លោកឃួង ស្រេង ស្នើអាជ្ញាធរខណ្ឌទាំង១៤ ថែរក្សាដើមឈើ និងដាំដើមឈើក្នុងមូលដ្ឋានខ្លួន ប្រែក្លាយទីក្រុងមានពណ៌បៃតង
- ភ្នំពេញ
រាជធានីភ្នំពេញ ៖ អភិបាលរាជធានីភ្នំពេញ លោកឃួង ស្រេង បានជំរុញឲ្យអាជ្ញាធរខណ្ឌទាំង១៤
រាជធានីភ្នំពេញ ៖ អភិបាលរាជធានីភ្នំពេញ លោកឃួង ស្រេង បានជំរុញឲ្យអាជ្ញាធរខណ្ឌទាំង១៤ ថែរក្សាដើមឈើ អោយបានគង់វង្ស និងធ្វើរបាយការណ៍៣ខែម្តងមករដ្ឋបាលរាជធានីភ្នំពេញ ជុំវិញការវិឌ្ឍន៍នៃការដាំដើមឈើនៅក្នុងមូលដ្ឋានរបស់ខ្លួន ដើម្បីធ្វើយ៉ាងណាអោយដើមនៅអាចរស់នៅដោយភាពគង់វង្ស និងរក្សាបានជាទីក្រុងមានពណ៌បៃតង។
ការជម្រុញបែបនេះបានធ្វើឡើងកាលពីព្រឹកថ្ងៃទី១១ ខែសីហា ឆ្នាំ២០២៣នេះ ក្នុងពិធីដាំ និងចែកកូនឈើ ដើម្បីអបអរសាទរ «រុក្ខាទិវា» ០៩ កក្កដា ឆ្នាំ២០២៣ នៅក្នុងបរិវេណសាលាបឋមសិក្សាទ្រនំជ្រឹង សង្កាត់បឹងធំ ខណ្ឌកំបូល។
លោកឃួង ស្រេង បានមានប្រសាសន៍លើកឡើងថា៖ ពិធីដាំ និងចែកកូនឈើ ដើម្បីអបអរសាទរ «រុក្ខាទិវា» ០៩ កក្កដា នេះធ្វើឡើងដើម្បីបង្ហាញពីស្មារតីយកចិត្តទុកដាក់ ក្នុងការថែរក្សាព្រៃឈើ ធ្វើអោយភ្នំពេញមានមានពណ៌បៃតងស្រស់ស្អាត។ លោកបន្តថា ព្រៃឈើមានអត្តប្រយោជន៍ច្រើនណាស់ ដូចជាផ្តល់ជាជម្រកសត្វព្រៃ ផ្តល់អ៊ុកស៊ីសែន និងការទប់ទល់ការប្រែប្រួលអាកាសធាតុជាដើម។ ព្រៃឈើមានតម្លៃមិនអាចកាត់ថ្លៃបាន ដូច្នេះយើងត្រូវថែទាំនិងរក្សាព្រៃឈើអោយបានគង់វង្សទាំងអស់គ្នា។
លោកឃួង ស្រេង បានមានប្រសាសន៍បន្តទៀតថា ពិធីដាំ និងចែកកូនឈើ ដើម្បីអបអរសាទរ «រុក្ខាទិវា» ០៩ កក្កដា ឆ្នាំ២០២៣ នៅក្នុងបរិវេណសាលាបឋមសិក្សាទ្រនំជ្រឹង សង្កាត់បឹងធំ ខណ្ឌកំបូលនេះ មានចំនួន១២៩៦ដើម ដោយ២៣០ដើមចែកនៅតាមវត្តអារាមនិងសាលារៀន និងចំនួន២០០០ដើមផ្សេងទៀតសម្រាប់ចែកនៅទូទាំង១៤ខណ្ឌ ។ ជាមួយនេះយើងក៏បានត្រៀមកូនឈើគ្រប់ប្រភេទចំនួន៣៥០០០ដើមទៀត សម្រាប់ចែកជូនប្រជាពលរដ្ឋយកទៅដាំនៅតាមដងផ្លូវសាធារណៈ។
លោកឃួង ស្រេង ក្នុងឱកាសនោះ ក៏បានជម្រុញអាជ្ញាធរខណ្ឌទាំងអស់លើកទឹកចិត្តអោយប្រជាពលរដ្ឋចូលរួមដាំដើមឈើយ៉ាងហោចណាស់ក្នុង១ខណ្ឌយ៉ាងតិច២០០ដើម។ បន្ថែមពីលើនេះលោកឃួង ស្រេង ក៏បានជំរុញឲ្យអាជ្ញាធរខណ្ឌទាំង១៤ ថែរក្សាដើមឈើអោយបានគង់វង្ស ដោយក្រោយការដាំ ត្រូវធ្វើរបាយការណ៍៣ខែម្តង មករដ្ឋបាលរាជធានីភ្នំពេញ ជុំវិញការដាំដើមឈើនៅក្នុងមូលដ្ឋានរបស់ខ្លួន ដើម្បីអោយបានដឹងថា ដើមឈើរស់ឬងា.ប់ ងាយស្រួលយើងបានដាំបន្ថែម ធ្វើយ៉ាងណាអោយរាជធានីភ្នំពេញជាទីក្រុងរក្សាមានភាពបៃតង ស្រស់ស្អាត៕
ចែករំលែកព័តមាននេះ