ក្រសួងធនធានទឹក និងឧតុនិយម បានប្រកាសឲ្យមានការប្រុងប្រយ័ត្នចំពោះអាកាសធាតុ ដោយសារតែចាប់ពីថ្ងៃទី៩ រហូតដល់ថ្ងៃទី១៥ ខែសីហា ឆ្នាំ២០២៣ ខាងមុខនេះ នឹងមាន
រាជធានីភ្នំពេញ ៖ ក្រសួងធនធានទឹក និងឧតុនិយម បានប្រកាសឲ្យមានការប្រុងប្រយ័ត្នចំពោះអាកាសធាតុ ដោយសារតែចាប់ពីថ្ងៃទី៩ រហូតដល់ថ្ងៃទី១៥ ខែសីហា ឆ្នាំ២០២៣ ខាងមុខនេះ នឹងមានភ្លៀងធ្លាក់ពីតិចទៅបង្គួរលាយឡំជាមួយនឹងបាតុភូត ផ្គរ រន្ទះ និងខ្យល់កន្ត្រាក់ផងដែរ។
យោងតាមសេចក្តីជូនដំណឹងស្ដីពីស្ថានភាពធាតុអាកាសចាប់ពីថ្ងៃទី៩-១៥ ខែសីហា ឆ្នាំ២០២៣ របស់ក្រសួងធនធានទឹក បានឲ្យដឹងថា កម្ពុជាទទួលឥទ្ធិពលខ្សោយពីជ្រលងសម្ពាធទាប ។ បន្ទាប់មក ចាប់ពីថ្ងៃទី១២ ខែសីហា ទទួលឥទ្ធិពលខ្សោយពីប្រព័ន្ធសម្ពាធទាបអូសបន្លាយលើភាគខាងដើមប្រទេសមីយ៉ាន់ម៉ា ឡាវ និងប្រទេសវៀតណាម ជាមួយខ្យល់មូសុងនិរតីមធ្យម។
ក្រសួងបានលើកឡើងថា លក្ខណៈទាំងនេះ នឹងធ្វើឲ្យតំបន់ទំនាបកណ្តាលមានសីតុណ្ហភាពអប្បបរមា មានពី ២៤-២៦ អង្សាសេ និងសីតុណ្ហភាពអតិបរមា មានពី ៣៣-៣៥អង្សាសេ។ អាចមានភ្លៀងធ្លាក់ក្នុងកម្រិតពីតិចទៅមធ្យម លាយឡំដោយ ផ្គរ រន្ទះ និងខ្យល់កន្ត្រាក់កម្រិតខ្សោយ។
ជាមួយគ្នានោះដែរ តំបន់ខ្ពង់រាប មានសីតុណ្ហភាពអប្បបរមា មានពី ២៣-២៥អង្សាសេ និង សីតុណ្ហភាពអតិបរមា មានពី ៣៣-៣៦អង្សាសេ។ អាចមានភ្លៀងធ្លាក់ក្នុងកម្រិតពីតិចទៅមធ្យម លាយឡំដោយ ផ្គរ រន្ទះ និងខ្យល់កន្ត្រាក់កម្រិតខ្សោយ ។
ចំណែកឯតំបន់មាត់សមុទ្រ មានសីតុណ្ហភាពអប្បបរមា មានពី ២៤-២៦អង្សាសេ និងសីតុណ្ហភាពអតិបរមា មានពី ៣០-៣២អង្សាសេ។ អាចមានភ្លៀងធ្លាក់ក្នុងកម្រិតពីតិចទៅបង្គួរ លាយឡំដោយ ផ្គរ រន្ទះ និងខ្យល់កន្ត្រាក់កម្រិតមធ្យម។ ក្រសួងបានលើកឡើងថា អាស្រ័យដូចបានជម្រាបជូនខាងលើ សូមសាធារណជនទទួលជ្រាបជាព័ត៌មាន៕
ចែករំលែកព័តមាននេះ