ប្រជាពលរដ្ឋដែលឈឺបានទទួចសុំឱ្យរដ្ឋាភិបាលអាណត្តិថ្មីជួយគិតគូរដល់សេវាសុខាភិបាលដល់ប្រជាពលរដ្ឋបន្ថែម ពិសេសពួកគាត់ចង់បានការព្យាបាលជំងឺដោយមិនគិតប្រាក់ និងសូមឱ្យគ្រូពេទ្យប្រកាន់ខ្ជាប់ក្រមសីលធម៌វិជ្ជាជីវៈខ្ពស់ ។
លោក សុខា ពលរដ្ឋនៅខេត្តកំពង់ឆ្នាំងបានឡើងបានមកព្យាបាលជំងឺនៅមន្ទីរពេទ្យឯកជនមួយ នៅក្នុងរាជធានីភ្នំពេញជាប្រចាំខែ ។ លោកថា គាត់មានជំងឺបញ្ហាសរសៃឈា.មក្នុងខួរក្បាលដែលត្រូវទទួលការព្យាបាលរយៈពេលយូរ ។ គាត់បានធ្វើដំណើរមកកាន់មន្ទីរពេទ្យ ក្នុងមួយខែម្តង ដើម្បីពិនិត្យសុខភាព និងទទួលថ្នាំយកទៅព្យាបាលជំងឺនៅផ្ទះ ។ លោកសុខា ពោលថា «ខ្ញុំព្យាបាលជំងឺរយៈពេល៣ឆ្នាំហើយ ។ កាលពីដំបូងៗខ្ញុំមកពេទ្យមួយខែពីរដង បន្ទាប់មកមួយខែម្តង ។ ដល់ពេលឥឡូវខ្ញុំមកពេទ្យពីរខែម្តង ដោយសារស្ថានភាពកាន់តែប្រសើរឡើង ។ កាលពីពេលដំឡូងៗខ្ញុំមកពេទ្យម្តងចំណាយពី១០០ទៅ៣០០ដុល្លារ។ ប៉ុន្តែចុងក្រោយនេះចំណាយតែពី២០ទៅ៣០ម៉ឺនរៀលប៉ុណ្ណោះ» ។
នៅក្នុងមន្ទីរពេទ្យឯកជនមួយ ពលរដ្ឋដែលជាអ្នកជំងឺបានឡើងមកពីខេត្តនានាសឹងទូទាំងប្រទេស ។ នៅទីនោះ បន្ទាប់ចូលជួបជាមួយគ្រូពេទ្យហើយ ពួកគាត់តម្រូវឱ្យទៅបង់ប្រាក់ជាមុន ។ ការចំណាយពលរដ្ឋមានផ្សេងៗគ្នា បើត្រឹមតែបើកថ្នាំយកទៅពិសានៅផ្ទះ ពលរដ្ឋ ចំណាយចន្លោះពី២០ម៉ឺនរៀលទៅ៤០ម៉ឺនរៀល ។ ប៉ុន្តែបើត្រូវពិនិត្យបែបវេជ្ជសាស្ត្រដូចជា ថត ឆ្លុះជាដើមនោះត្រូវចំណាយអាចមានច្រើនរយដុល្លារ ។
លោក សុណាត ពលរដ្ឋម្នាក់មកពីខេត្តកំពង់ចាម មានជំងឺក្រពះ ។ លោកត្រូវគ្រូពេទ្យតម្រូវឱ្យសុង ឆ្លុះក្រពះ ក្នុងតម្លៃ១៥០ដុល្លារ ។ «ខ្ញុំត្រៀមថវិកាមកពេទ្យលើកនេះ៣០០ដុល្លារ ។ ខ្ញុំឈឺក្រពះ ដែលមានអាការៈក្តៅក្រហាយទទួលទានមិនចូល ។ ពេទ្យឱ្យខ្ញុំសុងរកមេរោគ និងបារម្ភពីការរលាក ឬដំបៅក្នុងក្រពះ ។ ខ្ញុំឈឺជាង៥ខែមកហើយ»។ បុរសកសិកររូបនេះនិយាយាថា «ខ្ញុំមានជីវភាពក្រីក្រ ប៉ុន្តែឈឺហើយ ប្រពន្ធចេះខំតែប្រមែប្រមូលលុយដែលសន្សំទុកមកចំណាយ ដើម្បីមកពេទ្យនៅភ្នំពេញពីព្រោះព្យាបាលនៅស្រុកកំណើតមិនបានជាស្បើយ សោះ» ។
ទាំងលោកសុខា និងលោក សុណាត ថា មូលហេតុដែលពួកគាត់មកកាន់មន្ទីពេទ្យឯកជនពីព្រោះមន្ទីរពេទ្យឯកជនគេយកចិត្តទុកដាក់ជាងពេទ្យរដ្ឋ ។ អ្នកជំងឺថា ពេទ្យរដ្ឋគ្រូពេទ្យ ច្រើនរុញអ្នកជំងឺពីកន្លែងមួយទៅកន្លែងមួយបង្កការលំបាក ដែលអាចធ្វើឱ្យពួកគាត់យឺតយ៉ាវពេលវេលាក្នុងការព្យាបាលជំងឺ ។ លោកសុខាពោល «ខ្ញុំធ្លាប់ទៅពេទ្យរដ្ឋម្តងគេថតនេះ ម្តងគេថតនោះ ចុងបញ្ចប់គេចេញសំបុត្រឱ្យទិញថ្នាំខាងក្រៅ ។ គ្រាន់តែថតចុះ ថតឡើង អស់លុយជិត២០០ដុល្លារមិនបានអ្វីសោះ» ។
ពលរដ្ឋទាំងពីរខាងលើបានទទូចសុំឱ្យរដ្ឋាភិបាលយកចិត្តទុកដាក់ ពង្រឹងគុណភាពសេវាសុខាភិបាល ដើម្បីពលរដ្ឋកក់ក្តៅ មិនបារម្ភពេលឈឺថ្កាត់ ។ ពលរដ្ឋសូមឱ្យថ្លៃព្យាបាលជំងឺមានភាពសមស្របនឹងសេដ្ឋកិច្ចពលរដ្ឋធ្វើយ៉ាងណាកុំឱ្យនៅពេលពលរដ្ឋមានជំងឺម្តងៗ ត្រូវលក់របររបស់ដូចជា ដីស្រែចម្ការ គោក្របី យកមកព្យាបាលជំងឺនោះ ។
ប៉ុន្តែទោះបីជាយ៉ាងណាក្តី រដ្ឋាភិបាលកន្លងមកបានបង្កើត បេឡាជាតិរបបសន្តិសុខសង្គម ឬហាត់កាត់ ថា ប.ស.ស ដើម្បីជួយដល់ប្រជាជន ហើយ វាក៏គ្របដណ្តប់ផងដែរ ដល់ការថែទាំសុខភាព ។ ដូច្នេះប្រជាជនកម្ពុជាដែលបារម្ភអំពីការចំណាយ សុខភាពអាចពិភាក្សាការចុះឈ្មោះជាមួយស្ថាប័នដែលខ្លួនធ្វើការអោយ ឬក៏ទំនាក់ទំនងទៅកាន់ប.ស.ស ដើម្បីទទួលបានបណ្ណប.ស.ស នេះ ។
រដ្ឋាភិបាលអាណត្តី៧ នឹងបង្កើតនៅក្នុងខែសីហា ឆ្នាំ២០២៣នេះ ក្រោយគណៈកម្មាធិការជាតិរៀបចំការបោះឆ្នោតប្រកាសលទ្ធផលបោះឆ្នោត កាលពីថ្ងៃទី២៣ កក្កដា ជាផ្លូវការ ។ កាលពីថ្ងៃទី២៦ ខែកក្កដា សម្តេចតេជោ ហ៊ុន សែន បានបញ្ជាក់ថា រដ្ឋាភិបាលថ្មី ដែលមាន លោក ហ៊ុន ម៉ាណែត ជានាយករដ្ឋមន្ត្រីនឹងប្រើប្រាស់យុទ្ធសាស្ត្រ បច្ចកោណក្នុងការដឹកនាំប្រទេស ។
សម្តេចតេជោថា យុទ្ធសាស្ត្របច្ចកោណនឹងមានប្រសិទ្ធភាពកាន់តែខ្លាំងជាងយុទ្ធសាស្ត្រចតុកោណ ដែលសម្តេចបានដឹកនាំទៅទៀត ៕ ដោយ សារ៉ាន់
ចែករំលែកព័តមាននេះ