និស្សិតចិនបញ្ចប់ការសិក្សាជិត១២លាននាក់ នឹងដើរចូលទីផ្សារការងារដ៏សែនតូចចង្អៀតនៅឆ្នាំនេះ
ចិន ៖ យុវជននៅក្នុងប្រទេសចិន កំពុងតស៊ូក្នុងការចាប់ផ្តើមស្វែងការងារដំបូងរបស់ពួកគេ ខណៈ
ចិន ៖ យុវជននៅក្នុងប្រទេសចិន កំពុងតស៊ូក្នុងការចាប់ផ្តើមស្វែងការងារដំបូងរបស់ពួកគេ ខណៈដែលភាពអត់ការងារធ្វើរបស់យុវជននៅក្នុងប្រទេសមួយនេះ បានឡើងដល់កម្រិតខ្ពស់បំផុត ស្របពេលកំណត់ត្រានៃនិស្សិតបញ្ចប់ការសិក្សានៅប្រទេសចិនជិត ១១.៦លាននាក់ នឹងដើរចូលទៅក្នុងទីផ្សារការងារដ៏តូចចង្អៀតបំផុតនៅឆ្នាំនេះ។ នេះបើយោងតាមរបាយការណ៍សារព័ត៌មាន CNA ចេញផ្សាយកាលពីថ្ងៃទី១៥ ខែកក្កដា ឆ្នាំ២០២៣ កន្លងទៅ។
ដោយឡែក របាយការណ៍ពីសារព័ត៌មាន South China Morning Post បានឱ្យដឹងថា និស្សិតបញ្ចប់ការសិក្សានៅមហាវិទ្យាល័យ និងសកលវិទ្យាល័យចំនួន ១១.៦លាននាក់ កំពុងដើរចូលទីផ្សារការងារដ៏សែនតូចចង្អៀតនៅឆ្នាំនេះ ប៉ុន្តែសេដ្ឋកិច្ចរបស់ប្រទេសសេដ្ឋកិច្ចធំលំដាប់ទី២ពិភពលោក ដែលបានរងគ្រោះដោយសារជំងឺរាតត្បាតកូវីដ-១៩ ជាពិសេសឆ្អឹងខ្នងនៃអាជីវកម្មឯកជនខ្នាតតូច និងមធ្យម កំពុងតែជួបការលំបាកក្នុងការបង្កើតការងារគ្រប់គ្រាន់សម្រាប់ពួកគេ។
ភាពអត់ការងារធ្វើរបស់យុវជនចិនកំពុងកើនឡើងក្នុងកម្រិតខ្ពស់បំផុត ដោយភាពអត់ការងារធ្វើក្នុងចំណោមមនុស្សដែលមានអាយុពី ១៦ ទៅ ២៤ ឆ្នាំកើនឡើងដល់ ២០.៨% នៅក្នុងខែឧសភា ឆ្នាំនេះ ដែលលើសពីកម្រិតខ្ពស់ពីមុនត្រឹម ២០.៤% ដែលបានកំណត់នៅក្នុងខែមេសា។
ដោយសារតែភាពអត់ការងារធ្វើកើនឡើងខ្ពស់ ផ្ទុយពីការសប្បាយរីករាយជាមួយការបោះមួកពួកគេទៅលើមេឃ និស្សិតចិនជាច្រើនដែលទើបតែបញ្ចប់ការសិក្សាបាននាំគ្នាបង្ហោះរូបលើបណ្តាញទំនាក់ទំនងសង្គម ដោយអ្នកខ្លះធ្វើជាដេកដួលលើដី ស្ពាន ឬលើកៅអីសួន ដើម្បីបង្ហាញភាពស្រងាកចិត្ត ហើយអ្នកខ្លះទៀត បង្ហាញភាពចំអក ដោយការបោះសញ្ញាប័ត្រពួកគេចូលទៅក្នុងធុងសំរាម។
ជាមួយនឹងភាពភាពអត់ការងារធ្វើ ឬពិបាកក្នុងការរកការងារធ្វើនេះហើយ បានបង្ខំឱ្យយុវជនជាច្រើននៅក្នុងប្រទេសចិន រស់នៅទាំងលំបាកក្នុងជីវិតបែបសម័យទំនើប ហើយជំនួសឱ្យការតស៊ូនេះ ពួកគេបានសម្រេចចិត្តមិនទិញផ្ទះ ឡាន មិនរៀបការ ដោយជ្រើសរើសរបៀបរស់នៅបែបអសកម្មលើការប្រើប្រាស់ និងចំណាយតិច ដែលកត្តានេះ នឹងជះឥទ្ធិពលយ៉ាងខ្លាំងដល់កំណើនប្រជាជនចិន៕
ចែករំលែកព័តមាននេះ