ខេត្តក្រចេះ ៖ គ្រោះថ្នាក់ចរាចរណ៍មួយបានកើតឡើងទាំងព្រលឹមអុរបង្កឡើងរវាងរថយន្ត និងម៉ូតូបណ្តាលឲ្យប្តី-ប្រពន្ធពីរនាក់រងរបួសជាទម្ងន់ដោយបាក់ជើងខ្ទេចទាំងសងខាង និងមនុស្សបីនាក់ទៀត ក៏រងរបួសធ្ងន់-ស្រាលក្នុងហេតុការណ៍នេះដែរ ដែលបង្កឡើងដោយរថយន្តទួរីសមួយគ្រឿងបានបើកបុកជាមួយម៉ូតូដឹកឈើធ្នង់មួយគ្រឿង
ខេត្តក្រចេះ ៖ គ្រោះថ្នាក់ចរាចរណ៍មួយបានកើតឡើងទាំងព្រលឹមអុរបង្កឡើងរវាងរថយន្ត និងម៉ូតូបណ្តាលឲ្យប្តី-ប្រពន្ធពីរនាក់រងរបួសជាទម្ងន់ដោយបាក់ជើងខ្ទេចទាំងសងខាង និងមនុស្សបីនាក់ទៀត ក៏រងរបួសធ្ងន់-ស្រាលក្នុងហេតុការណ៍នេះដែរ ដែលបង្កឡើងដោយរថយន្តទួរីសមួយគ្រឿងបានបើកបុកជាមួយម៉ូតូដឹកឈើធ្នង់មួយគ្រឿង ហើយបានជ្រុលទៅបុកជាមួយម៉ូតូពីរគ្រឿងទៀត។ ហេតុការណ៍នេះបានកើតឡើងនៅវេលាម៉ោង៥និង៣០នាទីព្រឹក ថ្ងៃទី១០ ឧសភា ត្រង់ចំណុចមុខទីបញ្ជាការប៉េអឹម ស្រុកស្នួល។
តាមព័ត៌មានពីមន្រី្តប៉ូលិសផ្នែកចរាចរណ៍បាននិយាយថា នៅព្រឹកថ្ងៃកើតហេតុនោះរថយន្តទួរីសជិះគ្នាពីរនាក់បានបើកបរយ៉ាងលឿនក្នុងទិសដៅពីជើងទៅត្បូងបុកជាមួយម៉ូតូដឹកឈើធ្នង់បើកបរដោយឈ្មោះអ៊ឹម ណាក់ អាយុ១៨ឆ្នាំ ក្នុងទិសដៅបញ្ច្រាសគ្នា បណ្តាលឱ្យផ្លោងអ្នកជិះពីក្រោយទៅបុកកញ្ចក់រថយន្ត បណ្តាលឱ្យរងរបួសស្រាល ហើយរថយន្តទួរីសបានកិនអ្នកបើកម៉ូតូដឹកឈើធ្នង់បាក់ជើងម្ខាង ។
សាក្សីដែលឃើញហេតុការណ៍បានឲ្យដឹងថា បន្ទាប់ពីរថយន្តទួរីសបានបុកម៉ូតូដឹកឈើធ្នង់ហើយបានជ្រុលទៅបុកម៉ូតូមួយគ្រឿងទៀត បណ្តាលឱ្យអ្នកជិះម៉ូតូពីរនាក់ ប្តីឈ្មោះរស់ សុខឡេង អាយុ៤៣ឆ្នាំ ជាគ្រូបង្រៀន និងប្រពន្ធឈ្មោះសុខ ឃីម អាយុ៣៨ឆ្នាំ រស់នៅក្នុងភូមិថ្ពង ឃុំស្នួល ស្រុកស្នួល ដែលកំពុងតែជិះម៉ូតូយកបន្លែមកលក់នៅផ្សារស្នួល បាក់ជើងខ្ទេចទាំងសងខាងពីរនាក់ប្តី-ប្រពន្ធ។ រីឯម៉ូតូដឹកឈើធ្នង់មួយគ្រឿងនោះក៏ខ្ទាតទៅបុកម៉ូតូមួយគ្រឿងទៀតដែលបើកពីមុខបណ្តាលឱ្យអ្នកបើកម៉ូតូឈ្មោះថា ប្រុស អាយុ២០ឆ្នាំ រស់នៅស្រុកស្នួល រងរបួសស្រាល។ ជាមួយគ្នានេះរថយន្តទួរីសក៏ជ្រុលទៅបុករថយន្តដឹកដីមួយគ្រឿងទៀត ដែលម្ចាស់ចតនៅក្បែរនោះ ទើបទៅមុខលែងរួច រីឯអ្នកបើកបរនិងអ្នកជិះក្នុងរថយន្តទួរីសបានរត់គេចខ្លួនបាត់ ។
លោកឱ សេង នាយរងផ្នែកសណ្តាប់ធ្នាប់នគរបាលស្រុកស្នួលបាន បញ្ជាក់ថា សំភារទាំងអស់មានរថយន្តនិងម៉ូតូ បន្ទាប់ពីចុះធ្វើការវាស់វែងរួចត្រូវបានយកមករក្សាទុកនៅអធិការដ្ឋានស្រុក ហើយឆ្លងតាមការវាស់វែងនៅកន្លែងកើតហេតុឃើញថា មូលហេតុដែលនាំឱ្យកើតមានគ្រោះថ្នាក់ចរាចរណ៍នេះកើតឡើង ដោយសារអ្នកបើកបររថយន្តទួរីសបើកលឿនរំលោភឆ្លងចូល ចំណែកផ្លូវម្ខាងទៀតមិនគោរពសិទ្ធិអាទិភាព ម្យ៉ាងទៀតម៉ូតូដែលដឹកឈើធ្នង់នេះ ក៏ដឹកខុសបច្ចេកទេសដែរ ទើបបង្កឱ្យមានបញ្ហាបែបនេះ ៕
ចែករំលែកព័តមាននេះ