ខេត្តក្រចេះ ៖ កាលពីព្រឹកថ្ងៃទី៣ ខែសីហា ឆ្នាំ២០២៣ មានករណីប្រជាពលរដ្ឋម្នាក់រស់នៅភូមិអូរព្រះ ឃុំអូរកណ្តៀសែនជ័យ ស្រុកអូរគ្រៀងសែនជ័យ បានរាយការណ៍ប្តឹងសមត្ថកិច្ចនគរបាលប៉ុស្តិ៍មូលដ្ឋានថា គាត់បានទុកម៉ូតូនៅក្រោមផ្ទះ ហើយដើរឆ្លងផ្លូវទៅខាងមុខ ដើម្បីរកកា.ប់ដើមពពកវិលមកធ្វើជាថ្នាំខ្មែរ ស្រាប់តែលឺសំឡេងមនុស្សស្រែកហៅគ្នា។ ពេលនោះគាត់ក៏ងាកមកមើល ក៏ឃើញមនុស្សប្លែកមុខជិះម៉ូតូស្រដៀងនឹងម៉ូតូរបស់គាត់ ហើយគាត់ក៏រត់ទៅមើលក្រោមផ្ទះ ស្រាប់តែបាត់ម៉ូតូខ្លួនឯងមែន ពេលនោះក៏បានស្រែកហៅបងប្អូនឲ្យជួយដេញតាម ចោ.រ និងទូរស័ព្ទទាក់ទងប្តឹងទៅនគរបាលប៉ុស្ដិ៍ ដើម្បីឲ្យជួយស្ទាក់ចាប់ចោ.រតែម្តង។
ក្រោយពេលដែលសមត្ថកិច្ចទទួលបានព័ត៌មាននេះភ្លាម នគរបាលជំនាញផ្នែកព្រហ្មទណ្ឌស្រុក សហការជាមួយកម្លាំងមូលដ្ឋានប៉ុស្ដិ៍ ចេញល្បាតលើដងផ្លូវសាធារណៈ ដើម្បីស្វែងរក និងឃាត់ខ្លួនជនសង្ស័យជាចោ.រលួ.ចម៉ូតូនោះ។ ហើយក៏មិនយូរប៉ុន្មាន នគរបាលក៏ធ្វើការឃាត់ខ្លួនជនសង្ស័យភ្លាមៗផងដែរ ដែលជននោះមានឈ្មោះ ជា ឡាយ ភេទប្រុស អាយុ៥៨ឆ្នាំ រស់នៅភូមិរកាធំ ឃុំជ្រោយបន្ទាយ ស្រុកព្រែកប្រសព្វ ខេត្តខេត្តក្រចេះ ។
ជាមួយនឹងការឃាត់ខ្លួនជនសង្ស័យខាងលើនេះ សមត្ថកិច្ចក៏បានដកហូតវត្ថុតាងរួមមាន ៖ ១-ម៉ូតូ១គ្រឿងម៉ាកវេវ ស៊េរីឆ្នាំ២០២ ពណ៌ខ្មៅ គ្មានស្លាកលេខ, ២- សោខ្សៀរលេខ៨ មួយ និង៣-សោសម្រាប់កាច់សោម៉ូតូចំនួន៣ផងដែរ។
នៅចំពោះមុខសមត្ថកិច្ចជនសង្ស័យបានសារភាពថា «ខ្លួន និងបក្សពួកម្នាក់ទៀតបានបបួលគ្នាដើរលួ.ចម៉ូតូ លុះដល់ចំណុចស្រែថ្មី ភូមិអូរព្រះ ឃុំអូរកណ្ដៀរសែនជ័យ ស្រុកអូរគ្រៀងសែនជ័យ ពួកគេបានឃើញម៉ូតូជនរងគ្រោះទុកនៅក្រោមផ្ទះ ក៏នាំគ្នាចូលទៅលួ.ចតែម្តង។ ពេលនោះ រូបគេជាអ្នកចូលទៅធ្វើសកម្មភាពកាច់សោ.កម៉ូតូលួ.ចជិះចេញពីក្រោមផ្ទះអ្នកស្រុក។ លុះពេលទៅដល់ចំណុចផ្លូវចូលការដ្ឋានកិនថ្មមួយកន្លែង ពួកគេក៏បានដូរម៉ូតូគ្នាជិះ រួចក៏ទៅមុខផុតបន្តិច រហូតដល់ភូមិអូរគ្រៀង ឃុំអូរគ្រៀង ស្រុកអូរគ្រៀងសែនជ័យ ខេត្តក្រចេះ ក៏ត្រូវសមត្ថកិច្ចតាមចាប់ខ្លួនតែម្ដងទៅ។ ចំណែកបក្សពួកបានជិះម៉ូតូគេចខ្លួនបាត់។
ក្រោយសារភាពរួច ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងខេត្ត ដើម្បីចាត់ការតាមនីតិវិធីនៃច្បាប់៕
ចែករំលែកព័តមាននេះ