ទីភ្នាក់ងារព័ត៌មានលីប៊ី JANA រាយការណ៍ថា នាយករដ្ឋមន្ត្រីលីប៊ី លោកអាល់ បាក់ដាឌី អាលី អាល់ ម៉ាមូឌី បានបរិហារកាលពីថ្ងៃទី១០ ឧសភា ចំពោះការវាយប្រហារប្រទេសលោករបស់អង្គការអូតង់ ដោយចាត់ទុកការវាយប្រហារនេះថា ជាការរំលោភបំពានលើធម្មនុញ្ញ អ.ស.ប ។ លោកអាល់ម៉ា មូឌី បានធ្វើការថ្កោលទោសនេះ ដោយទូរស័ព្ទប្រាប់ដល់អគ្គលេខាធិការអ.ស.បលោកបានគីមូន និងនាយករដ្ឋមន្ត្រីក្រិក លោក GEORGE PAPANDREOU ពីផលវិបាកធ្ងន់ធ្ងរទាំងឡាយនៃការវាយប្រហាររបស់អូតង់ ។
នាយករដ្ឋមន្ត្រីលីប៊ីថ្លែងថា ការវាយប្រហារតាមអាកាសរបស់ពួកសម្ព័ន្ធមិត្តដឹកនាំដោយអូតង់ច្បាស់ណាស់ ធ្វើហួសពីអាណត្តិរបស់អ.ស.ប ហើយ ជាការរំលោភបំពានមួយលើច្បាប់អន្តរជាតិ និងធម្មនុញ្ញអ.ស.ប។ លោកចាត់ទុកសកម្មភាពរបស់អូតង់ថា ជាការរំលោភយ៉ាងធ្ងន់ធ្ងរនិងជាការឈ្លានពានប្រឆាំងប្រជាជនលីប៊ី ។
លោកអាល់ម៉ា មូឌី ក៏ទូរស័ព្ទទៅកាន់រដ្ឋមន្ត្រីការបរទេសប៊ុលហ្គារីផងដែរ ។ សកម្មភាព ការទូតនោះរបស់នាយករដ្ឋមន្ត្រីលីប៊ីធ្វើឡើងបន្ទាប់ពីការវាយប្រហាររបស់អូតង់លើក្រុងទ្រីប៉ូលី នាពេលយប់មក ។ អគាររដ្ឋាភិបាលមួយរងការទម្លាក់គ្រាប់បែកត្រូវបានបំផ្លាញហើយប៉ម គមនាគមន៍មួយប្រើប្រាស់សម្រាប់សេវាកម្មទូរស័ព្ទចល័តត្រូវរងការខូចខាត ។
ក្រុមប្រឹក្សាសន្តិសុខអ.ស.ប បានអនុម័តកាលពីពាក់កណ្តាលខែមីនា នូវដំណោះស្រាយមួយអនុញ្ញាតឱ្យចាត់រាល់វិធានការចាំបាច់ដើម្បីការពារជនស៊ីវិលលីប៊ី ។ ក៏ប៉ុន្តែបណ្តាភាគីដែលចូលរួមធ្វើអន្តរាគមន៍ហាក់ដូចជាប្រែក្លាយអន្តរាគមន៍ទៅជាបេសកកម្មមួយ ដើម្បីជួយពួកឧទ្ទាមផ្តួលរំលំរដ្ឋាភិបាលលីប៊ីដែលនៅទទួលស្គាល់ដោយអ.ស.ប ៕
ចែករំលែកព័តមាននេះ