ខេត្តសៀមរាប ៖ មនុស្ស៣នាក់បានស្លា.ប់ និងម្នាក់ទៀតរងរបួសធ្ងន់នៅក្នុងឧបទ្ទវហេតុគ្រោះថ្នាក់ចរាចរណ៍រថយន្ដបុកជាមួយម៉ូតូ និងកង់ពីក្រោយ កាលពីព្រឹកថ្ងៃទី១០ ឧសភា នៅលើផ្លូវ ជាតិលេខ៦ ក្នុងស្រុកសូទ្រនិគមចម្ងាយប្រមាណ៣០គីឡូម៉ែត្រភាគខាងកើតក្រុងសៀមរាប។ សមត្ថកិច្ចប៉ូលិសនិយាយថា អ្នកបើកបររថយន្ដត្រូវបានចាប់ខ្លួន
ខេត្តសៀមរាប ៖ មនុស្ស៣នាក់បានស្លាប់ និងម្នាក់ទៀតរងរបួសធ្ងន់នៅក្នុងឧបទ្ទវហេតុគ្រោះថ្នាក់ចរាចរណ៍រថយន្ដបុកជាមួយម៉ូតូ និងកង់ពីក្រោយ កាលពីព្រឹកថ្ងៃទី១០ ឧសភា នៅលើផ្លូវ ជាតិលេខ៦ ក្នុងស្រុកសូទ្រនិគមចម្ងាយប្រមាណ៣០គីឡូម៉ែត្រភាគខាងកើតក្រុងសៀមរាប។ សមត្ថកិច្ចប៉ូលិសនិយាយថា អ្នកបើកបររថយន្ដត្រូវបានចាប់ខ្លួន ខណៈព្យាយាមរត់គេចពីការទទួលខុសត្រូវ ។
អធិការរងប៉ូលិសស្រុកសូទ្រនិគមលោកអនុសេនីយ៍ឯកសួន សារ៉ាំ ទទួលបន្ទុកសណ្ដាប់ធ្នាប់ ដែលទៅធ្វើកំណត់ហេតុនៅកន្លែងកើតហេតុបានប្រាប់ថា គ្រោះថ្នាក់កើតឡើងនៅវេលាម៉ោង៧ និង៣០នាទីព្រឹកថ្ងៃទី១០ ឧសភា ក្នុងភូមិដូនហុង ឃុំដំដែក ស្រុកសូទ្រនិគម បង្កឡើងដោយរថយន្ដម៉ាកហ៊ីយាន់ដាយចំណុះ២តោនកន្លះ ពណ៌ស ពាក់ស្លាកលេខភ្នំពេញ៣B ០៥៩៩ បើកបរដោយឈ្មោះមាំង ម៉េងហ៊ួត ភេទប្រុស អាយុ១៩ឆ្នាំ រស់នៅភូមិព្រៃខ្មែរ ឃុំរលាប្អៀរ ស្រុករលាប្អៀរ ខេត្ដកំពង់ឆ្នាំង ។ រថយន្តបុកម៉ូតូម៉ាកវ៉េវស៊េរី២០០៥ និងកង់ពីក្រោយទាំងកម្រោល ខណៈពេលកំពុងតែធ្វើដំណើរស្របទិសគ្នាពីលិចទៅកើតជាហេតុបណ្ដាលឱ្យជនរងគ្រោះដួលរប៉ាត់រប៉ាយទៅលើដងផ្លូវមុននឹងត្រូវកង់រថយន្ដកិនស្លាប់។
លោកបន្ថែមថា ឧបទ្ទវហេតុនោះបណ្ដាលឱ្យមនុស្សបីនាក់ស្លាប់ ក្នុងនោះម្នាក់ជាកុមារអាយុ ៣ឆ្នាំ និងម្នាក់ទៀតរងរបួសជាទម្ងន់កំពុងទទួលការសង្គ្រោះពីក្រុមគ្រូពេទ្យ ។ ជនរងគ្រោះ១-ឈ្មោះសាត សំអូន ភេទស្រី អាយុ៤៤ឆ្នាំ រស់នៅភូមិថ្លាត ឃុំខ្ជាស់ ស្រុកសូទ្រនិគម «ជាអ្នកជិះកង់» ទី២-ឈ្មោះស្មាន គង់ ភេទស្រី អាយុ៦៧ឆ្នាំ រស់នៅភូមិបល័ង្ក ឃុំលា្វងប្ញស្សី ស្រុកជីក្រែង ខេត្ដសៀមរាប ទី៣-ឈ្មោះឆាត វិស័យ ជាកុមារា អាយុ៣ឆ្នាំ និងទី-៤ឈ្មោះចិន គុន្ធា ភេទស្រី អាយុ២២ឆ្នាំ «ជាអ្នកបើកម៉ូតូ» រស់នៅភូមិបេង ឃុំដានរុន ស្រុកសូទ្រនិគមរងរបួសធ្ងន់ ។
សមត្ថកិច្ចពុំបានបញ្ជាក់ប្រាប់ភ្លាមៗអំពីមូលហេតុនៃគ្រោះថ្នាក់នោះទេ ប៉ុន្ដែបើយោងតាមចម្លើយរបស់អ្នកបើកបរប្រាប់សមត្ថកិច្ចថា រថយន្ដរបស់គេ ព្រមទាំងម៉ូតូវ៉េវ និងកង់របស់ជនរងគ្រោះបានបើកស្របទិសគ្នាពីលិចទៅកើត ។ ពេលដល់ចំណុចកើតហេតុមានរថយន្ដកាមរីឆ្លាមមួយគ្រឿងបើកវ៉ាពីក្រោយ ហើយគេចរថយន្ដធំមួយគ្រឿងដែលបើកបញ្ច្រាសទិសគ្នាបណ្ដាលឱ្យរេចង្កូតមកមុខរថយន្ដរបស់គេ ។ ក្នុងស្ថានភាពបែបនេះ រូបគេបង្ខំចិត្ដងាកចង្កូតចេញបន្ដិច ហើយបុកម៉ូតូជនរងគ្រោះពេញទំហឹងពីក្រោយខ្ទាតទៅបុកកង់មួយគ្រឿងទៀត បណ្ដាលឱ្យមានអ្នកស្លាប់ និងរបួសបែបនេះ។
សមត្ថកិច្ចប៉ូលិសបន្ថែមថា សមត្ថកិច្ចកំពុងតែជម្រុញឱ្យសមាជិកសាច់ញាតិជនរងគ្រោះ ដាក់ពាក្យបណ្ដឹងទាមទារសំណងទៅតាមផ្លូវច្បាប់ ចំណែកអ្នកបើករថយន្ដបង្កហេតុនឹងត្រូវបញ្ចូនទៅកាន់តុលាការ ដើម្បីចាត់ការទៅតាមនីតិវិធី ៕
ចែករំលែកព័តមាននេះ