ខេត្តរតនគិរី ៖ រថយន្តយីឌុបមួយគ្រឿងដឹកដំឡូងមីចេញពីខេត្តរតនគិរីឆ្ពោះទៅប្រទេសយួនឆ្លងកាត់ច្រកអន្តរជាតិអូរយ៉ាដាវ ដែលសង្ស័យមានបង្កប់ឈើប្រណីតប្រភេទបេង នាងនួន និងគ្រញូង ត្រូវបានកម្លាំងរបស់វរការពារព្រំដែនធ្វើការបង្ក្រាប និងរឹបអូសយកមកប្រគល់ឱ្យមន្ត្រីខណ្ឌរដ្ឋបាលព្រៃឈើឆែកឆេរត្រួតពិនិត្យនៅព្រឹកថ្ងៃទី៩ ឧសភា
ខេត្តរតនគិរី ៖ រថយន្តយីឌុបមួយគ្រឿងដឹកដំឡូងមីចេញពីខេត្តរតនគិរីឆ្ពោះទៅប្រទេសយួនឆ្លងកាត់ច្រកអន្តរជាតិអូរយ៉ាដាវ ដែលសង្ស័យមានបង្កប់ឈើប្រណីតប្រភេទបេង នាងនួន និងគ្រញូង ត្រូវបានកម្លាំងរបស់វរការពារព្រំដែនធ្វើការបង្ក្រាប និងរឹបអូសយកមកប្រគល់ឱ្យមន្ត្រីខណ្ឌរដ្ឋបាលព្រៃឈើឆែកឆេរត្រួតពិនិត្យនៅព្រឹកថ្ងៃទី៩ ឧសភា ឃើញមានឈើប្រណីតប្រភេទគ្រញូងច្រកក្នុងការុងចំនួន៤ការុង និងថូផ្កាប្រភេទឈើធ្នង់ចំនួន៥គូ ។
តាមប្រភពព័ត៌មានបានឱ្យដឹងថា រថយន្តដឹកដំឡូងមីបង្កប់ឈើប្រណីតនេះម៉ាក KIA (កូរ៉េ) ពណ៌ស ក្បាលខៀវ ពាក់ស្លាកលេខភ្នំពេញ 3A-7489 បើកបរដោយឈ្មោះសល់ ភេទប្រុស អាយុ៣០ឆ្នាំ រស់នៅភូមិ២ សង្កាត់ឡាបានសៀក ក្រុងបានលុង ដឹកដំឡូងមីចេញពីឃ្លាំងមួយនៅភូមិតឺន ឃុំតឺន ស្រុកកូនមុំ ដែលមានថៅកែជាជនជាតិយួនឈ្មោះឡឹក ជាអ្នកប្រមូលទិញដើម្បីដឹកជញ្ជូនទៅលក់នៅប្រទេសយួន ។ ប្រភពបានបន្តទៀតថា ឈើប្រណីត និងថូផ្កានេះជារបស់មន្ត្រីយោធានៅស្រុកកូនមុំ ។ បន្ទាប់ពីធ្វើការដឹកជញ្ជូនដោយមានការរត់ការផ្លូវគ្រប់ស្ថាប័នក្នុងតំបន់ឆ្លងកាត់រួចមក លុះទៅដល់មុខទីបញ្ជាការយោធាវរការពារព្រំដែនស្ថិតក្នុងឃុំប៉កញ៉ៃ ស្រុកអូរយ៉ាដាវ ទំនងមិនត្រូវថ្លៃក្នុងការបង់ប្រាក់ ទើបធ្វើការឃាត់ទុកតែម្តង ព្រោះអ្នករត់ការបានប្រាប់ថា មានតែថូផ្កា៥គូប៉ុណ្ណោះ ឯកងកម្លាំងសង្ស័យថា មានឈើប្រណីតប្រភេទគ្រញូងផ្សេងទៀត ព្រោះតាមដំណឹងដែលរាយការណ៍ប្រាប់ថា មានបង្កប់ឈើប្រណីតកន្លះរថយន្តយីឌុប។
កម្លាំងយោធាវរការពារព្រំដែនបានចាប់ឃាត់រថយន្តយីឌុបនោះនៅព្រឹកថ្ងៃទី៨ ឧសភា រក្សាទុកនៅមុខទីបញ្ជាការវរៈអស់រយៈ ពេលមួយថ្ងៃ ទើបរឹបអូសយកមកប្រគល់ឱ្យជំនាញព្រៃឈើនៅព្រឹកថ្ងៃទី៩ ឧសភា ។ ក្រោយពីធ្វើការរុះរើឆែកឆេររួចមកមន្ត្រីជំនាញរដ្ឋបាលព្រៃឈើបានធ្វើការត្រួតពិនិត្យឃើញមានថូផ្កាបង្កប់នៅពីខាងមុខចំនួន៥គូ និងឈើប្រណីតប្រភេទគ្រញូងចំនួន៤ការុង ។ តាមម្ចាស់រថយន្តបានឱ្យដឹងថា ថូផ្កាដែលមានចំនួន៥គូនេះគឺប្រវែង១,៦ម៉ែត្រ ពីរគូ ប្រវែង១,៨ម៉ែត្រ ៣គូ និងឈើគ្រញូងចំនួន១០០គីឡូក្រាម ។ រថយន្តរបស់គាត់ផ្ទុកដំឡូងមីនោះទម្ងន់ចំណុះ៣៥តោន ហើយគាត់ស៊ីឈ្នួលដឹក ពីឃ្លាំងរបស់ «តាហួរ» នៅភូមិតឺន ទៅប្រទេសយួន ក្នុងតម្លៃ៣មឺុនរៀល ក្នុងមួយតោន។
បើតាមប្រភពព័ត៌មានផ្សេងទៀតបានឱ្យដឹងថា រូបភាពដឹកជញ្ជូនបង្កប់ឈើប្រណីតក្នុងដំឡូងមីបែបនេះ គឺតែងមានជាហូរហែហើយក៏មានការបង់ថ្លៃតាមផ្លូវដល់គ្រប់ស្ថាប័នផងដែរ ។ ថ្មីៗនេះក៏មានគ្រឿងសង្ហារិមមួយចំនួនត្រូវបានគេដឹកជញ្ជូនទៅប្រទេសយួនតាមច្រកទ្វារអន្តរជាតិអូរយ៉ាដាវនេះ ដែលសុទ្ធតែជាមន្ត្រីកងកម្លាំងដែលមានស័ក្តិធំៗ។ មិនតែប៉ុណ្ណោះ នៅមានរថយន្តកាមរីដឹកឈើប្រណីតប្រភេទគ្រញូងជាច្រើនគ្រឿងដែលក្នុង១យប់ៗមិនក្រោមពី៨ទៅ១០គ្រឿងឡើយ នាំចេញតាមច្រករបៀងភូមិធិះ ស្ថិតក្នុងឃុំប៉កញ៉ៃ ស្រុកអូរយ៉ាដាវ ។ ការដឹកជញ្ជូននៅពេលយប់គ្មានសមត្ថកិច្ចណាបង្ក្រាបឡើយ ភាគច្រើនដឹកចេញពីស្រុកវើនសៃ និងស្រុកតាវែង ឆ្លងកាត់ក្រុងបានលុងឆ្ពោះទៅប្រទេសយួនតាមផ្លូវជាតិលេខ៧៨A ៕
ចែករំលែកព័តមាននេះ