ខេត្តកោះកុង ៖ កាលពីរសៀលថ្ងៃទី១០ ឧសភា គ្រោះថ្នាក់ចរាចរណ៍គួរឱ្យរន្ធត់មួយដែលមិនធ្លាប់មានលើកកំណាត់ផ្លូវជាតិលេខ៤៨ ដែលជាចំណុចផ្លូវកោងបានកើតឡើងនៅចំណុចអន្ទង់អាំង ស្ថិតក្នុងភូមិជីមាល ឃុំអណ្តូងទឹក ស្រុកបទុមសាគរ ខេត្តកោះកុង ដោយរថយន្ត៣គ្រឿងបានបុកបន្តគ្នា បណ្តាលឱ្យស្លា.ប់មនុស្សចំនួន៦នាក់
ខេត្តកោះកុង ៖ កាលពីរសៀលថ្ងៃទី១០ ឧសភា គ្រោះថ្នាក់ចរាចរណ៍គួរឱ្យរន្ធត់មួយដែលមិនធ្លាប់មានលើកកំណាត់ផ្លូវជាតិលេខ៤៨ ដែលជាចំណុចផ្លូវកោងបានកើតឡើងនៅចំណុចអន្ទង់អាំង ស្ថិតក្នុងភូមិជីមាល ឃុំអណ្តូងទឹក ស្រុកបទុមសាគរ ខេត្តកោះកុង ដោយរថយន្ត៣គ្រឿងបានបុកបន្តគ្នា បណ្តាលឱ្យស្លាប់មនុស្សចំនួន៦នាក់ ក្នុងនោះប្រុស៣នាក់ និងរងរបួសធ្ងន់១៨នាក់ ក្នុងនោះរបួសស្រាល២នាក់ ហើយមានស្រីចំនួន១០នាក់ និងប្រុស៨នាក់ សុទ្ធសឹងជាជនជាតិខ្មែរអ៊ិស្លាម ។
លោកវរសេនីយ៍ត្រីអ៊ុក សុខា នាយការិយាល័យចរាចរផ្លូវគោក នៃស្នងការដ្ឋាននគរបាលខេត្តកោះកុងមានប្រសាសន៍ថា នៅវេលាម៉ោងប្រហែល១៣និង១៥នាទី រថយន្តទាំង៣គ្រឿងបានធ្វើដំណើរបញ្ច្រាសទិសគ្នា ។ ពេលទៅដល់ចំណុចកើតហេតុ (ចំណុចអន្ទង់អាំង) ដែលស្ថានភាពផ្លូវកោង រថយន្តស៊ីទែនដឹកប្រេងឥន្ធនៈ របស់ក្រុមហ៊ុនមួយពាក់ស្លាកលេខ ភ្នំពេញ 3B-2248 ពណ៌ក្រហមលឿង កំពុងបើកឡើងផ្លូវចំណោត បានបើករំលោភលើទ្រូងផ្លូវខាងឆ្វេងដៃរបស់ខ្លួន ។ ស្របពេលគ្នានោះ រថយន្តទួរីស២គ្រឿងកំពុងបើកប្រដេញគ្នាយ៉ាងលឿនចុះចំណោត ។ ពេលឃើញដូច្នេះ រថយន្តស៊ីទែនក៏ខំកាច់ចង្កូតមកខាងស្តាំដៃរបស់ខ្លួនយ៉ាងប្រថុចញ៉ុច ។ ការប្រឹងយកចង្កូតនោះ គឺងាកបានតែក្បាល ខណៈរថយន្តទួរីស ពណ៌ស ពាក់ស្លាកលេខ ភ្នំពេញ 2N-5503 បើកមកដល់ក៏បុកពាក់កណ្តាលរថយន្តស៊ីទែនយ៉ាងពេញទំហឹង បណ្តាលឱ្យរថយន្តទួរីសរួញមួយកំណាត់មុខ ចំណែករថយន្តស៊ីទែនក៏ត្រូវខ្ទាតកន្ទុយធ្លាក់លើចិញ្ចើមផ្លូវ ។
លោកវរសេនីយ៍ត្រីបន្តថា ខណៈនោះដែរ រថយន្តទួរីសមួយគ្រឿងទៀត ពណ៌ខៀវ ពាក់ស្លាកលេខ ភ្នំពេញ 2C-5727 ដែលបើកមកពីក្រោយទួរីស ពណ៌ស ជាន់ហ្វ្រាំងមិនទាន់ក៏ទៅបុកកន្ទុយទួរីស ពណ៌សបន្ថែមទៀត ប៉ុន្តែមិនរងគ្រោះធ្ងន់ធ្ងរទេ ។ លោកវរសេនីយ៍ត្រីអ៊ុក សុខា បានឱ្យដឹងទៀតថា បន្ទាប់ពីហេតុការណ៍គ្រោះថ្នាក់នេះបានកើតឡើងភ្លាម ក៏ត្រូវបានសមត្ថកិច្ចប៉ូលិសស្រុកបទុមសាគរ រួមនឹងរថយន្តសង្គ្រោះរបស់មន្ទីរពេទ្យបង្អែកស្រុកស្រែអំបិល ទៅជួយសង្គ្រោះអ្នកដែលរងរបួសជាបន្ទាន់ផងដែរ ហើយត្រូវបានពិនិត្យឃើញមានអ្នកស្លាប់ចំនួន៦នាក់ និងរងរបួស១៨នាក់ ។ ចំណែកអ្នកបើកបររថយន្តទួរីសទាំង២គ្រឿងស្លាប់ម្នាក់ របួសម្នាក់ ចំណែកអ្នកបើកបររថយន្តស៊ីទែនបានរត់គេចខ្លួនបាត់ ៕
ចែករំលែកព័តមាននេះ