ខេត្តព្រៃវែង ៖ ករណីគ្រោះថ្នាក់ចរាចរណ៍ រវាងម៉ូតូ និងម៉ូតូ ដោយបុរសម្នាក់ រួមនិងក្មេងស្រីម្នាក់ទៀត បើកបរម៉ូតូបត់ឆ្វេងឆ្លងផ្លូវខ្វះការប្រុងប្រយ័ត្ន ក៏ត្រូវម៉ូតូមួយគ្រឿងទៀត បើកបរដោយយុវជនម្នាក់ បុកគ្នា បណ្ដាលឱ្យរងរបួស ទាំងសងខាង ត្រូវបាននគរបាលខេត្តព្រៃវែង ចុះអន្តរាគមន៍ភ្លាមៗ នៅកន្លែងកើតហេតុ និងបញ្ជូនទៅសង្គ្រោះនៅមន្ទីរពេទ្យ ។
ហេតុការណ៍នេះ បានកើតឡើងនៅវេលាម៉ោង០៧ និង០៥នាទីព្រឹកថ្ងៃទី៣១ ខែកក្កដា ឆ្នាំ២០២៣ ស្ថិតលើផ្លូវកៅស៊ូ ៣១៣ ភូមិតាគោក ឃុំស្តៅកោង ស្រុកបាភ្នំ ខេត្តព្រៃវែង ។
ជនរងគ្រោះឈ្មោះ ឌុង ទន់ ភេទប្រុស អាយុ៣៥ឆ្នាំ (រងរបួសធ្ងន់) រស់នៅភូមិតាគោក ឃុំស្តៅកោង ស្រុកបាភ្នំ ខេត្តព្រៃវែង បានបើកបរម៉ូតូម៉ាកហុងដាឌ្រីម ពណ៌ខ្មៅ សេរីឆ្នាំ២០១០ ពាក់ស្លាកលេខ ONG 202 1.210 បើកបរពីកើតទៅលិច រួមដំណើរដោយឈ្មោះ មូល លីដា ភេទស្រី អាយុ ៦ឆ្នាំ (របួសស្រាល) រស់នៅភូមិតាគោក ឃុំស្តៅកោង ស្រុកបាភ្នំ ខេត្តព្រៃវែង លុះមកដល់ចំណុចកើតហេតុ បានបត់ឆ្វេងឆ្លងផ្លូវខ្វះការប្រុងប្រយ័ត្ន ក៏ត្រូវម៉ូតូមួយគ្រឿងទៀត ដែលជិះបញ្ច្រាសទិសគ្នា ម៉ាកហុងដាឌ្រីម ពណ៌ក្រហម សេរីឆ្នាំ២០២២ ពាក់ស្លាកលេខ ព្រៃវែង 1I-7412 បើកបរពីលិចទៅកើត បើកបរដោយឈ្មោះ ធី ថេន ភេទប្រុស អាយុ ១៧ឆ្នាំ (រងរបួសធ្ងន់) រស់នៅភូមិចាន់រ៉ា ឃុំស្តៅកោង ស្រុកបាភ្នំ ខេត្តព្រៃវែង ។
បច្ចុប្បន្ន អ្នករងរបួសទាំងអស់ ត្រូវបានបញ្ជូនមកព្យាបាលនៅមន្ទីរបង្អែកខេត្តព្រៃវែង ចំណែកវត្ថុតាងម៉ូតូទាំង២គ្រឿង ត្រូវបានយកមករក្សាទុកនៅប៉ុស្តិ៍នគរបាលរដ្ឋបាលស្ដៅកោង ដើម្បីដោះស្រាយគ្នា ពេលក្រោយ ៕
ចែករំលែកព័តមាននេះ