ក្រុមហ៊ុនអចលនទ្រព្យដ៏ធំបំផុតមួយរបស់ចិន ព្រមានពីការខាតបង់ ៧.៦ពាន់លានដុល្លារ
ចិន ៖ Country Garden ដែលជាក្រុមហ៊ុនអភិវឌ្ឍន៍អចលនទ្រព្យដ៏ធំបំផុតមួយរបស់ប្រទេសចិន បាន
ចិន ៖ Country Garden ដែលជាក្រុមហ៊ុនអភិវឌ្ឍន៍អចលនទ្រព្យដ៏ធំបំផុតមួយរបស់ប្រទេសចិន បានព្រមានថា ក្រុមហ៊ុនមើលឃើញពីការខាតបង់សម្រាប់រយៈពេល៦ខែដំបូងនៃឆ្នាំនេះ រហូតដល់ ៧.៦ពាន់លានដុល្លារអាមេរិក។ សេចក្តីប្រកាសនេះ គឺជាសញ្ញាចុងក្រោយបង្អស់នៃបញ្ហាសំខាន់ៗ នៃសេដ្ឋកិច្ចរបស់ប្រទេសចិន។ នេះបើយោងតាមប្រភពពីសារព័ត៌មាន BBC ចេញផ្សាយនៅព្រឹកថ្ងៃទី១១ ខែសីហា ឆ្នាំ ២០២៣។
យោងតាមតួលេខផ្លូវការក្នុងសប្តាហ៍នេះ បានបង្ហាញថា ប្រទេសចិនបានធ្លាក់ចូលទៅក្នុងបរិត្តផរណាជាលើកដំបូង នៅក្នុងរយៈពេលជាង២ឆ្នាំចុងក្រោយ។ ការនាំចេញក៏បានធ្លាក់ចុះយ៉ាងខ្លាំង ខណៈភាពអត់ការងារធ្វើរបស់យុវជនមានកម្រិតខ្ពស់បំផុត។
ក្រុមហ៊ុន Country Garden បានលើកឡើងនៅក្នុងសេចក្តីប្រកាសមួយទៅកាន់ផ្សារភាគហ៊ុនហុងកុងថា ក្រុមហ៊ុន Country Garden Group ត្រូវបានរំពឹងថា នឹងកត់ត្រាការខាតបង់សរុបចាប់ពីប្រហែល ៦.២៤ពាន់លានដុល្លារ សម្រាប់រយៈពេល៦ខែដំបូង ដែលបានបញ្ចប់នៅថ្ងៃទី៣០ ខែមិថុនា ឆ្នាំ ២០២៣។
ការខាតបង់រំពឹងទុកធៀបនឹងប្រាក់ចំណេញចំនួន ២៦៥លានដុល្លារសម្រាប់ពេលដូចគ្នា កាលពីឆ្នាំមុន។ ក្រុមហ៊ុនក៏បានបន្តផងដែរថា ខ្លួនបានបង្កើតក្រុមការងារពិសេសមួយ ដឹកនាំដោយលោកស្រី Yang Huiyan ប្រធានក្រុមហ៊ុនផ្ទាល់ សម្រាប់ការស្វែងរកមធ្យោបាយ ដើម្បីបង្វែរអាជីវកម្ម។
កាលពីព្រឹកថ្ងៃទី១០ ខែសីហា ឆ្នាំ ២០២៣ កន្លងទៅ ទីភ្នាក់ងារវាយតម្លៃ Moody’s ដែលមានមូលដ្ឋាននៅទីក្រុងញូវយ៉ក សហរដ្ឋអាមេរិក បានបន្ទាបចំណាត់ថ្នាក់របស់ក្រុមហ៊ុន Country Garden ដោយលើកឡើងអំពី ការបង្កើនសាច់ប្រាក់ងាយស្រួល និងហានិភ័យនៃការផ្តល់ហិរញ្ញប្បទានឡើងវិញ។
បញ្ហានេះបានកើតឡើង នៅពេលដែលប្រទេសចិន បានប្រឈមមុខនឹងបញ្ហាប្រឈមផ្នែកសេដ្ឋកិច្ចជាច្រើន ដែលបានចោទជាសំណួរអំពីល្បឿននៃការងើបឡើងវិញ ក្រោយវិបត្តិនៃការរាតត្បាតជំងឺកូវីដ-១៩ របស់ខ្លួន។
កាលពីដើមសប្តាហ៍នេះ តួលេខផ្លូវការបានបង្ហាញថា ការនាំចេញរបស់ប្រទេសចិន បានធ្លាក់ចុះច្រើនជាងការរំពឹងទុក ១៤.៥% នៅក្នុងខែកក្កដា បើធៀបនឹងកាលឆ្នាំមុន ខណៈដែលការនាំចូលក៏បានធ្លាក់ចុះ ១២.៤% ផងដែរ។ ភាពអត់ការងារធ្វើរបស់យុវជន ឈានដល់កម្រិតខ្ពស់បំផុត ក៏កំពុងត្រូវបានឃ្លាំមើលយ៉ាងដិតដល់ផងដែរ ស្របពេលដែលនិស្សិតចិនបញ្ចប់ការសិក្សានៅសាកលវិទ្យាល័យចំនួន ១១.៥៨លាននាក់ ត្រូវបានគេរំពឹងថា នឹងដើរចូលក្នុងទីផ្សារការងារដ៏សែនតូចចង្អៀតនៅឆ្នាំនេះ៕
ចែករំលែកព័តមាននេះ