ជំនួបពិភាក្សាត្រីភាគីរវាងប្រមុខការទូតកម្ពុជា លោកឧបនាយករដ្ឋមន្ត្រីហោ ណាំហុង ជាមួយប្រមុខការទូតថៃ លោកកាស៊ីត ភិរម្យ និងប្រមុខការទូតឥណ្ឌូណេស៊ី លោកម៉ាទី ណាតាឡេហ្គាវ៉ា ត្រូវបានរៀបចំឡើងជាលើកទី២ នៅក្នុងទីក្រុងហ្សាការតា រដ្ឋធានីសាធារណរដ្ឋឥណ្ឌូណេស៊ី កាលពីថ្ងៃទី៩ ឧសភា កន្លងមក ដោយធ្វើរយៈពេលជាង២ម៉ោង
ជំនួបពិភាក្សាត្រីភាគីរវាងប្រមុខការទូតកម្ពុជា លោកឧបនាយករដ្ឋមន្ត្រីហោ ណាំហុង ជាមួយប្រមុខការទូតថៃ លោកកាស៊ីត ភិរម្យ និងប្រមុខការទូតឥណ្ឌូណេស៊ី លោកម៉ាទី ណាតាឡេហ្គាវ៉ា ត្រូវបានរៀបចំឡើងជាលើកទី២ នៅក្នុងទីក្រុងហ្សាការតា រដ្ឋធានីសាធារណរដ្ឋឥណ្ឌូណេស៊ី កាលពីថ្ងៃទី៩ ឧសភា កន្លងមក ដោយធ្វើរយៈពេលជាង២ម៉ោង ។ ជំនួបពិភាក្សានេះធ្វើឡើងក្រោយពីជំនួបពិភាក្សាត្រីភាគីក្រៅផ្លូវការលើកទី២ រវាងសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមួយលោកអាប់ភីស៊ីត វ៉េចាជីវ៉ា នាយករដ្ឋមន្ត្រីថៃ និងប្រធានាធិបតីឥណ្ឌូណេស៊ី លោកបណ្ឌិតស៊ូស៊ីឡូ បាំបាងយូដូយ៉ូណូ ដែលរៀបចំឡើងនៅក្រៅកិច្ចប្រជុំកំពូលអាស៊ានលើកទី១៨ ដែលមិនទទួលបានលទ្ធផលអ្វីគឺមិនអាចស្វែងរកដំណោះស្រាយជម្លោះបច្ចុប្បន្នរវាងប្រទេសទាំងពីរ។
សូមរំឭកឡើងវិញថា ជំនួបពិភាក្សាត្រីភាគីលើកទី២ រវាងសម្តេចតេជោហ៊ុន សែន ជាមួយលោកអាប់ភីស៊ីត និងលោកបណ្ឌិតយូដូយ៉ូណូ ធ្វើឡើងនៅមុនពេលបញ្ចប់កិច្ចប្រជុំកំពូលអាស៊ានលើកទី១៨ ដោយជំនួបពិភាក្សានេះធ្វើឡើងរយៈពេលជាងមួយម៉ោង។ ជាលទ្ធផលសម្តេចតេជោហ៊ុន សែន និងលោកអាប់ភីស៊ីត បានឯកភាពគ្នាអនុញ្ញាតឱ្យរដ្ឋមន្ត្រីការបរទេសប្រទេសទាំងពីរបន្តការស្នាក់នៅក្នុងទីក្រុងហ្សាការតា ដើម្បីបន្តការពិភាក្សា ស្វែងរកដំណោះស្រាយសម្រាប់បញ្ហាជម្លោះព្រំដែនបច្ចុប្បន្នរវាងប្រទេសទាំងពីរ។
ទាក់ទិនទៅនឹងជំនួបពិភាក្សាត្រីភាគីនេះ ប្រភពព័ត៌មានពីទីក្រុងហ្សាការតាឱ្យដឹងថា រដ្ឋមន្ត្រីការបរទេសកម្ពុជា និងរដ្ឋមន្ត្រីការបរទេសថៃ បានឯកភាពគ្នាលើកិច្ចព្រមព្រៀងមួយដែលគេហៅថា «ដំណោះស្រាយជាកញ្ចប់» ដើម្បីអនុញ្ញាតឱ្យមានការដាក់ពង្រាយអ្នកសង្កេតការណ៍ឥណ្ឌូណេស៊ីនៅតំបន់មានជម្លោះព្រំដែនរវាងប្រទេសទាំងពីរដើម្បីត្រួតពិនិត្យបទឈប់បាញ់គ្នា។
រដ្ឋមន្ត្រីការបរទេសឥណ្ឌូណេស៊ី លោកម៉ាទី ណាតាឡេហ្គាវ៉ា ដែលជាប្រធានអាស៊ានថ្លែងក្រោយពីជំនួបត្រីភាគីលើកទី២ រវាងលោកឧបនាយករដ្ឋមន្ត្រីហោ ណាំហុង និងលោកកាស៊ីត ភិរម្យ ថា ជំនួបពិភាក្សានេះទទួលបានលទ្ធ ផលលើសពីការរំពឹងទុករបស់លោកទៅទៀត ។ លោករដ្ឋមន្ត្រីការបរទេសថ្លែងទៀតថា «ខ្ញុំមិនបានយល់ពីវិសាលភាគនៃបញ្ហារវាងប្រទេសទាំងពីរ (ថៃ-កម្ពុជា) ទេ ប៉ុន្តែពួកគេអាចជំនះការទាមទារចំពោះគ្នាទៅវិញទៅមក»។
ទីភ្នាក់ងារព័ត៌មានជប៉ុនក្យូដូរាយការណ៍ដោយដកស្រង់សម្តីលោកឧបនាយករដ្ឋមន្ត្រីហោ ណាំហុង ដែលថ្លែងថា កម្ពុជា និងថៃ បានឯកភាពគ្នាទទួលដំណោះស្រាយជាកញ្ចប់ ស្តីអំពីការបញ្ជូនអ្នកសង្កេតការណ៍ឥណ្ឌូណេស៊ីទៅកាន់តំបន់មានជម្លោះព្រំដែនរវាងប្រទេសទាំងពីរ ។ លោកឧបនាយករដ្ឋមន្ត្រីហោ ណាំហុង ថ្លែងទៀតថា ដំណោះស្រាយនេះគឺលាយបញ្ចូលគ្នានូវរូបមន្តចំនួន៦ឱ្យទៅជាវិធានការតែមួយប៉ុណ្ណោះ ដែលនោះគឺភាគីទាំងពីរកម្ពុជា-ថៃ នឹងត្រូវតែផ្តល់ឱ្យគ្នាទៅវិញ ទៅមកនូវលិខិតសម្រាប់លក្ខខណ្ឌប្រតិបត្តិ (TOR) សម្រាប់ក្រុមអ្នកសង្កេតការណ៍ឥណ្ឌូណេស៊ី (IOT) ហើយក្នុងអំឡុងពេលនេះដែរ ប្រមុខការទូតទាំងពីរក៏បានប្រកាសពីកាលបរិច្ឆេទសម្រាប់កិច្ចប្រជុំគណៈកម្មាធិការព្រំដែនទូទៅ (GBC) និងកិច្ចប្រជុំគណៈកម្មាធិការព្រំដែនចម្រុះ (JBC) កម្ពុជា-ថៃ។
លោកឧបនាយករដ្ឋមន្ត្រីហោ ណាំហុង ថ្លែងថា ក្នុងចំណោមវិធានការទាំង៦នោះគឺ វិធានការ៣ និង៤ គឺបញ្ជូនក្រុមអ្នកសង្កេតការណ៍ឥណ្ឌូណេស៊ីនៅកាន់តំបន់មានជម្លោះព្រំដែនរវាងប្រទេសទាំងពីរ និងកោះបើកកិច្ចប្រជុំ GBC និងកិច្ចប្រជុំ JBC ក្នុងរយៈពេល៥ថ្ងៃ ក្រោយពីថៃផ្ញើលិខិតទទួលយកលក្ខខណ្ឌប្រតិបត្តិ (TOR) ជូនរដ្ឋមន្ត្រីការបរទេសឥណ្ឌូណេស៊ី ចំណែកវិធានការទី៥ និងទី៦ គឺត្រូវបញ្ជូនការវាយតម្លៃរបស់ក្រុមអ្នកសង្កេតការណ៍ឥណ្ឌូណេស៊ី (IOT) ហើយតាមដានលទ្ធផលប្រជុំ GBC និង JBC ក្នុងរយៈពេល១០ថ្ងៃ ក្រោយពីថៃផ្ញើលិខិតយល់ព្រមទទួលយក TOR ជូនរដ្ឋមន្ត្រីការបរទេសឥណ្ឌូណេស៊ី។
ទោះបីជាបែបណា ខាងភាគីកម្ពុជាបានលើកឡើងម្តងទៀតថា ក្រុមអ្នកសង្កេតការណ៍ឥណ្ឌូណេស៊ីត្រូវតែដាក់ពង្រាយមុនការចរចាស្តីអំពីការដកកងទ័ពពីតំបន់មានជម្លោះ ។ ចំណែកវិធានការទី១ និងទី២ គឺ១-ថៃត្រូវតែឆ្លើយតបចំពោះលក្ខខណ្ឌប្រតិបត្តិ (TOR) ស្តីអំពីការដាក់ពង្រាយអ្នកសង្កេតការណ៍ឥណ្ឌូណេស៊ី ។លោករដ្ឋមន្ត្រីការបរទេសឥណ្ឌូណេស៊ីថ្លែងថា ស្ថិតក្រោមការសម្របសម្រួលនេះ រដ្ឋមន្ត្រីការបរទេសថៃ និងរដ្ឋមន្ត្រីការបរទេសកម្ពុជាបានឯកភាពគ្នាថា ការអនុម័តជាផ្លូវការសម្រាប់ការដាក់ពង្រាយអ្នកសង្កេតការណ៍ឥណ្ឌូណេស៊ី នឹងធ្វើឡើងនៅកាលបរិច្ឆេទដូចគ្នានៃកិច្ចប្រជុំលើកក្រោយរបស់គណៈកម្មាធិការព្រំដែនទូទៅ GBC និងកិច្ចប្រជុំគណៈកម្មាធិការព្រំដែនចម្រុះ JBC ។ ប៉ុន្តែទោះបីជាបែបណា កិច្ចព្រមព្រៀងដែលទទួលបានពីជំនួបពិភាក្សានេះនៅត្រូវផ្តល់ការអនុម័តពីប្រមុខរដ្ឋាភិបាលប្រទេសទាំងពីរទៀត ។ ពួកអ្នកវិភាគនិយាយថា ការយល់ព្រមរបស់ថៃចំពោះបញ្ហាអ្នកសង្កេតការណ៍ឥណ្ឌូណេស៊ីមិនទាន់យកជាការបាននោះទេ ព្រោះថៃអាចប្រែក្រឡាស់វិញបាននៅពេលណាមួយ ដូច្នេះត្រូវឱ្យអន្តរជាតិដាក់សម្ពាធលើប្រទេសនេះបន្ថែមទៀត៕
ចែករំលែកព័តមាននេះ