ជំនន់ទឹកភ្លៀង ជន់លិចលើកំណាត់ផ្លូវជាតិលេខ៤៣ និងផ្លូវខេត្តលេខ១៣២ ក្នុងខេត្តកំពង់ស្ពឺ
ខេត្តកំពង់ស្ពឺ ៖ លោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ បានដឹកនាំក្រុមការងារជំនាញ នៃមន្ទីរធនធានទឹក មន្ទីរសាធារណការ…
ខេត្តកំពង់ស្ពឺ ៖ លោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ បានដឹកនាំក្រុមការងារជំនាញ នៃមន្ទីរធនធានទឹក មន្ទីរសាធារណការ និងដឹកជញ្ជូន មន្ទីរកសិកម្មរុក្ខាប្រមាញ់ និងនេសាទខេត្ត ព្រមទាំងអាជ្ញាធរដែនដីជាច្រើនរូបទៀត ចុះពិនិត្យមើលស្ថានភាពផ្លូវ ក្នុងទំនប់មួយចំនួនដែលជនលិចដោយជំនន់ទឹកភ្លៀងរយៈពេលពីរថ្ងៃ ជាបន្តបន្ទាប់ក្នុងភូមិសាស្ត្រខេត្តកំពង់ស្ពឺ ។
ក្នុងនោះ អាជ្ញាធរបានផ្អាកការធ្វើដំណើរ នៅលើផ្លូវមួយចំនួន នៅតាមបណ្ដោយខ្នងទំនប់សំខាន់ៗ ក្នុងនោះមានទំនប់អូរកូនក្រុំ ស្ថិតនៅក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ បានផ្អាកការធ្វើដំណើររបស់បងប្អូនប្រជាពលរដ្ឋក្នុងភូមិច្រកព្រាល ភូមិអូរត្រុំ ដោយភ្លៀងធ្លាក់ជាបន្តបន្ទាប់ ដែលបណ្ដាលឲ្យមានការហូរដាច់ច្រោះ និងមិនអាចធ្វើដំណើរបាន ។
អាជ្ញាធរក៏បានគិតគូរពីសុខទុក្ខ និងសុវត្ថិភាពជូនបងប្អូនប្រជាពលរដ្ឋ ក៏ដូចជាបញ្ចៀសការធ្វើដំណើរតាមផ្លូវផ្សេងៗទៀត ហើយបានផ្អាកការធ្វើចរាចរជាបណ្តោះអាសន្ន កំណាត់ផ្លូវជាតិលេខ៤៣ និងផ្លូវខេត្តលេខ១៣២ បន្ទាប់ពីមានការវាយប្រហារដោយជំនន់ទឹកភ្លៀង ដាច់ជាច្រើនកន្លែង កាលពីម្សិលមិញនេះផងដែរ ៕
ចែករំលែកព័តមាននេះ