រដ្ឋមន្ត្រីការបរទេសចិន លោក វ៉ាង យី នឹងមកបំពេញទស្សនកិច្ចនៅកម្ពុជារយៈពេលពីរថ្ងៃចាប់ពីថ្ងៃទី១២ ដល់១៣ សីហា ។ ទស្សនកិច្ចនោះត្រូវបានគេមើលឃើញនឹងជាការឆ្លុះបញ្ចាំងជាថ្មីអំពីគោលនយោបាយចិន ក្នុងការគាំទ្រដល់កម្ពុជា…
រដ្ឋមន្ត្រីការបរទេសចិន លោក វ៉ាង យី នឹងមកបំពេញទស្សនកិច្ចនៅកម្ពុជារយៈពេលពីរថ្ងៃចាប់ពីថ្ងៃទី១២ ដល់១៣ សីហា ។ ទស្សនកិច្ចនោះត្រូវបានគេមើលឃើញនឹងជាការឆ្លុះបញ្ចាំងជាថ្មីអំពីគោលនយោបាយចិន ក្នុងការគាំទ្រដល់កម្ពុជា ។
យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា កាលពីថ្ងៃទី ១០ ខែសីហា បានអោយដឹងថា ទស្សនកិច្ចរបស់លោក វ៉ាង យី នឹងក្លាយជាឱកាសសម្រាប់ការពង្រឹងកិច្ចសហប្រតិបត្តិការ ត្បងពេជ្ររវាងប្រទេសទាំងពីរ ។ ការប្រកាសរបស់ក្រសួងការបរទេសចិន កាលពីថ្ងៃទី០៩ ខែសីហា ឆ្នាំ២០២៣ ជាសក្ខីភាពថ្មីដែលឆ្លុះបញ្ចាំងថា គោលនយោបាយការបរទេសរបស់ចិន គឺមិនចោលកម្ពុជាដាច់ខាតទោះជាកម្ពុជានឹងមានរដ្ឋាភិបាលថ្មីចូលមកគ្រប់គ្រងប្រទេស ចាប់ពីថ្ងៃទី២២ ខែសីហា ខាងមុខនេះក៏ដោយចុះ ។
ក្រសួងការបរទេសចិនបានប្រកាសជាផ្លូវការថា លោក វ៉ាង យី ( Wang Yi) សមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិននឹងបំពេញទស្សនកិច្ចប្រទេសនៅប្រទេសបីនៅអាស៊ាន បន្ទាប់ពីលោកចូលកាន់តំណែងជាប្រមុខការទូតចិនឡើងវិញ ដោយនៅក្នុងនោះក៏មានកម្ពុជាផងដែរ ចាប់ពីថ្ងៃទី១០ ដល់ថ្ងៃទី១៣ ខែសីហាតទៅ ។
តាមសេចក្តីប្រកាសរបស់ក្រសួងការបរទេសចិនមិនមានបញ្ជាក់ថា លំអិតនៃកម្មវិធីនៅក្នុងដំណើរទស្សនៈកិច្ចទាំងបីប្រទេសនេះទេ ហើយចំពោះកម្ពុជាក៏មិនលំអិតដែរដោយគ្រាន់តែលើកឡើងថា ប្រទេសចិន និងកម្ពុជា កំពុងធ្វើការដើម្បីឈានទៅរកយុគសម័យថ្មីនៃការកសាងសហគមន៍ចិន-កម្ពុជា ដែលមានគុណភាពខ្ពស់កម្រិតខ្ពស់ និងស្តង់ដារខ្ពស់ជាមួយនឹងអនាគតរួមគ្នាតែប៉ុណ្ណោះ ។ បន្ទាប់ពីប្រកាសនោះ តាមសេចក្តីរាយការណ៍របស់ទីភ្នាក់ងារព័ត៌មានស៊ីនហួរ ក៏មិនបានបញ្ជាក់លំអិតអំពីដំណើរទស្សនៈកិច្ចនេះដែរ ដោយគ្រាន់តែដឹងថា ដំណើរទស្សនៈកិច្ចនេះ គឺស្របតាមការអញ្ជើញពីសមភាគីរបស់លោក វ៉ាង យី នៅសិង្ហបុរី ម៉ាឡេស៊ី និងកម្ពុជាតែប៉ុណ្ណោះ ។
អ្នកនាំពាក្យក្រសួងការបរទេសចិនបាននិយាយនៅថ្ងៃដដែលនោះថា ឆ្នាំនេះ គឺជាខួបលើកទី១០ នៃចក្ខុវិស័យនៃការកសាងសហគមន៍ជាមួយនឹងអនាគតរួមគ្នាសម្រាប់មនុស្សជាតិ និងគំនិតផ្តួចផ្តើមខ្សែក្រវ៉ាត់ និងផ្លូវ ហើយបណ្តាប្រទេសអាស៊ីអាគ្នេយ៍បានកំពុងតែឈានមុខគេក្នុងការជំរុញចក្ខុវិស័យនៃការកសាងសហគមន៍ជាមួយនឹងអនាគតរួមគ្នាសម្រាប់មនុស្សជាតិ ហើយប្រជាជាតិទាំងនេះក៏កំពុងតែជាដៃគូដ៏សំខាន់សម្រាប់កិច្ចសហប្រតិបត្តិការខ្សែក្រវ៉ាត់ និងផ្លូវផងដែរ ។
អ្នកនាំពាក្យរូបនេះបានមានប្រសាសន៍ថា ប្រទេសចិនសង្ឃឹមថា ដំណើរទស្សនកិច្ចនេះនឹងជំរុញទំនាក់ទំនងយុទ្ធសាស្ត្រជាមួយប្រទេសអាស៊ីអាគ្នេយ៍ទាំងបី ហើយនឹងជំរុញឲ្យចរិតលក្ខណៈថ្មីនៃទំនាក់ទំនងចិន-សិង្ហបុរីឱ្យទៅជាសកម្មភាពជាក់ស្តែង ហើយក៏ដើម្បីឈានទៅសម្រេចបាននូវវឌ្ឍនភាពរឹងមាំក្នុងការកសាងសហគមន៍មួយដែលមានអនាគត រួមគ្នាទាំងជាមួយម៉ាឡេស៊ី និងជាមួយកម្ពុជា ដើម្បីពង្រឹងកិច្ចសហប្រតិបត្តិការខ្សែក្រវាត់ និងផ្លូវប្រកបដោយគុណភាពខ្ពស់ និងលើកកំពស់ទំនាក់ទំនងទ្វេភាគីឲ្យឡើងដល់កម្រិតថ្មីមួយ ។
ប្រទេសចិនបានត្រៀមខ្លួនរួចជាស្រេចក្នុងការធ្វើការជាមួយប្រទេសទាំងបី ដើម្បីអនុវត្តគំនិតផ្តួចផ្តើមអភិវឌ្ឍន៍សកលគំនិតផ្តួចផ្តើមសន្តិសុខសកល និងគំនិតផ្តួចផ្តើម អរិយធម៌ សកល ដើម្បីជំរុញការស្តារសេដ្ឋកិច្ច និងការពារសន្តិភាពឲ្យកាន់តែស៊ីជម្រៅ ។
ក្រសួងការបរទេសកម្ពុជានៅមិនទាន់បញ្ជាក់អំពីដំណើរទស្សនៈកិច្ចលោក វ៉ាង យី នៅកម្ពុជានៅឡើយទេ នៅត្រឹមថ្ងៃត្រង់ទី១០ ខែសីហា ប៉ុន្តែគេជឿថា នៅក្នុងដំណើរទស្សនៈកិច្ចនេះ លោក វ៉ាង យី នឹងជួបសមភាគីកម្ពុជាហើយក៏នឹងជួបដោយខានមិនបាន គឺសម្តេចតេជោ ហ៊ុន សែន នៅក្នុងនាមជានាយករដ្ឋមន្ត្រីចាំផ្ទះ និងលោកបណ្ឌិត ហ៊ុន ម៉ាណែត ដែលជានាយករដ្ឋមន្ត្រី បន្ទាប់ពីថ្ងៃទី២២ ខែសីហាតទៅ ។
គោលបំណងរបស់ លោក វ៉ាង យី មកកម្ពុជាលើកនេះ គឺទំនងជាផ្តោតសំខាន់លើការធានា និងបញ្ជាក់អំពីជំហការទូតរបស់មហាអំណាចនេះចំពោះកម្ពុជាជូនមេដឹកនាំដែលនឹងត្រូវចាកចេញ និងមេដឹកនាំដែលនឹងត្រូវចូលមកកាន់តំណែងនេះ បើទោះបីអ្នកវិភាគជាច្រើនបានប៉ាន់ប្រមាណរួចហើយថា ទំនាក់ទំនងរវាងកម្ពុជា និងចិនគ្មានអ្វីប្រែប្រួលក៏ដោយចុះ ។ ក្រៅពីនេះក៏ជាឱកាសដែលចិនប្រាប់ពិភពលោកអំពីគោលនយោបាយរបស់ចិនចំពោះកម្ពុជាផងដែរ។
ពាក់ព័ន្ធនឹងបញ្ហានេះ នៅក្នុងបទអត្ថាធិប្បាយមួយនៅសារព័ត៌មាន ឆាណែល ញូវអេស៊ៀ លោកបណ្ឌិត ឈាង វណ្ណារិទ្ធ នាយកវិទ្យាស្ថានចក្ខុវិស័យអាស៊ី បានសរសេរថាទំនាក់ទំនងរវាងកម្ពុជា និងអាមេរិកមានភាពតានតឹងដោយសារការជ្រៀតជ្រែករបស់អាមេរិកក្នុងបញ្ហាប្រជាធិបតេយ្យ និងសិទ្ធិមនុស្សរបស់កម្ពុជា។ លោកបានបន្តទៀតថា បន្ទាប់ពីការបោះឆ្នោត សហរដ្ឋអាមេរិកបានចំអកការបោះឆ្នោតថា «មិនសេរី ឬយុត្តិធម៌» ហើយបានប្រកាសពីការហាមប្រាមទិដ្ឋាការលើបុគ្គលដែលខ្លួននិយាយថា បានធ្វើឱ្យខូចដល់លទ្ធិប្រជាធិបតេយ្យ និងបានផ្អាកកម្មវិធីជំនួយមួយចំនួនមកកម្ពុជាផងដែរ ប៉ុន្តែប្រទេសចិនដែលជាប្រទេសដៃគូដ៏សំខាន់របស់កម្ពុជាបានអបអរសាទរចំពោះជ័យជម្នះរបស់គណបក្សកាន់អំណាច ។
លោកបណ្ឌិតបានចែករំលែកថា ប្រធានាធិបតីចិន លោក ស៊ី ជីនពីង បានសរសេរលិខិតអបអរសាទររបស់លោកជូនសមភាគីកម្ពុជា ដោយលើកឡើងថា ចិន និងកម្ពុជាជាសហគមន៍មួយដែលមានអនាគតរួម ។ លោកបណ្ឌិតក៏បានបន្តទៀតថា ទំនាក់ទំនងកម្ពុជា-ចិន នៅតែជាស្នូលនៃគោលនយោបាយការបរទេសរបស់កម្ពុជាក្រោមរដ្ឋបាលនៃការដឹកនាំរបស់អ្នកជំនាន់ក្រោយ ប៉ុន្តែរដ្ឋាភិបាល ដែលមានក្បាលម៉ាស៊ីនថ្មីក៏ត្រូវការនូវការអនុវត្តដ៏រឹងមាំនៃយុទ្ធសាស្ត្រការពារហានិភ័យ និងការធ្វើពិពិធកម្មការទូតដែរ ។
សរុបមកវិញសម្រាប់កម្ពុជា ចិននៅតែត្រូវបានចាត់ទុកថា ជាមូលដ្ឋានស្នូលមួយនៃ គោលនយោបាយការបរទេសកម្ពុជា ដូច្នេះហើយទើបចិននៅតែបន្តធានា និងពង្រឹងចំពោះទំនាក់ទំនងនេះទោះជាចិនដឹងថា កម្ពុជាត្រូវធ្វើពិពិធកម្មការទូត ដើម្បីរក្សាភាពជាក់លាក់ជាមូលដ្ឋានសម្រាប់ការរក្សាស្វ័យភាព និងអធិបតេយ្យភាពរបស់ខ្លួននៅលើឆាកអន្តរជាតិក៏ដោយ ៕ដោយៈ ហេង ចេស្តារ
ចែករំលែកព័តមាននេះ