ខេត្តស្វាយរៀង ៖ យុវជនម្នាក់ខណៈកំពុងបើកបរគោយន្តដឹកដីបានជួបគ្រោះអកុសលក្រឡាប់ចូលស្រះទឹកជម្រៅ១ម៉ែត្រក្បែរផ្លូវលំ ធ្វើឱ្យទ្រុងគោយន្តរុញពីក្រោយសង្កត់ទ្រូងកៀបជាប់នឹងដៃចង្កូតបណ្តាលឱ្យឈ្លក់ទឹកហើយប្រជាពលរដ្ឋនាំគ្នាជួយគាស់អស់រយៈពេលជិតកន្លះម៉ោងទើបយកជនរងគ្រោះបាន រួចហើយដឹកយកទៅសង្គ្រោះនៅមន្ទីរពេទ្យខេត្ត
ខេត្តស្វាយរៀង ៖ យុវជនម្នាក់ខណៈកំពុងបើកបរគោយន្តដឹកដីបានជួបគ្រោះអកុសលក្រឡាប់ចូលស្រះទឹកជម្រៅ១ម៉ែត្រក្បែរផ្លូវលំ ធ្វើឱ្យទ្រុងគោយន្តរុញពីក្រោយសង្កត់ទ្រូងកៀបជាប់នឹងដៃចង្កូតបណ្តាលឱ្យឈ្លក់ទឹកហើយប្រជាពលរដ្ឋនាំគ្នាជួយគាស់អស់រយៈពេលជិតកន្លះម៉ោងទើបយកជនរងគ្រោះបាន រួចហើយដឹកយកទៅសង្គ្រោះនៅមន្ទីរពេទ្យខេត្ត តែលោកគ្រូពេទ្យនិយាយថាមានសង្ឃឹមតិចតួចបំផុត ។គ្រោះថ្នាក់នេះបានកើតឡើងកាលពីថ្ងៃទី៨ ឧសភា វេលាម៉ោង៧ព្រឹក នៅតាមផ្លូវលំស្ថិតក្នុងភូមិព្រៃឆ្លាក់ សង្កាត់ព្រៃឆ្លាក់ ក្រុងស្វាយរៀង ។
បើតាមបុរសឈ្មោះណុប សារ៉ាន់ អាយុ៤៨ឆ្នាំ ត្រូវជាឪពុកមាបានប្រាប់ថា យុវជនរងគ្រោះឈ្មោះប្រាក់ រ៉ាឌី អាយុ២០ឆ្នាំ មុខរបរជាអ្នកបើកគោយន្តដឹកដីលក់ មានទីលំនៅភូមិកណ្តាល សង្កាត់ចេក ក្រុងស្វាយរៀង។ មុនពេលកើតហេតុ ជនរងគ្រោះបានបើកគោយន្តទៅដឹកដីយកទៅចាក់លើកភូមិឱ្យគេ លុះពេលដាក់ដីពេញទ្រុងហើយក៏បើកឡើងពីស្រែមកតាមផ្លូវលំពីខាងជើងមកខាងត្បូង ។ ខណៈមកដល់ផ្លូវលំខាងជើងវត្តព្រៃឆ្លាក់ ក៏បត់ស្តាំមកទិសខាងលិច តែដោយផ្លូវលំតូចចំណុចកែងក៏តូចហើយម្យ៉ាងទៀតផ្លូវលំទើបនឹងលើកថ្មីដីនៅជ្រាយផងក៏ផុងស្រុតរអិលជើងមុខធ្លាក់ទៅខាងស្តាំ ចុះក្នុងស្រះទឹកក្បែរថ្នល់ ធ្វើឱ្យទ្រុងគោយន្តដែលមានដីពេញរុញទៅមុខសង្កត់ជាប់ទ្រូងអ្នកបើកបរទៅនឹងចង្កូតគោយន្តធ្វើឱ្យជនរងគ្រោះឈ្លក់ទឹកម្តងៗ។
ប្រភពដដែលបន្តទៀតថា ពេលនោះអ្នកភូមិនៅជិតកន្លែងកើតហេតុុបានមកជួយក្រៀកក្បាលឱ្យងើបផុតពីទឹកហើយអ្នកខ្លះរត់ទៅហៅគ្នីគ្នាឱ្យមកជួយគាស់ទាញជនរងគ្រោះចេញពីគោយន្ត តែដោយនៅក្នុងទឹកជម្រៅប្រហែលមួយម៉ែត្រពិបាកមើលក្នុងការដាក់ឈើគាស់រហូតដល់ជិតកន្លះម៉ោងទើបគាស់ទាញយកជនរងគ្រោះបាន ធ្វើឱ្យជនរងគ្រោះសន្លប់និងបានបញ្ជូនទៅមន្ទីរពេទ្យខេត្ត ។ ក្រោយពេលក្រុមគ្រូពេទ្យថតមើលដើមទ្រូងឃើញថា ឆ្អឹងជំនីរកៀបទៅលើសួតបណ្តាលឱ្យបែកជាំសួតធ្ងន់ធ្ងរ និយាយមិនរួច ស្រវាំងភ្នែក ពិបាកដកដង្ហើម ម្យ៉ាងពុំមានឧបករណ៍សង្គ្រោះគ្រប់គ្រាន់ គ្រូពេទ្យពុំមានលទ្ធភាពសង្គ្រោះបានក៏បញ្ជូនទៅកាន់មន្ទីរពេទ្យនៅឯរាជធានីភ្នំពេញទៀត ដោយសារជនរងគ្រោះរបួសធ្ងន់ធ្ងរពេក ។
ជនរងគ្រោះចេះតែថយកម្លាំងខ្សោយទៅៗដែលសង្ឃឹមតិចតួចណាស់។ រីឯសមត្ថកិច្ចនិយាយថា គ្រោះថ្នាក់នេះដោយសារជនរងគ្រោះមានការធ្វេសប្រហែសបើកបរលឿន លុះមកដល់ផ្លូវបំបែកតូចចង្អៀតបត់ ក៏បណ្តាលឱ្យជ្រុលចង្កូតមកស្តាំដៃធ្លាក់គោយន្តដាំដូងចូលក្នុងស្រះទឹក ។ ម្យ៉ាងអ្នកបើកបរគោយន្តភាគច្រើនមិនបានរៀនដៃចង្កូតទេ ៕
ចែករំលែកព័តមាននេះ