នៅពេលនិយាយទៅដល់ការដង្ហែទីងមោងរបស់អ្នកស្រុកស្អាង អាចនិយាយបានថា នេះគឺជាប្រពៃណីទំនៀមទម្លាប់របស់អ្នកស្រុកនេះទៅហើយ ពោលគឺអោយតែដល់រដូវដង្ហែទៀនព្រះវស្សា គេតែងធ្វើពិធីមួយនេះឡើងជារៀងរាល់ឆ្នាំ។ ហើយកាលពីពេលថ្មីៗនេះ
ខេត្តកណ្តាល ៖ នៅពេលនិយាយទៅដល់ការដង្ហែទីងមោងរបស់អ្នកស្រុកស្អាង អាចនិយាយបានថា នេះគឺជាប្រពៃណីទំនៀមទម្លាប់របស់អ្នកស្រុកនេះទៅហើយ ពោលគឺអោយតែដល់រដូវដង្ហែទៀនព្រះវស្សា គេតែងធ្វើពិធីមួយនេះឡើងជារៀងរាល់ឆ្នាំ។ ហើយកាលពីពេលថ្មីៗនេះ ក៏មានវត្តមួយកន្លែងស្ថិតនៅស្រុកស្អាង នៃខេត្តកណ្តាល ក៏បានធ្វើទីងមោងរូបលោក វណ្ណដា និងរូបផ្សេងៗទៀតនោះ ពោលគឺឃើញថា មានរូបទីមោងបានដង្ហែត្រៀបត្រាតាមដងផ្លូវជាច្រើន ដោយការដង្ហែនេះពិតជាមានភាពអូរអរយ៉ាងក្រៃលែងរបស់អ្នកស្រុកនេះ។
ក្នុងនោះផងដែរ នៅឆ្នាំនេះ អាចនិយាយថា ការដង្ហែខាងលើនេះ ពិតជាធំដុំលើសពីឆ្នាំណាៗទាំងអស់ ដោយកាលពីកន្លងទៅ ពុំសូវមានការហ៊ឹកហាក់ដូច្នេះនោះឡើយ។ ចំណែកមូលហេតុដែលនាំអោយមានការធ្វើរូបទីមោងជារូបលោកវណ្ណដានេះ គឺដោយសារការស្រឡាញ់ ការគាំទ្រតារាចម្រៀងរូបនេះ ដែលតែងតែពាំនាំនូវវប្បធម៌ អរិយធម៌ ក៏ដូចជាអ្វីផ្សេងដែលខ្មែរមានទៅបង្ហាញនៅលើឆាកអន្តរជាតិអោយបរទេសបានឃើញពីវប្បធម៌ និងអរិយធម៌របស់ខ្មែរយើង។
គួរបញ្ជាក់ថា វត្តដែលបានធ្វើរូបលោក វណ្ណដា និងទីមោងជាច្រើននេះឡើង គឺមានឈ្មោះថា «វត្តទឹកវិល» ដែលមានទីតាំងស្ថិតនៅភូមិស្វាយជួរ ឃុំកោះខែល ស្រុកស្អាង ខេត្តកណ្ដាល។ ហើយវត្តមួយនេះ ក៏មានឈ្មោះល្បីល្បាញច្រើនតាមរយៈការធ្វើទីមោងជារៀងរាល់ឆ្នាំផងដែរ ដោយកាលពីឆ្នាំមួយនោះ វត្តនេះល្បីការធ្វើទីមោងយក្ស ឬអ្នកស្រុកស្អាងហៅថា «អ៊ុងឌឿយក្ស»។
តាមរយៈបទសម្ភាសន៍ជាមួយ សារព័ត៌មានកោះសន្តិភាព លោក អាន វិចិត្រ ដែលជាក្រុមការងារវត្តទឹកវិល បានជម្រាបជូនថា ជារៀងរាល់ឆ្នាំ វត្តមួយនេះតែងតែធ្វើទីមោង ដើម្បីហែនៅតាមភូមិ-ស្រុក ពោលគឺដូចជាឆ្នាំនេះអញ្ចឹង គឺមានទីមោងរូបតារាចម្រៀងលោក វណ្ណដា ដោយនេះ ជាការផ្តួចផ្តើមក្រោមយុវជនមួយក្រុម ក៏ដូចវត្តទាំងមូលផងដែរ។ ហើយការដែលធ្វើទីមោងរូបរបស់កំពូលតារាចម្រៀងលោកវណ្ណដានោះ គឺដោយសារការស្រឡាញ់ ការគាំទ្រតារាចម្រៀងរូបនេះ ដែលតែងតែពាំនាំនូវវប្បធម៌ អរិយធម៌ ក៏ដូចជាអ្វីផ្សេងដែលខ្មែរមានអោយបរទេសបានឃើញ។
លោក អាន វិចិត្រ ដែលមានស្រុកកំណើតនៅស្រុកស្អាង ខេត្តកណ្តាល បានបន្តថា ទីមោងសរុបរបស់វត្តទឹកវិល គឺមានចំនួន៣២ទីមោង ដោយគិតជាថវិកាប្រមាណជា២០លានជាង។ ហើយជារៀងរាល់ឆ្នាំ គឺតែងតែចំណាយធ្វើទីមោង១ ឬ២ ដោយក្នុងមួយទីមោង មានតម្លៃ ៦៥០.០០០រៀល។
លោក វិចិត្រ ដែលជាក្រុមការងារវត្តទឹកវិល បានបន្តថា រយៈពេលនៃការដង្ហែមានចំនួន៥ថ្ងៃ ដោយថ្ងៃទី១ បានដង្ហែទៅដល់ស្រុកកោះធំ និងបកដល់វត្តទឹកវិល។ ថ្ងៃទី២ ដង្ហែពីឃុំសត្បូរ ចុះរហូតមកដល់វត្តព្រែកតូច សម្រាប់ថ្ងៃទី៣ ដង្ហែពីវត្តភ្នំទំពែក ឃុំក្រាំងយ៉ូវ រហូតដល់វត្តទឹកវិលវិញ។ លុះថ្ងៃទី៤ ដង្ហែពីគល់ស្ពានកោះអន្លុងចិន រហូតដល់ផ្សារព្រែកឃ្លោក និងថ្ងៃទី៥ ដង្ហែពីវត្តត្រើយស្លា មកវត្តទឹកវិលវិញជាកិច្ចបញ្ចប់ នៅត្រឹមថ្ងៃទី០១ ខែសីហា ឆ្នាំ២០២៣នេះ។
គួរបញ្ជាក់ផងដែរថា វត្តទឹកវិល ដែលស្ថិតនៅស្រុងស្អាង នៃខេត្តកណ្តាលនេះ គឺមានសណ្តាប់ធ្នាប់ល្អ ព្រោះថា ខណៈពេលមានពិធីបុណ្យទានផ្សេងៗ ឃើញថា វត្តទឹកវិលនេះ គឺការរៀបចំបានយ៉ាងល្អ ទាំងបរិស្ថាន ក៏ដូចជាការតុបតែងលំអរដោយផ្កាផ្ញីចម្រុះពណ៌ជាដើម។
ជាចុងក្រោយ លោក អាន វិចិត្រ ជាអ្នកជួយសម្រួលដល់កិច្ចការវត្តទឹកវិល សូមអរគុណដល់អាជ្ញាធរដែនដីគ្រប់ជាន់ថ្នាក់ និងពុទ្ធបរិស័ទ ដែលបានចូលជាបច្ច័យ និងសម្ភារៈផ្សេងៗ ព្រមទាំងការគាំទ្រយ៉ាងច្រើនកុះករនៅវត្តមួយនេះផងដែរ៕ ដោយ ៖ លីហួ គីមឆាយ
ចែករំលែកព័តមាននេះ