ខេត្តបាត់ដំបង ៖ អំពូលភ្លើងពណ៌ដែលអាជ្ញាធររៀបចំបំពាក់ ដើម្បីលំអជុំវិញខឿន «វិមានឯករាជ្យ» ដែលកំពុងសាងសង់នៅក្នុងក្រុងបាត់ដំបង ស្រាប់តែត្រូវជនមិនស្គាល់អត្តសញ្ញាណលួចវាយកំទេចចោលអស់គ្មានសល់ ដែលគេប៉ាន់ស្មានអាចកើតឡើងវេលារំលងអធ្រាត្រ ឈានចូលថ្ងៃទី២៥ កក្កដា…
ខេត្តបាត់ដំបង ៖ អំពូលភ្លើងពណ៌ដែលអាជ្ញាធររៀបចំបំពាក់ ដើម្បីលំអជុំវិញខឿន «វិមានឯក
រាជ្យ» ដែលកំពុងសាងសង់នៅក្នុងក្រុងបាត់ដំបង ស្រាប់តែត្រូវជនមិនស្គាល់អត្តសញ្ញាណលួចវាយកំទេចចោលអស់គ្មានសល់ ដែលគេប៉ាន់ស្មានអាចកើតឡើងវេលារំលងអធ្រាត្រ ឈានចូលថ្ងៃទី២៥ កក្កដា ខណៈដែលក្រុមជាងកំពុងដំណើរការនៅឡើយ ។
ប្រភពពីក្រុមជាងបានឲ្យដឹងថា អំពូលភ្លើងពណ៌យ៉ាងតិច៤០គ្រាប់ ត្រូវជនមិនស្គាល់មុខវាយកំទេចចោលគ្មានសល់។ អំពូលភ្លើងទាំងនោះបានបំពាក់នៅជុំវិញខឿនផ្នែកខាងក្រោម នៃតួវិមានឯករាជ្យទាំងមូល តែមិនទាន់រួចរាល់ផង ក៏ត្រូវគេវាយបំផ្លាញចោលអស់ទៅហើយ។ បើតាមការពិនិត្យជាក់ស្ដែង អំពូលភ្លើងទាំងនោះត្រូវបានបំពាក់ជុំវិញតួវិមានឯករាជ្យ ។ ជាប្រភេទអំពូលភ្លើងចម្រុះពណ៌ សម្រាប់បំភ្លឺលំអពេលរាត្រី ហើយត្រូវបានគេវាយកំទេចស្ទើរអស់ទាំងស្រុង បន្សល់ទុកតែខ្សែភ្លើងត្រឹមអិដ្ឋការ៉ូ ។
ពុំមានសាក្សីណាម្នាក់បានប្រទះឃើញហេតុការណ៍នេះផ្ទាល់ទេ ហើយក៏ពុំដែលឃើញមានសមត្ថកិច្ចចុះយាមល្បាតពេលយប់នៅម្ដុំសួននាគបាញ់ទឹកខាងលើនេះដែរ ។ ប៉ុន្តែមានប្រភពខ្លះបានដាក់ការសង្ស័យថា ជនដែលវាយបំផ្លាញអំពូលភ្លើងនៅវិមានឯករាជ្យនេះ អាចជាពួកជនអន្ធពាលដែលដើរលេងពេលយប់ ឬអាចជាពពួកប្រើប្រាស់ថ្នាំញៀនផងក៏ថាបាន ។
អភិបាលក្រុងបាត់ដំបង លោក លាង វាសនា បានឆ្លើយបំភ្លឺហាក់មិនច្បាស់លាស់អំពីករណីវាយបំភ្លេចបំផ្លញសម្បត្តិសាធារណៈខាងលើនេះ។ សូម្បីតែអំពូលដែលត្រូវជនអគតិវាយបំផ្លាញចោលអស់ប៉ុន្មានក៏លោកមិនដឹងដែរ នៅពេលសួរនាំអំពីចំនួនអំពូលដែលខូចខាត (បានន័យថា លោកមិនបានចុះពិនិត្យ) ហើយជម្រុញឲ្យសួរនាំទៅលោកអធិការក្រុងវិញ ។
លោក លាង វាសនា បានបំភ្លឺប្រាប់កោះសន្តិភាព តាមទូរស័ព្ទនៅព្រឹកថ្ងៃទី ២៦ កក្កដា យ៉ាងដូច្នេះថា «ខ្ញុំមិនទាន់ច្បាស់ទេ ពីចំនួនអំពូលដែលខូចខាត បងសួរទៅលោកអធិការក្រុងទើបដឹង ព្រោះខាងសមត្ថកិច្ចបានចុះទៅពិនិត្យផ្ទាល់» ។ តើរហូតដល់ពេលនេះ លោកអភិបាល បានស្រាវជ្រាវដឹងពីមុខសញ្ញាជនសង្ស័យហើយឬនៅ ? លោកអភិបាលក្រុងរូបនេះ បានបញ្ជាក់ថា «ជនប្រព្រឹត្តអាចជាពួកជនអនាថា ដែលតែងដើរពេលយប់ ។ កន្លងមក ក្រុមនេះតែងដើរវាយបំផ្លាញមិនសល់អីទេ ។ ពេលនេះ អាជ្ញាធរនិងសមត្ថកិច្ចកំពុងតាមស្វែងរកពួកជនអនាថាទាំងនោះហើយ» ។
ដោយឡែក លោក ពេជ្រ សារ៉ែន អធិការក្រុងបាត់ដំបង ក៏បានយល់ឃើញដូចលោកអភិបាលក្រុងដែរ ចំពោះជនដៃដល់។ លោកបានចង្អុលចំៗ ទៅលើជនអនាថា ជាអ្នកវាយកំទេចអំពូលភ្លើងខាងលើនេះ តែលោកអធិការបានរាយការណ៍ផ្ទុយពីសេចក្ដីរាយការណ៍របស់ជាងបំពាក់អំពូលភ្លើង ។ លោកអធិការបានប្រាប់ថា បើតាមលោកចុះពិនិត្យ និងបានរាប់អំពូលផ្ទាល់ ដែលខូចខាតមានចំនួន៣៦អំពូល ផ្ទុយពីជាងដែលអះអាងថា បែកអស់ប្រមាណ៤០អំពូល ។
លោក ពេជ្រ សារ៉ែន បានបញ្ជាក់ថា ពេលនេះ លោកកំពុងតាមរកមុខសញ្ញជនដៃដល់ ដែលលោកកំណត់ថា ជាជនអនាថា ជាអ្នកវាយកំទេចអំពូលភ្លើងនៅវិមានឯករាជ្យនេះ។ គេកត់សម្គាល់ថា កន្លងមក នៅក្នុងក្រុងបាត់ដំបង សំបូរទៅដោយក្រុមចោរលួចកាត់ខ្សែភ្លើងនៅពេលយប់ ។ សមត្ថកិច្ចហាក់មិនសូវអើពើទេ នៅពេលបទល្មើសកំប៉ិកកំប៉ុកបែបនេះ កើតឡើងចំលើប្រជាពលរដ្ឋ ។
មិនត្រឹមមិនអើពើប៉ុណ្ណោះទេ សមត្ថកិច្ចថែមទាំងស្ដីបន្ទោសទៅលើអ្នករាយការណ៍ទៀតផង ដែលគេចាត់ទុកជារឿងតូចតាច ជាការរំខានចំពេលសមត្ថកិច្ចកំពុងផឹកស៊ីសប្បាយ ។ ប៉ុន្តែក្រោយពីមានក្រុមចោរលួចកាត់យកខ្សែភ្លើងអស់រាប់រយម៉ែត្រ នៅម្ដុំវេទិកាបុណ្យអុំទូកមាត់ស្ទឹងសង្កែ ទើបផ្ទុះប្រតិកម្មខ្លាំងពីលោកអភិបាលខេត្ត រហូតចេញបញ្ជាយ៉ាងតន់ហន់ដល់សមត្ថកិច្ចទាំងកម្លាំងកងរាជអាវុធហត្ថ ទាំងកម្លាំងនគរបាល ឲ្យតាមចាប់ជនដៃដល់ឲ្យខាងតែបាន ។
លោក សុខ លូ បានប្រតិកម្មយ៉ាងខ្លាំងចំពោះការបាត់បង់ខ្សែភ្លើងនៅវេទិកាបុណ្យអុំទូកនេះ។ លោក បានស្ដីបន្តោសយ៉ាងចាស់ដៃទៅលើកម្លាំងសមត្ថកិច្ច រហូតលោកព្រលយពាក្យថា «ប៉េអឹមក្រុង ប៉ូលិសក្រុង មិនដឹងធ្វើអីទេរាល់ថ្ងៃនេះ បានជាចោរលួចកាត់ខ្សែភ្លើងកណ្ដាលក្រុងមិនដឹង។ តិចទៀតចោរចូលលួចកាត់ដល់តាមមន្ទីររដ្ឋហើយមើលទៅ»។ ជាមួយនឹងការស្ដីបន្ទោសរបស់លោកចៅហ្វាយខេត្តខាងលើនេះ ប៉ុន្មានថ្ងៃក្រោយ គេឃើញស្នងការខេត្ត លោកសាត គឹមសាន បានកោះប្រជុំមន្ត្រីក្រោយឱវាទ ស្រែកបន្ទរតាមលោកអភិបាលខេត្ត ដោយបញ្ជាឲ្យលោកអធិការតាមបណ្ដាស្រុក និងក្រុង ត្រូវរៀបចំប៉ុស្ដិ៍ប្រជាការពារនៅតាមមូលដ្ឋានរបស់ខ្លួនឡើងវិញ ហើយត្រូវឲ្យមានកម្លាំងសមត្ថកិច្ចសហការជាមួយកម្លាំងប្រជាការពារភូមិ យាមប្រចាំការគ្រប់ពេលទៀតផង ។
ប៉ុន្តែផែនការដូចផែនស្ករនេះ ត្រូវគេកត់សម្គាល់ឃើញថា «អនុវត្តបានត្រឹមតែមួយដង្ហើមចង្រិតប៉ុណ្ណោះ ក៏រលាយសាបសូន្យបាត់ទៅវិញ រហូតដល់សព្វថ្ងៃនេះ»។ បច្ចុប្បន្ន គេឃើញសមត្ថកិច្ចមួយចំនួនកំពុងសកម្មខ្លាំងសម្បើមណាស់ ក្នុងរឿងបង្កើត«ល្បែងស៊ីសងខុសច្បាប់» ហាក់លែងគិតរវីរវល់ពីបញ្ហាសន្តិសុខ ដែលកើតឡើងនៅក្នុងមូលដ្ឋានអស់ទៅហើយ ។ មន្ត្រីមួយចំនួន កំពុងតាំងខ្លួនជាសមត្ថកិច្ចបង្ក្រាបបទល្មើសផង តាំងខ្លួនជាអ្នកបង្កើតបទល្មើសផង ។
ជាពិសេស កំពុងក្លាយខ្លួនជាមេបនល្បែងស៊ីសងខុសច្បាប់យ៉ាងចំហតែម្ដង។ គេសង្កេតឃើញ មន្ត្រីទាំងនេះ បាននិងកំពុងពង្រីកទីតាំងល្បែងរបស់ខ្លួនស្ទើរគ្រប់កន្លែង ចាប់ពីក្នុងក្រុងបាត់ដំបង រហូតដល់តាមបណ្ដាស្រុកនានា។ ល្បែងដែលមន្ត្រីខិលខូចកំពុងពង្រីកទីតាំងនេះ គឺ «ល្បែងឆ្នោត និង ល្បែងអនឡាញ» ពេលនេះ ពួកគេកំពុងមមារញឹកខ្លាំងណាស់ គ្មានស្ថាប័នណាចេញមុខបង្ក្រាបទេ ព្រោះនៅពីក្រោយនៃបនល្បែងសុទ្ធសឹងជាសមត្ថកិច្ច ។
ចែករំលែកព័តមាននេះ