នាយករដ្ឋមន្ត្រីប៉ាគីស្ថាន លោកយូស៊ូហ្វ រ៉ាហ្សាហ្គីឡានី កាលពីថ្ងៃទី៩ ឧសភា កន្លងមក បានថ្លែងប្រាប់សភាថា ការស៊ើបអង្កេតកម្រិតខ្ពស់មួយត្រូវបានលោកបញ្ជាឱ្យធ្វើឡើងលើការស្នាក់នៅរបស់មេដឹកនាំបណ្តាញភេរវកម្មអាល់កៃដា អូសាម៉ា ប៊ីនឡាដេន នៅតំបន់ Abbotta-baol ភាគពាយ័ព្យប្រទេស ។ ដោយធ្វើសេចក្តីថ្លែងការណ៍ស្តីអំពីប្រតិបត្តិការរបស់កងកុំម៉ង់ដូពិសេសអាមេរិក ដែលបានសម្លាប់ប៊ីនឡាដេន លោកហ្គីឡានី បានសារភាពពីបរាជ័យរបស់ភ្នាក់ងារចារកម្មប៉ាគីស្ថានដែលមិនអាចរកឃើញប៊ីនឡាដេននៅក្នុងប្រទេសរបស់ខ្លួន។
កងកុំម៉ង់ដូពិសេសអាមេរិកបានបើកការវាយឆ្មក់លើមូលដ្ឋានមួយនៅតំបន់ Abbotta-baol ក្បែងទីក្រុងអុីស្លាម៉ាបាដ រដ្ឋធានីប៉ាគីស្ថាន កាលពីដើមខែឧសភា កន្លងមក ដោយបានបាញ់សម្លាប់ប្រមុខអាល់កៃដា អូសាម៉ា ប៊ីនឡាដេន កូនប្រុសម្នាក់របស់ប៊ីនឡាដេន និងបុរស២នាក់ទៀត ។
លោកនាយករដ្ឋមន្ត្រីហ្គីឡានី ថ្លែងថា ការស៊ើបអង្កេតលើវត្តមានរបស់ប៊ីនឡាដេន ត្រូវបានលោកបញ្ជាឱ្យធ្វើដោយប្រមុខយោធាប៉ាគីស្ថានឧត្តមសេនីយ៍ Javed Iqbal ។ លោកហ្គីឡានី ថ្លែងថា ការចោទប្រកាន់លើប៉ាគីស្ថានថា ឃុបឃិតជាមួយប៊ីនឡាដេន នោះជារឿងមិនសមហេតុផលឡើយ ដូច្នេះយើងសូមច្រានចោលការចោទប្រកាន់នេះ ។ លោកនាយករដ្ឋមន្ត្រីថ្លែងទៀតថា បញ្ហាពីកន្លែងលាក់ខ្លួនរបស់ប៊ីនឡាដេន ត្រូវការចម្លើយសមហេតុសមផល។
នាយករដ្ឋមន្ត្រីប៉ាគីស្ថានបានបញ្ជាឱ្យបើកការស៊ើបអង្កេតពីកន្លែងលាក់ខ្លួនរបស់ប៊ីនឡាដេន ក្នុងប្រទេសខ្លួន ក្រោយពីមានការអំពាវនាវពីសហរដ្ឋអាេមរិក ៕
ចែករំលែកព័តមាននេះ