យោងតាមសេចក្តីប្រកាសមួយរបស់សហភាពអឺរ៉ុបថា ទណ្ឌកម្មនានាប្រឆាំងអ្នកទទួលខុសត្រូវស៊ីរី១៣រូប និងការហ៊ុមព័ទ្ធអាវុធត្រូវបានអនុម័តជាផ្លូវការកាលពីថ្ងៃទី៩ ឧសភា ដោយសហភាពអឺរ៉ុប ហើយនឹងចូលជាធរមានចាប់ពីថ្ងៃទី១០ ឧសភា ទៅយោងតាមការសំរេចចិត្តប្រកាន់យកកាលពីថ្ងៃទី៦ ឧសភា កន្លងមកនេះ។ ក្រុមប្រឹក្សាអឺរ៉ុបបានអនុម័តសេចក្តីសំរេចចិត្តមួយដែលដាក់ការហ៊ុមព័ទ្ធលើការនាំចេញឆ្ពោះមកកាន់ប្រទេសស៊ីរីនូវអាវុធ និងសម្ភារដែលអាចប្រើប្រាស់សំរាប់បង្ក្រាបប្រឆាំងនឹងប្រជាជន ព្រមទាំងហាមឃាត់ការផ្តល់ទិដ្ឋាការនិងការផ្អឹបទុកទ្រព្យសម្បត្តិ។ ឈ្មោះឥស្សរជនស៊ីរី១៣រូបដែលទទួលរងការដាក់ទណ្ឌកម្មនេះត្រូវបានគេចាត់ទុកថា ជាអ្នកទទួលខុសត្រូវលើការបង្ក្រាបដោយហិង្សាប្រឆាំងប្រជាជន ក៏ប៉ុន្តែលោកប្រធានាធិបតីបាចារ អាល់អាសាដ ត្រូវគេចផុតពីវិធានការទាំងនេះ ព្រោះកាលពីថ្ងៃទី៦ ឧសភា កន្លងមកនេះបណ្តាឯកអគ្គរដ្ឋទូតរបស់ប្រទេសទាំង២៧ជាសមាជិករបស់សហភាពអឺរ៉ុបបានព្រមព្រៀងគ្នាកុំឱ្យដាក់ទណ្ឌកម្មក្នុងពេលភ្លាមៗប្រឆាំងប្រធានាធិបតីស៊ីរីដែលផ្ទុយពីយោបល់របស់ប្រទេសមួយចំនួន។
ចាប់តាំងពី២ខែមកហើយបាតុកម្មបានកើតមានស្ទើររាល់ថ្ងៃប្រឆាំងនឹងរបបរបស់លោកប្រធានាធិបតីបាចារអាល់អាសាដ ដែលញាំុងឱ្យមានការបង្ក្រាបបង្ហូរឈាមមួយ ជាពិសេសនៅក្រុង BANIAS ភាគពាយ័ព្យប្រទេសក្នុងខេត្ត DERAA និងនៅក្រុង HOMS ភាគកណ្តាល។ យោងតាមអង្គការការពារសិទ្ធិមនុស្សទាំងឡាយថា មនុស្សរវាងពី៦០០ទៅ៧០០នាក់បានត្រូវស្លាប់ ហើយមនុស្សយ៉ាងតិច៨.០០០នាក់ត្រូវចាប់ខ្លួនតាំងពីចាប់ផ្តើមចលនាតវ៉ាមក៕
ចែករំលែកព័តមាននេះ