក់ឡាក់ នៃសាធារណរដ្ឋសង្គមនិយមវៀតណាម ដែលត្រូវចាប់ផ្តើមពីថ្ងៃទី១១ សីហា ដល់ថ្ងៃទី១៧ សីហា ២០២៣ ។
លោក ទូច រស្មី ប្រធានក្លិប រថយន្ត Off-Road គោព្រៃមណ្ឌលគិរី បានឲ្យដឹងថា ក្រោយទទួលបានការអញ្ជើញពីគណៈកម្មការប្រកួតនៅប្រទេសវៀតណាម លោកបានសហការជាមួយក្រុមរថយន្ត Off-Road CamCar Racing Performance ដឹកនាំយករថយន្តចំនួនពីរគ្រឿង ដើម្បីចូលរួមប្រកួតជាលក្ខណៈអន្តរជាតិ។ ការចេញដំណើរទៅប្រគួតនេះ ក្រុមលោកបានធ្វើដំណើរតាមច្រកទ្វារភាគីដាក់ដាំ ឆ្ពោះទៅទីលានប្រគួតដែលមានចម្ងាយប្រមាណ១៤០គីឡូម៉ែត្រពីព្រំដែនកម្ពុជា កាលពីថ្ងៃទី១១ សីហា ២០២៣ ។
លោក ទូច រស្មី បានបន្តថា ក្រុមរថយន្ត off-road គោព្រៃមណ្ឌលគិរី និងក្រុមរថយន្ត Off-Road CamCar Racing Performance កាលពីដើមឆ្នាំ២០២៣ ធ្លាប់បានសហការរៀបចំការប្រគួតប្រណាំងរថយន្តខ្នាតអន្តរជាតិ បានយ៉ាងជោគជ័យ នៅទីលាន១២ម៉ូតូផាត និងទទួលបានគាំទ្រពីមហាជន ជាពិសេសថ្នាក់ដឹកនាំខេត្តជាខ្លាំង ។
ថ្លែងទៅកាន់ក្រុមកីឡាករប្រណាំងរថយន្តដែលតំណាងឲ្យប្រទេសកម្ពុជា ជាពិសេសប្រជាពលរដ្ឋខេត្តមណ្ឌលគិរី លោក ស៊ន សារុន អភិបាលខេត្តមណ្ឌលគិរីស្តីទី បានលើកទឹកចិត្តក្រុមកីឡាករ និងអ្នកចូលរួមគាំទ្រ ដែលចំណាយពេលវេលាចូលរួមប្រគួតនៅប្រទេសវៀតណាម ឲ្យទទួលបានជោគជ័យ១០០% នាំកិត្តិយសជូនជាតិមាតុភូមិ ។
លោក ស៊ន សារុន បន្ថែមថា ទោះបីកីឡាប្រណាំងរថយន្តឆ្លងឧបសគ្គ មិនមែនជាកីឡាបែបប្រពៃណីរបស់ខ្មែរ ប៉ុន្តែបច្ចុប្បន្នកីឡាប្រភេទនេះ ទទួលបានប្រជាប្រិយភាពពីមហាជនគ្រប់ស្រទាបវណ្ណៈ ដែលជាឱកាសបង្ហាញពីសក្តានុពលវិស័យទេសចរ ទាក់ទាញភ្ញៀវជាតិនិងអន្តរជាតិមកលេងកម្សាន្ត ក្នុងខេត្តមណ្ឌលគិរីច្រើន នៅពេលមានកម្មវិធីប្រគួតក្នុងខេត្ត ដោយបានហុចផលប្រយោជន៍ជូនប្រជាពលរដ្ឋយ៉ាងក្រាស់ក្រែល។
លោក ឡយ ភាឡី ជាកីឡាករម្នាក់ដែលត្រូវចូលរួមប្រគួតប្រណាំងប្រជែងនៅក្នុងព្រឹត្តិការណ៏ខ្នាតអន្តរជាតិ នៅឯប្រទេសវៀតណាម មានជំនឿចិត្តយ៉ាងមុតមាំ អាចយកជ័យជន្នះនាំយកពានរង្វាន់ពីការប្រគួតមួយនេះ បង្ហាញឲ្យអន្តរជាតិបានឃើញពីសមត្ថភាពដ៏អស្ចារ្យរបស់កូនខ្មែរ ។ សូមបញ្ជាក់ថា រថយន្តសម្រាប់ការប្រគួតក្នុងកម្មវិធីខាងលើមានចំនួនពីរគ្រឿង ចំណែករថយន្តដែលត្រូវចូលរួមអមមានចំនួន៦គ្រឿង និងមនុស្សចំនួន១៨នាក់ បូករួមទាំងក្រុមកីឡាករ ៕
ចែករំលែកព័តមាននេះ