ខេត្តបាត់ដំបង ៖ អតីតតាអាចារ្យម្នាក់ត្រូវសត្ថកិច្ចឃាត់ខ្លួន ក្រោយពីរងនូវបណ្ដឹងចោទប្រកាន់ថា បានល្បូងក្មេងស្រីអាយុ១២ឆ្នាំម្នាក់យកទៅរំលោភ តែបែរជាលូកច្របាច់នាងលេងជាល្បែងតណ្ហាឡើងទក់សាច់ដោយសន្យាសូកលុយនាងចំនួន៥០០០រៀល កាលពីវេលាម៉ោង៨យប់ថ្ងៃទី ០២ សីហា នៅក្នុងរោងរង្គាសបច្ច័យមួយកន្លែង នៅក្នុងបរិវេណវត្តមុខរាហ៏ ភូមិមុខរាហ៏ ឃុំមុខរាហ៏ ស្រុករុក្ខគិរី។
របាយការណ៏សមត្ថកិច្ចបានឲ្យដឹងថា ជនសង្ស័យឈ្មោះចិន មាន អាយុ៧១ឆ្នាំ អតីតអាចារ្យវត្តមុខរាហ៏ រីឯក្មេងស្រីរងគ្រោះអាយុ១២ឆ្នាំ ។ របាយការណ៍បានឲ្យដឹងទៀតថា ក្មេងស្រីរងគ្រោះ ត្រូវបានតាចិន មាន លូងលោមនាងយកទៅរំលោភសេពសន្ថវៈ នៅក្នុងរោងរង្គាសបច្ច័យ នៅក្នុងវត្តមុខរាហ៍ ខណៈនៅយប់នោះ មានពុទ្ធបរិស័ទរៀបចំកម្មវិធីបុណ្យដង្ហែទៀនវស្សាចូលក្នុងវត្តនោះ។ ប៉ុន្តែបើតាមសេចក្ដីរាយការណ៍បានបញ្ជាក់ថា «អតីតតាអាចារ្យអាយុ៧១ឆ្នាំរូបនេះ រំលោភមិនបានសម្រេចទេ តែបានធ្វើសកម្មភាពលូកច្របាច់នាងឡើងទក់សាច់គ្មានសល់កន្លែងណាឡើយ ជាថ្នូរនឹងទឹកលុយចំនួន៥០០០រៀល» នេះបើតាមការបំភ្លឺរបស់សមត្ថកិច្ចមូលដ្ឋាន។
លោក ឆែម ឆើត មេប៉ុស្ដិ៍នគរបាលមុខរាហ៏ បានប្រាប់ថា ជនសង្ស័យអាយុ៧១ឆ្នាំ ឈ្មោះ ចិន មាន នេះបច្ចុប្បន្នត្រូវបានគេបញ្ឈប់ពីការងារធ្វើអាចារ្យនៅក្នុងវត្តមខរាហ៏ហើយ ដោយសារភាពមិនស្មោះត្រង់របស់គាត់នៅក្នុងវត្ត តែគាត់ឆ្មក់ចូលវត្តម្ដងម្កាលពេលមានបុណ្យទាន ។ លោកមេប៉ុស្ដ៏បានបញ្ជាក់ថា នៅយប់កើតហេតុ ជាយប់ដែលមានពុទ្ធបរិស័ទរៀបចំពិធីបុណ្យដង្ហែទៀនវស្សា ហើយអតីតតាអាចារ្យរូបនេះក៏បន្លំចូលវត្ត ឆក់ឱកាសប្រព្រឹត្តបទល្មើសទៅលើក្មេងស្រីក្នុងភូមិបែបនេះតែម្ដង។
បើតាមប្រភពព័ត៌មាន ដែលបានស្រង់សំដីក្មេងស្រីរងគ្រោះបានឲ្យដឹងថា លោកតា ចិន មាន បានលូងលោមនាង នាំទៅក្នុងរោងអង្គាសបច្ច័យនៅក្នុងវត្ត ដែលជាកន្លែងស្ងាត់រួចបញ្ចុះបញ្ចូលរួមភេទជាមួយនាង ដោយសន្យាផ្ដល់លុយចំនួន៥០០០រៀល ជាថ្នូរនឹងការមិនទម្លាយរឿងអាស្រូវនេះឲ្យគេដឹង។ ប្រភពបានស្រង់សំដីនាងទៀតថា ពេលនោះ តាចិន មានបានប្រើដៃលូកតាមចំណង់តណ្ហារបស់គាត់ លុះពេលក្រោយបញ្ចប់សកម្មភាព នាងទៅដល់ផ្ទះក៏និយាយរឿងនេះប្រាប់ជីដូននាង ទើបត្រូវជីដូននាងប្ដឹងឲ្យសមត្ថកិច្ចចាត់ការតាអាយុ៧១ឆ្នាំតែម្ដង។
ជុំវិញករណីនេះ បើតាមលោក ឆែម ឆើត នាយប៉ុស្ដិ៍មុខរាហ៍បានបញ្ជាក់ថា ក្រោយប្រព្រឹត្តដ៏ព្រៃផ្សៃទៅលើក្មេងស្រី អតីតតាអាចារ្យវត្តវ័យ៧១ឆ្នាំនេះ មិនបានឲ្យលុយនាងតាមការសន្យាទេ។ មិនតែប៉ុណ្ណោះ ថែមទាំងគំរាមនាងមិនឲ្យទម្លាយរឿងអាស្រូវនេះប្រាប់គេឯងទៀតផង។ ប៉ុន្តែពេលនាងទៅដល់ផ្ទះក៏រាយការណ៍រឿងនេះប្រាប់ជីដូន ទើបជីដូននាងប្ដឹងឲ្យចាប់ខ្លួនអតីតអាចារ្យវត្តកំហូចនេះតែម្ដង។ ពេលនេះមន្ត្រីជំនាញ បាននិងកំពុងសួរនាំ ដើម្បីកសាងសំណុំរឿងបញ្ជូនអតីតអាចារ្យវត្តកំហូចរូបនេះទៅកាន់សាលាដំបូងខេត្តហើយ៕
ចែករំលែកព័តមាននេះ