ខេត្តស្វាយរៀង ៖ នៅមន្ទីរពេទ្យបង្អែកស្រុករមាសហែកកាលពីព្រឹកថ្ងៃទី៨ ឧសភា មានរៀបចំពិធីប្រគល់រថយន្តគិលានសង្គ្រោះក្រោមអធិបតីភាពលោកជំទាវម៉ែន សំអន ឧបនាយករដ្ឋមន្ត្រីប្រចាំការ ដោយមានការចូលរួមពីតំណាងរាស្ត្រមណ្ឌលស្វាយរៀង អភិបាលរងខេត្ត អភិបាល-អភិបាលរងស្រុក ប្រធាន-អនុប្រធានមន្ទីរសុខាភិបាលខេត្ត
ខេត្តស្វាយរៀង ៖ នៅមន្ទីរពេទ្យបង្អែកស្រុករមាសហែកកាលពីព្រឹកថ្ងៃទី៨ ឧសភា មានរៀបចំពិធីប្រគល់រថយន្តគិលានសង្គ្រោះក្រោមអធិបតីភាពលោកជំទាវម៉ែន សំអន ឧបនាយករដ្ឋមន្ត្រីប្រចាំការ ដោយមានការចូលរួមពីតំណាងរាស្ត្រមណ្ឌលស្វាយរៀង អភិបាលរងខេត្ត អភិបាល-អភិបាលរងស្រុក ប្រធាន-អនុប្រធានមន្ទីរសុខាភិបាលខេត្ត ក្រុមប្រឹក្សាឃុំ គិលានុបដ្ឋាក-គិលានុបដ្ឋាយិកា សរុបជិត២០០នាក់ ។
លោកវេជ្ជបណ្ឌិតភាវ សុសត្តា នាយកមន្ទីរពេទ្យបង្អែកស្រុករមាសហែក បានថ្លែងឱ្យដឹងថា មន្ទីរពេទ្យបង្អែកស្រុកប្រតិបត្តិរមាសហែក មានបុគ្គលិកសរុប៣៩នាក់ ក្នុងនោះវេជ្ជបណ្ឌិត២នាក់ គ្រូពេទ្យមធ្យម៣នាក់ ឆ្មបមធ្យម១នាក់ ឆ្មបបឋម១នាក់ អ្នកបច្ចេកទេសមន្ទីរពិសោធន៍២នាក់ គិលានុបដ្ឋាក-គិលានុបដ្ឋាយិកាមធ្យម៦នាក់ គិលានុបដ្ឋាក-គិលានុបដ្ឋាយិកាបឋម៧នាក់ និងបុគ្គលិកបណ្តែត១៧នាក់ មានគ្រែសម្រាប់ឱ្យអ្នកជំងឺចូលមកសម្រាកព្យាបាលចំនួន៧០។ ក្នុងឆ្នាំ២០១០ អ្នកជំងឺចូលសម្រាកព្យាបាលសរុប២.០០៩នាក់ អត្រាស្លាប់ក្នុងមន្ទីរពេទ្យមាន២៦ករណី ។ មន្ទីរពេទ្យនេះគ្របដណ្តប់សេវាសុខាភិបាល២ ស្រុក គឺស្រុករមាសហែក និងស្រុករំដួល ស្មើ១៨ឃុំ ២១៩ភូមិ ៣០.៤៥៧គ្រួសារ គិតជាមនុស្សសរុប១៤៩.១២៥នាក់ មានមណ្ឌលសុខភាពចំនួន៩កន្លែង មានបុគ្គលិកក្របខណ្ឌ៧៨នាក់ មន្ត្រីជាប់កិច្ចសន្យា និងពលករបណ្តែត៧៨នាក់ ។
លោកវេជ្ជបណ្ឌិតបន្តទៀតថា ចំណុចខ្លាំងគឺមានការគាំទ្រពីក្រសួងសុខាភិបាល និងមន្ទីរសុខាភិបាលខេត្ត មានគោលនយោបាយជាតិ និងមានការណែនាំពីក្រសួង មន្ត្រីមានឆន្ទៈ និងការសាមគ្គី ឯកភាពគ្នា មានការសហការគាំទ្រពីអាជ្ញាធរ និងអង្គការសង្គមស៊ីវិលបានល្អ ។ ប៉ុន្តែក៏នៅមានចំណុចខ្វះខាត និងការលំបាកដោយនៅមានបញ្ហាប្រឈម គឺខ្វះធនធានមនុស្សទាំងមន្ទីរពេទ្យស្រុក និងមណ្ឌលសុខភាព ការអប់រំផ្សព្វផ្សាយពីបញ្ហាសុខភាពប្រជាពលរដ្ឋដល់សហគមន៍នៅមិនទាន់បានល្អប្រសើរ ការអប់រំ និងការផ្តល់ប្រឹក្សាផ្នែកសុខភាពដល់កុមារ និងស្ត្រីដែលមកទទួលសេវានៅមណ្ឌលសុខភាពពុំទាន់បានល្អ ។ ការសម្រាលកូននៅតាមផ្ទះដោយឆ្មបបុរាណនៅមានប្រមាណ១៤% ។ លទ្ធភាពនៃការផ្តល់សេវានៅមន្ទីរពេទ្យបង្អែក និងការស្តារនីតិសម្បទាឡើងវិញ ដោយជំងឺមិនឆ្លងដូចជា ជំងឺទឹកនោមផ្អែម ជំងឺបេះដូង សរសៃឈាម មហារីក សុខភាពមាត់ធ្មេញ នៅមានកម្រិត។ល។ ប្រជាជននៅមានកម្រិតជីវភាពទាប និងចំណេះដឹងមានកម្រិត ប្រជាជនមានចំណាកស្រុកច្រើន ការផ្តល់សេវាមូលដ្ឋាន និងការបញ្ជូនមានការលំបាកនៅរដូវវស្សា ពេលមានអ្នកជំងឺត្រូវការសង្គ្រោះបន្ទាន់ត្រូវការសែងចេញពីផ្ទះមករកផ្លូវលំ ។ ខ្វះរថយន្តសង្គ្រោះធ្វើឱ្យហួសពេលសង្គ្រោះ ប្រជាជនមួយចំនួនមានជំនឿអរូបី និងទម្លាប់ផ្សេងៗតាមភូមិ ។ សេវាសុខភាពឯកជនខុសច្បាប់នៅមិនទាន់លុបបំបាត់នៅឡើយ ។
លោកវេជ្ជបណ្ឌិតភាវ សុសត្តា បានថ្លែងអំណរគុណយ៉ាងជ្រាលជ្រៅចំពោះលោកជំទាវឧបនាយករដ្ឋមន្ត្រីម៉ែន សំអន ដែលផ្តល់រថយន្តគិលានសង្គ្រោះ១គ្រឿង ដើម្បីបម្រើការជួយសង្គ្រោះអ្នកជំងឺក្នុងស្រុកប្រតិបត្តិរមាសហែកនេះ និងថ្លែងអំណរគុណដល់រាជរដ្ឋាភិបាលដែលមានសម្តេចអគ្គមហាសេនាបតីតេជោហ៊ុន សែន ជាប្រមុខដឹកនាំដ៏ឆ្នើមប្រកបដោយគតិបណ្ឌិតបានផ្គត់ផ្គង់សេវាហិរញ្ញប្បទានដល់ប្រជាពលរដ្ឋក្រីក្រនូវសេវាសុខាភិបាលដោយឥតគិតថ្លៃ ផ្តល់អំណោយជាអង្ករជាប្រចាំក្នុង១ខែ២០០គីឡូក្រាម ព្រមទាំងថវិកា និងម្ហូបផ្គត់ផ្គង់អ្នកជំងឺ ។
លោកជំទាវម៉ែន សំអន ឧបនាយករដ្ឋមន្ត្រីប្រចាំការ បានមានប្រសាសន៍សំណេះសំណាលនាឱកាសនោះថា ក្នុងនាមរាជរដ្ឋាភិបាល លោកជំទាវមានចំណាប់អារម្មណ៍ចំពោះរបាយការណ៍របស់លោកវេជ្ជបណ្ឌិតភាវ សុសត្តា អំពីសេវាសុខាភិបាលនេះដែលមានការគាំទ្រពីក្រសួង និងមន្ទីរសុខាភិបាល មានការសហការល្អពីអាជ្ញាធរពាក់ព័ន្ធ និងអង្គការនានា ផ្តល់សេវាបានល្អប្រសើរ។ អ្វីដែលរាជរដ្ឋាភិបាលចាប់អារម្មណ៍គឺចំណុចលំបាក ឬបញ្ហាប្រឈមដើម្បីយើងរួមគ្នា រកដំណោះស្រាយ ជាពិសេសសុខភាពមាតា និងទារក ដែលការសម្រាលកូននៅតាមផ្ទះដោយឆ្មបបុរាណនៅមានប្រមាណ១៤% ប្រជាជននៅមានកម្រិតជីវភាពទាប និងចំណេះដឹងនៅមានកម្រិតទាប ។ ទាំងនេះគឺសុទ្ធសឹងជាចំណុចដែលរាជរដ្ឋាភិបាលកំពុងគិតគូរនៅក្នុងយុទ្ធសាស្ត្រចតុកោណ ជាពិសេសលោកជំទាវបណ្ឌិតប៊ុន រ៉ានី ហ៊ុន សែន គិតគូរយ៉ាងខ្លាំងចំពោះសុខភាព មាតានិងទារក និងសុខភាពប្រជាជនទូទៅ ព្រោះដើម្បីធ្វើការអភិវឌ្ឍទៅបានត្រូវមានធនធានមនុស្ស ប្រជាជនមានសុខភាពល្អ ទើបឈានទៅកាត់បន្ថយភាពក្រីក្រមានប្រសិទ្ធ
ភាព ។
ក្រោយពីការសំណេះសំណាល គឺពិធីប្រគល់រថយន្តគិលានសង្គ្រោះ១គ្រឿង ដែលបំពាក់សម្ភារបច្ចេកទេសមួយកំប្លេ និងមានឆ្នាំង ចាន ទូរទស្សន៍២១អ៊ីញ មួយគ្រឿង ព្រមទាំងបរិក្ខារពេទ្យមួយចំនួន។ ផ្តល់អំណោយដល់អ្នកជំងឺ២៨នាក់ ក្នុងម្នាក់ៗទទួលបានស្ករស១គីឡូក្រាម ទឹកដោះគោ២កំប៉ុង ទឹកបរិសុទ្ធ១ដប មី៥កញ្ចប់ ថវិកា២០.០០០រៀល ។ មន្ត្រីក្រុមប្រឹក្សាស្រុក៧នាក់ ក្នុងម្នាក់ៗ១ម៉ឺនរៀល មន្ត្រីក្រុមប្រឹក្សាឃុំ១៦នាក់ ម្នាក់ៗ១ម៉ឺនរៀល មេភូមិ១០នាក់ គ្រូពេទ្យ៣៩នាក់ ម្នាក់ៗ១ម៉ឺនរៀល ៕
ចែករំលែកព័តមាននេះ