ខេត្តរតនគិរី ៖ រដ្ឋបាលខេត្តរតនគីរី នាថ្ងៃទី២ ខែសីហា ឆ្នាំ២០២៣នេះ បានចេញសេចក្តីជូនដំណឹងដល់បងប្អូនប្រជាពលរដ្ឋ ឲ្យបានជ្រាបថា យោងតាមសេចក្តីជូនដំណឹងស្ដីពីការព្យាករណ៍អាកាសធាតុរបស់ក្រសួងធនធានទឹក និងឧតុនិយម និងការផ្ដល់ព័ត៌មានពីគណៈកម្មការទន្លេមេគង្គអំពីបរិមាណទឹកភ្លៀង និងធ្លាក់នៅតាមតំបន់ផ្ទៃរងទឹកភ្លៀងរបស់ទន្លេមេគង្គ និងដៃទន្លេនានា ដែលអាចបង្កឲ្យទឹកទន្លេហក់ឡើង ព្រមទាំងស្ថានភាពបច្ចុប្បន្ននៃកម្ពស់ទឹកទន្លេស្រែពក ដោយជិតដល់កម្រិតកម្ពស់ប្រកាសអាសន្ន (១២.៥០ ម៉ែត្រ) និងទន្លេសេសាន (៨.៥០ម៉ែត្រ) ជាហេតុអាចបង្កឱ្យក្លាយជាទឹកជំនន់យ៉ាងរហ័ស។
ដើម្បីបញ្ចៀសនូវការខូចខាត បាត់បង់ និងគ្រោះថ្នាក់ផ្សេងៗ រដ្ឋបាលខេត្តរតនគីរី សូមធ្វើការណែនាំដល់បងប្អូនប្រជាពលរដ្ឋ ជាពិសេសអ្នកដែលរស់នៅតាមបណ្ដោយទន្លេស្រែពក និងទន្លេសេសាន ដូចខាងក្រោម ៖
១- ត្រូវបង្កើនការយកចិត្តទុកដាក់ប្រុងប្រយ័ត្នឱ្យបានខ្ពស់ ទទួលខុសត្រូវក្នុងគ្រួសាររៀងៗខ្លួន ត្រៀមរៀបចំទុកដាក់សម្ភារៈឯកសារសំខាន់ៗ សត្វពាហនៈ និងមធ្យោបាយស្បៀងអាហារ។
២- សាកសួរ និងទំនាក់ទំនងអំពីទីទួលសុវត្ថិភាព ដែលនៅជិតបំផុតជាមួយអាជ្ញាធរមូលដ្ឋាន។
៣- ថែរក្សាទឹកស្អាតទុក និងស្បៀងអាហារនៅកន្លែងដែលមានសុវត្ថិភាព។
៤- ហាមក្មេងៗកុំឲ្យលេងក្បែរទឹក ចៀសវាងករណីលង់ទឹកផ្សេងៗ។
៥- ប្រុងប្រយ័ត្នចំពោះសត្វអសិរពិស ចរន្តអគ្គិសនី និងតំបន់ដែលអាចមានគ្រោះថ្នាក់។
៥- សូមថែរក្សាអ្នកដែលងាយរងគ្រោះ អាចរងផលប៉ះពាល់នៅក្នុងសហគមន៍។
អាស្រ័យហេតុនេះ សូមបងប្អូនប្រជាពលរដ្ឋ ជាពិសេសអ្នកដែលរស់នៅតាមបណ្ដោយទន្លេស្រែពក និងទន្លេសេសាន្ត ទទួលជ្រាបជាព័ត៌មាន និងមានស្មារតីទទួលខុសត្រូវខ្ពស់ យកចិត្តទុកដាក់ ប្រុងប្រយ័ត្នឱ្យបានខ្ពស់ ដើម្បីធានាសុវត្ថិភាព សុខុមាលភាព ចៀសវាងការខូចខាត បាត់បង់ ក៏ដូចជាគ្រោះថ្នាក់ផ្សេងៗផងដែរ៕
ចែករំលែកព័តមាននេះ