ភ្នំពេញ៖ នាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បានប្រកាសថា នៅវេលាម៉ោង ១៦:៥០ នាទីល្ងាច ថ្ងៃព្រហស្បតិ៍ ១១រោច…
ភ្នំពេញ៖ នាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បានប្រកាសថា នៅវេលាម៉ោង ១៦:៥០ នាទីល្ងាច ថ្ងៃព្រហស្បតិ៍ ១១រោច ខែបឋមាសាឍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៣ ខែកក្កដា ឆ្នាំ២០២៣ មានករណីអគ្គិភ័យមួយកន្លែង បានកើតឡើងចំណុច សិប្បកម្មដេរពូកសាឡុង ដែលស្ថិតនៅភូមិតាងៅក្រោម សង្កាត់និរោធ ខណ្ឌច្បារអំពៅ រាជធានីភ្នំពេញ ម្ចាស់ទីតាំងឈ្មោះ សុខ ចន្ទី ភេទ ប្រុស អាយុ ៣៩ ឆ្នាំ ជនជាតិ វៀតណាម មុខរបរ ម្ចាស់សិប្បកម្ម។
នាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បន្តថា មូលហេតុ បណ្តាលឱ្យភ្លើងឆេះសិប្បកម្មនេះ អាជ្ញាធរសមត្ថកិច្ច កំពុងបន្តការស្រាវជ្រាវ។
សិប្បកម្មដេរពូកសាឡុងនេះ ជាប្រភេទសំណង់ ទំហំ ១៥ម៉ែត្រ X ២០ម៉ែត្រ បណ្តាលឱ្យខូចខាតសម្ភារៈ ឆេះឃ្លាំងសិប្បកម្ម ចំនួន ០១ឃ្លាំង រួមមាន ម៉ាស៊ីនដេរ និងភុង ចំនួន ០៥គ្រឿង។ រថយន្ត PAJARO ចំនួន ០១ គ្រឿង។ ម៉ូតូ Honda Air Black ចំនួន ០១គ្រឿង នឹងឆេះរាលដាលដល់ផ្ទះឈើប្រក់ស័ង្កសី ចំនួន ០១ ខ្នង អស់ទាំងស្រុង និងផ្ទះថ្មចំនួន ០១ ខ្នង ( ខូចខាតប្រហែល ១០%)។ ហេតុការណ៍នេះ មិនមានអ្នករបួស និងស្លាប់ទេ។
កងកម្លាំងបង្ការពន្លត់អគ្គិភ័យ និងសង្គ្រោះ បានប្រើប្រាស់រថយន្តការិយាល័យអគ្គិភ័យចំនួន ១៥ គ្រឿង ប្រើប្រាស់ទឹកអស់ ចំនួន ៣០រថយន្ត ស្មើនឹង ១២០ម៉ែត្រគូប។
ភ្លើងឆេះសិប្បកម្មដេរពូកសាឡុងនេះ រថយន្តរដ្ឋបាលខណ្ឌច្បារអំពៅ ចំនួន ០១ គ្រឿង ប្រើប្រាស់អស់ចំនួន ០២ រថយន្ត ស្មើនឹង ០៨ ម៉ែត្រគូប។ ក្នុងនោះ រួមមាន រថយន្តទីក្រុងកោះពេជ្រចំនួន ០៣ គ្រឿង ប្រើប្រាស់ទឹកអស់ចំនួន ០៣ រថយន្ត ស្មើនឹង ១២ ម៉ែត្រគូប។ រថយន្តទីក្រុងនរាចំនួន ០២ គ្រឿង ប្រើប្រាស់ទឹកអស់ចំនួន ០៤ រថយន្ត ស្មើនឹង ១៦ ម៉ែត្រគូប។ រថយន្តបុរីប៉េងហួត ចំនួន ០៣ គ្រឿង ប្រើប្រាស់អស់ចំនួន ០៦ រថយន្ត ស្មើនឹង ៣៦ ម៉ែត្រគូប។ រថយន្តក្រុមហ៊ុនស្រាបៀរកម្ពុជា ចំនួន ០១ គ្រឿង ប្រើប្រាស់ទឹកអស់ចំនួន ០១ រថយន្ត ស្មើនឹង ០៦ម៉ែត្រគូប។
នាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បានប្រកាសថា ភ្លើងឆេះសិប្បកម្មដេរពូកសាឡុង ត្រូវបានពន្លត់ចប់ នៅវេលាម៉ោង ១៨:៥០ នាទីល្ងាច នាថ្ងៃខែឆ្នាំដដែល៕
ចែករំលែកព័តមាននេះ