រាជធានីភ្នំពេញ ៖ សម្រាប់ស្ត្រីដូចគ្នាប្រហែលជាយល់ច្បាស់ណាស់ថា តើនឹងត្រូវឈឺចុកចាប់កម្រិតណា បើជួបនឹងរឿងរ៉ាវស្នេហាបែកបាក់ ហើយតើត្រូវនិយាយបែបណានៅពេលដែលស្ត្រីម្នាក់ជាប្អូនស្រីបង្កើតបានក្លាយជាអ្នកឆក់យកបុរសជាបងថ្លៃពង្រាត់ពីបងស្រីរបស់ខ្លួនឱ្យជួបតែទុក្ខចំបែងនិយាយមិនចេញបង្ហូរទឹកភ្នែកមិនកើត ព្រោះតែរឿងរ៉ាវ
រាជធានីភ្នំពេញ ៖ សម្រាប់ស្ត្រីដូចគ្នាប្រហែលជាយល់ច្បាស់ណាស់ថា តើនឹងត្រូវឈឺចុកចាប់កម្រិតណា បើជួបនឹងរឿងរ៉ាវស្នេហាបែកបាក់ ហើយតើត្រូវនិយាយបែបណានៅពេលដែលស្ត្រីម្នាក់ជាប្អូនស្រីបង្កើតបានក្លាយជាអ្នកឆក់យកបុរសជាបងថ្លៃពង្រាត់ពីបងស្រីរបស់ខ្លួនឱ្យជួបតែទុក្ខចំបែងនិយាយមិនចេញបង្ហូរទឹកភ្នែកមិនកើត ព្រោះតែរឿងរ៉ាវនេះបានធ្វើឱ្យប៉ះពាល់ដល់កិត្តិយសគ្រួសារ ហើយជាការពិតនោះវិប្បដិសារៈ នឹងជេរស្តីមិនខានសម្រាប់ថ្ងៃអនាគត ។
ទាក់ទិនរឿងរ៉ាវក្រឡាប់ចាក់បេះដូងនេះ ការិយាល័យនិពន្ធកោះសន្តិភាពនាព្រឹកថ្ងៃទី១០ ឧសភា បានទទួលទូរស័ព្ទពីស្ត្រីម្នាក់រស់នៅភូមិមានជ័យ សង្កាត់ស្ទឹងមានជ័យ ដែលបានពឹងពាក់សុំឱ្យជួយចុះផ្សាយនៅលើទំព័រសារព័ត៌មានដែលកំពុងមានប្រជាប្រិយភាពនៅក្នុងព្រះរាជាណាចក្រកម្ពុជា អំពីរឿងរ៉ាវស្នេហាដែលស្មានមិនដល់មួយ គឺប្អូនស្រីក្រមុំអាយុ២១ឆ្នាំ លួចមានសហាយស្មន់ជាមួយប្តីរបស់បងស្រីបង្កើតខ្លួនឯង រហូតពង្រត់គ្នាទៅបាត់កាលពីល្ងាចថ្ងៃទី៩ ឧសភា ។
រឿងរ៉ាវស្នេហាត្រីកោណខាងលើនេះ បើតាមប្រភពព័ត៌មានពីស្ត្រីឈ្មោះហាក់ វណ្ណា អាយុ២៨ឆ្នាំ មានមុខរបរជាជាងកាត់ដេរ បានរៀបរាប់ប្រាប់កោះសន្តិភាពថា រូបនាងនិងបុរសឈ្មោះគឹម សាមឿន អាយុ២៩ឆ្នាំ បានស្រឡាញ់គ្នាជាប្តីប្រពន្ធអស់រយៈពេលជាង១០ឆ្នាំ កន្លងមកហើយ តែពេលនេះប្តីរបស់នាងលួចមានសហាយស្មន់ជាមួយប្អូនស្រីបង្កើតរបស់នាងឈ្មោះហាក់ វ៉ាន់ណេត រហូតពួកគេសម្រេចចិត្តពង្រត់គ្នាចេញបាត់ពីផ្ទះចោលរូបនាងឱ្យនៅជាមួយកូនប្រុស២នាក់ ដោយមិនមានការខ្មាសអៀនញាតិក្នុងស្រុកណាម្នាក់ឡើយ ។
បន្ទាប់ពីរឿងអាស្រូវបានកើតឡើងនាងហាក់ វណ្ណា ជាប្រពន្ធ និងជាបងស្រីបានសម្រេចចិត្តទៅប្តឹងអាជ្ញាធរសង្កាត់ស្ទឹងមានជ័យ និងចុះផ្សាយតាមកាសែតកោះសន្តិភាពដើម្បីប្តឹងសុំលែងលះប្តីឱ្យដាច់ស្រេចគ្នា ហើយសំណូមពរសុំឱ្យសមត្ថកិច្ចអ្នកអនុវត្តច្បាប់គ្រប់លំដាប់ថ្នាក់ជួយចាត់ការប្តីឈ្មោះគឹម សាមឿន ទៅតាមច្បាប់ឯកពន្ធភាពផងដែរ ។
នាងហាក់ វណ្ណា បានរៀបរាប់ថា នាងជាកូនច្បងដែលកំព្រាដោយសារឪពុកម្តាយស្លាប់ចោលអស់កាលពីជាង១០ឆ្នាំមុន ហើយរូបនាងជាអ្នកមើលថែរក្សាបីបាច់ចិញ្ចឹមប្អូនៗចំនួន៥នាក់ រាប់ទាំងហាក់ វ៉ាន់ណេត ជាប្អូនស្រីម្នាក់ផងដែរ ។ នាងហាក់ វណ្ណា បានរៀបរាប់ទាំងហួសចិត្តថា ខ្លួនខិតខំប្រឹងប្រែងប្រកបរបរកាត់ដេរយកប្រាក់មកចិញ្ចឹមប្អូនៗតាំងពីឪពុកម្តាយស្លាប់ចោលទៅ ប៉ុន្តែពេលនេះ ប្អូនស្រីរបស់នាងឈ្មោះហាក់ វ៉ាន់ណេត បានសងគុណរូបនាងយ៉ាងចាស់ដៃបំផុត គឺស្រឡាញ់ប្តីរបស់នាងធ្វើឱ្យនាងក្លាយជាស្ត្រីមេម៉ាយ ហើយក្មួយបង្កើតរបស់ឈ្មោះហាក់ វ៉ាន់ណេត ២នាក់ ក្លាយជាកូនកំព្រាឪពុក ។
តាមការរៀបរាប់របស់ស្ត្រីដែលជាម្តាយធំបានឱ្យដឹងថា រឿងរ៉ាវបែកបាក់គ្នារវាងក្មួយៗរបស់គាត់ គឺគាត់បានខិតខំពន្យល់ណែនាំក្មួយស្រីឈ្មោះហាក់ វ៉ាន់ណេត ឱ្យកែប្រែចរិតកសាងខ្លួនរកគូស្រករផ្សេងក្រៅពីឈ្មោះគឹម សាមឿន ជាបងថ្លៃ ដើម្បីទុកឱកាសឱ្យគេប្តូរចិត្តគំនិតមករួមរស់ជាមួយប្រពន្ធកូនក្នុងសុភមង្គលល្អដូចគ្រួសារគេឯងឡើងវិញ ។ ប៉ុន្តែផ្ទុយទៅវិញនាងហាក់ វ៉ាន់ណេត អត់ស្តាប់ដំបូន្មានគាត់ជាម្តាយធំឡើយ ។ ចំពោះបញ្ហានេះ ក្នុងនាមរូបគាត់ជាម្តាយធំសុំមិនធ្វើការស្តីបន្ទោសទៅលើភាគីណាមួយឡើយ ប៉ុន្តែកំហុសវាអាចកើតមានទាំងប្រុសទាំងស្រីគឺឈ្មោះគឹម សាមឿន ដឹងថា ខ្លួនមានប្រពន្ធ កូនហើយម្តេចហ៊ានលួចស្រឡាញ់ប្អូនថ្លៃលួងលោមប្រលោមប្រាណទាល់តែបានហើយពង្រត់គ្នាទៅបាត់ទៀត ។ ចំណែកឯនាងហាក់ វ៉ាន់ណេត ក៏ធ្វើខ្លួនមិនគប្បីដែរ តើខ្វះណាស់ទៅ ឬបុរសដែលអាចធ្វើជាគូគាប់ មិនគួរណាមកបំផ្លាញសុភមង្គលគ្រួសារបងស្រីឯងដោយគ្មានខ្មាសអៀនខ្លួនឯងជាស្រីក្រមុំព្រហ្មចារីបែបនេះឡើយ ។
ជុំវិញរឿងរ៉ាវខាងលើនេះ ស្ត្រីឈ្មោះហាក់ វណ្ណា ជាបងបាននិយាយទាំងក្តីកាត់រំសាយវិបត្តិផ្លូវចិត្តខ្លួនឯងថា នាងសុំជូនពរប្អូនស្រី និងលោកប្តីឱ្យជួបជុំគ្នាប្រកបដោយសេចក្តីសុខចុះ ប៉ុន្តែមិនឱ្យរួចផុតពីសំណាញ់ច្បាប់ទេ ព្រោះនាងចង់ឃើញឈ្មោះគឹម សាមឿន ជាប់គុក តើនាងហាក់ វ៉ាន់ណេត ឈឺចាប់ឬយ៉ាងណា? ។ នាងហាក់ វណ្ណា បាននិយាយបន្តថា ចាប់ពីពេលនេះតទៅនាងសុំឱ្យសមត្ថកិច្ច និងអាជ្ញាធរមូលដ្ឋានជួយចាត់វិធានការលើអតីតប្តី និងប្អូនស្រីរបស់ខ្លួនទៅតាមច្បាប់ នៅពេលពួកគេត្រឡប់ចូលផ្ទះវិញ ។ នាងហាក់ វណ្ណា បាននិយាយថា នាងស្នើសុំឱ្យឈ្មោះគឹម សាមឿន និងឈ្មោះហាក់ វ៉ាន់ណេតចុះចេញតែខ្លួនចុះ ចំណែកទ្រព្យសម្បត្តិនិងផ្ទះសម្បែងគឺរូបនាងទុកចិញ្ចឹមប្អូនតូចៗនិងកូនប្រុសទាំង២នាក់ ។
ជុំវិញរឿងរ៉ាវលើកឡើងខាងលើនេះ កោះសន្តិភាពពុំអាចទំនាក់ទំនងសុំការបំភ្លឺពីឈ្មោះគឹម សាមឿន និងនាងហាក់ វ៉ាន់ណេត បានឡើយ ។ មន្ត្រីអ្នកអនុវត្តច្បាប់បាននិយាយថា ស្ត្រីជាប្រពន្ធស្របច្បាប់អាចដាក់ពាក្យបណ្តឹងទៅសមត្ថកិច្ច ឬសាលាដំបូងដើម្បីឈានទៅអនុវត្តច្បាប់ឯកពន្ធភាពប្រឆាំងទៅនឹងអំពើក្បត់លួចមានសហាយស្មន់ ។
គេមិនទាន់ដឹងថា ស្នេហាខុសតម្រារវាងបងថ្លៃ និងប្អូនថ្លៃស្រីនេះមានឥទ្ធិពលកម្រិតណានោះទេ តែបើជាការពង្រត់គ្នាទៅតាមតែសន្ទុះភ្លើតភ្លើងក្នុងល្បែងស្នេហានោះមិនមានអាយុវែងប៉ុន្មាននោះទេ ហើយដល់ពេលនោះពួកគេពិតជាស្តាយក្រោយ ។ រឿងរ៉ាវប្អូនស្រីដណ្តើមប្តីបងស្រីឯងនេះ បានកើតមាន១គូមកហើយកាលពីខែមុននៅខេត្តព្រះសីហនុ រហូតដល់បុរសជាប្តីហ៊ានវាយដំនាងជាប្រពន្ធបែកមុខបែកមាត់ លុះពេលនាងប្តឹងទៅតុលាការលែងលះគ្នាក៏ស្រាប់តែបុរសជាប្តី និងប្អូនស្រីនោះនាំគ្នាឡើងរថយន្តក្រុងជិះមករាជធានីភ្នំពេញបាត់ស្រមោល ។ រឿងរ៉ាវស្នេហាបញ្ច្រាសស្រកីនោះ មិនគប្បីឈ្លក់វង្វេងទៅតាមកាមារម្មណ៍ដោយមិនគិតពីអនាគតរបស់ខ្លួននោះឡើយ៕
ចែករំលែកព័តមាននេះ