ខេត្តមណ្ឌលគិរី ៖ មិនខុសពាក្យថា លួចគេបានវាគ្រាន់ តែបើម្ចាស់គេទាន់វាពិតជាទ្រោមខ្លួន ដូចជាករណីមួយនេះ កើតឡើងកាលពីវេលាម៉ោង៣ និង៥០នាទីទៀបភ្លឺថ្ងៃទី២៧ ខែកក្កដា ឆ្នាំ២០២៣…
ខេត្តមណ្ឌលគិរី ៖ មិនខុសពាក្យថា លួចគេបានវាគ្រាន់ តែបើម្ចាស់គេទាន់វាពិតជាទ្រោមខ្លួន
ដូចជាករណីមួយនេះ កើតឡើងកាលពីវេលាម៉ោង៣ និង៥០នាទីទៀបភ្លឺថ្ងៃទី២៧ ខែកក្កដា ឆ្នាំ២០២៣ នៅចំណុចភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី មានករណីចោរកម្ម បង្កឡើងដោយជនមិនស្គាល់អត្តសញ្ញាណម្នាក់ បានលួចយកម៉ូតូរបស់ប្រជាពលរដ្ឋជិះចេញទៅបាត់ ។ ប៉ុន្តែបានប៉ុន្មាននាទីក្រោយមក ជនសង្ស័យដែលលួចម៉ូតូនោះ ត្រូវបានកម្លាំងសមត្ថកិច្ចនគរបាលមូលដ្ឋានតាមប្រមាញ់ និងចាប់ខ្លួន រួមទាំងដកហូតម៉ូតូរបស់ជនរងគ្រោះមកវិញផងដែរ ។
ជនសង្ស័យខាងលើ មានឈ្មោះ សំ ចំរើនផល ភេទប្រុស អាយុ៤២ មុខរបរមិនពិតប្រាកដ រស់នៅភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ។ សូមជម្រាបថា នៅវេលាម៉ោងខាងលើនោះសមត្ថកិច្ចនគរបាលបានទទួលបណ្តឹងពីជនរងគ្រោះផ្ទាល់មាត់តាមរយៈលេខទូរស័ព្ទមួយខ្សែថា មានករណីចោរលួចម៉ូតូចេញពីក្រោមផ្ទះរបស់គាត់ នៅភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ។
នៅពេលទទួលបានបណ្តឹងផ្ទាល់នោះភ្លាម កម្លាំងប៉ុស្តិ៍នគរបាលស្រែខ្ទុម និងកម្លាំងអធិការដ្ឋាននគរបាលស្រុកកែវសីមា បានសហការជាមួយកម្លាំងប៉ុស្តិ៍នគរបាលរដ្ឋបាលស្រែព្រះ ធ្វើការកំណត់មុខសញ្ញាដើម្បីស្វែងរកចាប់ខ្លួន ពេលនោះក៏ប្រទះឃើញជនសងកំពង់ជិះម៉ូតូតាមផ្លូវ កម្លាំងសមត្ថកិច្ចក៏បានជិះដេញតាមពីក្រោយ លុះដល់ចំណុចចំការកៅស៊ូក្រុមហ៊ុនមួយ ស្ថិតក្នុងភូមិត្រពាំងផ្អេ ឃុំស្រែខ្ទុម ស្រុកកែវសីមា ខេត្តមណ្ឌលគិរី សមត្ថកិច្ចក៏បានស្នើសុំការសហការពីមេការក្រុមហ៊ុន និងសន្តិសុខការពារក្រុមហ៊ុន រួមទាំងកម្មករដើម្បីជួយឃាត់ខ្លួនចោរលួចម៉ូតូនោះ ។
ខណៈពេលមហាជនបានឃាត់ខ្លួនចោរនោះភ្លាម ពួកគាត់បានស្វាគមន៍ម្នាក់មួយដៃម្នាក់មួយជើង
បណ្តាលឲ្យជនសង្ស័យទ្រោមខ្លួន រួចសមត្ថកិច្ចក៏បាននាំយកជនសង្ស័យចេញផុតទៅ ។ ជនសង្ស័យត្រូវបានសមត្ថកិច្ចកសាងសុំណុំរឿងបញ្ចូនទៅសាលាដំបូងខេត្តតាមនីតិវិធី ចំណែកម៉ូតូប្រគល់ជូនទៅម្ចាស់ដើមវិញ ។
គួររំលឹកទៀតថា ជនសង្ស័យរូបនេះធ្លាប់ជាប់ពន្ធនាគារដែលនិងទើបតែមានសេរីភាពវិញ មិនទាំងទាន់បានប៉ុន្មានខែផង បានធ្វើសកម្មភាពលួចម៉ូតូប្រជាពលរដ្ឋបន្តទៀត។ ជនសង្ស័យបានជាប់ពន្ធនាគាររយៈពេល១ឆ្នាំកន្លះកន្លងទៅក្នុងករណីហឹង្សាក្នុងគ្រួសារ រួមទាំងបានយកកាំបិតកាប់លោកនាយប៉ុស្តិ៍ស្រែខ្ទុមអោយរងរបួសដៃម្ខាងទៀតផងនាពេលនោះ ។
ចែករំលែកព័តមាននេះ