ខេត្តកណ្តាល ៖ យុវជនម្នាក់ឈ្មោះភី សុផាត អាយុ១៩ឆ្នាំ មានទីលំនៅក្នុងភូមិព្រែកហូរខាងលិច សង្កាត់ព្រែកហូរ ក្រុងតាខ្មៅ បានរងរបួសយ៉ាងធ្ងន់ធ្ងររហូតសន្លប់ ហើយត្រូវបានជនមិនស្គាល់មុខដឹកតាមម៉ូតូយកមកប្លុងទុកចោលនៅក្នុងមន្ទីរពេទ្យជ័យជម្នះ ខាងមុខអគារសង្គ្រោះបន្ទាន់ កាលពីវេលាម៉ោង៩យប់ ថ្ងៃទី៨ ឧសភា
ខេត្តកណ្តាល ៖ យុវជនម្នាក់ឈ្មោះភី សុផាត អាយុ១៩ឆ្នាំ មានទីលំនៅក្នុងភូមិព្រែកហូរខាងលិច សង្កាត់ព្រែកហូរ ក្រុងតាខ្មៅ បានរងរបួសយ៉ាងធ្ងន់ធ្ងររហូតសន្លប់ ហើយត្រូវបានជនមិនស្គាល់មុខដឹកតាមម៉ូតូយកមកប្លុងទុកចោលនៅក្នុងមន្ទីរពេទ្យជ័យជម្នះ ខាងមុខអគារសង្គ្រោះបន្ទាន់ កាលពីវេលាម៉ោង៩យប់ ថ្ងៃទី៨ ឧសភា ។
ក្រោយពីជនមិនស្គាល់មុខជិះម៉ូតូចេញផុត គ្រូពេទ្យបានឃើញក៏ជួយសង្គ្រោះ ប៉ុន្តែជាអកុសលជនរងគ្រោះបានស្លាប់នៅវេលាម៉ោងប្រហែល៤ទៀបភ្លឺ ថ្ងៃទី៩ ឧសភា ដោយសារតែរបួសធ្ងន់ធ្ងរពេក គឺផុងលលាដ៍ក្បាលផ្នែកខាងក្រោយចេញឈាមតាមច្រមុះ និងត្រចៀក។ រហូតដល់ម៉ោង១០ព្រឹក ថ្ងៃដដែល ទើបក្រុមគ្រួសារមករកដល់មន្ទីរពេទ្យស្គាល់អត្តសញ្ញាណជនរងគ្រោះ ប៉ុន្តែមូលហេតុបណ្តាលឱ្យជនរងគ្រោះមានរបួសនេះ មិនមានប្រភពណាមួយបានដឹងច្បាស់លាស់ទេ។ ប៉ុន្តែបើតាមការសន្និដ្ឋានជំហានដំបូងរបស់សមត្ថកិច្ច គឺជនរងគ្រោះរងរបួសដោយសារការវាយតប់គ្នា ឬត្រូវគេលួចវាយដោយសារគំនុំអ្វីមួយ ព្រោះជនរងគ្រោះចេញពីផ្ទះមកមិនមានលុយកាក់ ឬរបស់មានតម្លៃអ្វីមួយជាប់នឹងខ្លួនឡើយ ។
ស្ត្រីឈ្មោះវ៉ាន រ៉េន អាយុ៥០ឆ្នាំ រស់នៅភូមិព្រែកហូរខាងលិច សង្កាត់ព្រែកហូរ ក្រុងតាខ្មៅ ដែលជាម្តាយរបស់យុវជនរូបនេះ បានរៀបរាប់ប្រាប់ប៉ូលិសថានៅរសៀលថ្ងៃទី៨ ឧសភា កូនគាត់ឈ្មោះភី សុផាត បានចេញពីផ្ទះទៅលេងបាល់ទះនៅក្នុងភូមិ ហើយនៅល្ងាចថ្ងៃដដែលក៏បានចេញពីផ្ទះបាត់រហូត។ លុះនៅម៉ោងប្រហែល៧យប់ ទើបម្តាយរបស់វិតបានមកប្រាប់គាត់ថា កូនប្រុសគាត់មានទំនាស់វាយតប់គ្នាជាមួយយុវជនមួយក្រុមទៀតនៅកន្លែងលក់ទឹកត្នោតជូរក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ និងត្រូវសមត្ថកិច្ចប៉េអឹមក្រុងចាប់យកទៅបាត់ហើយ គឺឈ្មោះវិត ជាអ្នកទូរស័ព្ទមកប្រាប់ ។
ម្តាយជនរងគ្រោះឱ្យដឹងទៀតថា ភ្លាមៗនោះគាត់ប្រញាប់ទៅសួរនៅទីបញ្ជាការប៉េអឹមក្រុងតាខ្មៅ ប៉ុន្តែមន្ត្រីប៉េអឹមប្រាប់ថា អត់មានចាប់មនុស្សមកទេ និងបានប្រាប់ឱ្យទៅសួរប៉ូលិសក្រុងតាខ្មៅបន្តទៀត ប៉ុន្តែខាងប៉ូលិសប្រាប់ថា អត់បានចាប់ឈ្មោះភី សុផាត ទេ ។ ចំណែកឈ្មោះវិត ជាមិត្តភក្តិរបស់កូនប្រុសគាត់ក៏មិនឃើញចូលផ្ទះដូចគ្នាផងដែរ មិនដឹងថាទៅណា ឡើយ។ លុះព្រឹកឡើងថ្ងៃទី៩ ឧសភា ទើបទទួលដំណឹងថា មានយុវជនម្នាក់ស្លាប់នៅមន្ទីរពេទ្យជ័យជម្នះ មិនស្គាល់សាច់ញាតិគាត់ក៏ប្រញាប់មកមើល ទើបស្គាល់ថា ជាកូនរបស់គាត់ ។ គាត់បញ្ជាក់ថា កូនគាត់ចេញពីផ្ទះជាមួយមិត្តភក្តិ និងមិនមានរបស់របរអ្វីជាប់មកជាមួយទេ គឺមានតែលុយតិចតួចប៉ុណ្ណោះ។
គ្រូពេទ្យបានឱ្យដឹងថា ជនរងគ្រោះរបួសផុងលលាដ៍ក្បាលផ្នែកខាងក្រោយចំហៀងខាងឆ្វេង និងស្នាមប៉ោងក្បាលផ្នែកខាងស្តាំខាងក្រោយ មានឈាមចេញតាមច្រមុះ និងត្រចៀកមិនអាចជួយសង្គ្រោះបានក៏ស្លាប់នៅវេលាម៉ោង៤ទៀបភ្លឺថ្ងៃទី៩ ឧសភា។ នៅថ្ងៃដដែលនោះក្រុមគ្រួសារបានមកទទួលយកសពទៅធ្វើបុណ្យតាមប្រពៃណី ចំណែកប៉ូលិសកំពុងធ្វើការស្រាវជ្រាវលើករណីនេះដើម្បីស្វែងរកយុត្តិធម៌ឱ្យជនរងគ្រោះ៕
ចែករំលែកព័តមាននេះ