ខេត្តបាត់ដំបង ៖ បុរស០២នាក់ដែលគេធ្លាប់ស្គាល់ប្រវត្តិថា ជាមុខសញ្ញា«ចោរ» ដ៏សកម្មបំផុតដែលតែងដើរបន្លំខ្លួនធ្វើជាភ្ញៀវកំដរតាមរោងការ ឬតាមរោងបុណ្យនានា រួចឆក់ឱកាសពេលស្ងាត់លួចយកព្រទ្យសម្បត្តិរបស់ម្ចាស់កម្មវិធី ឬភ្ញៀវកំដរកម្មវិធីអស់គ្មានសល់មិនថា ទូរស័ព្ទ កាបូបលុយ…
ខេត្តបាត់ដំបង ៖ បុរស០២នាក់ដែលគេធ្លាប់ស្គាល់ប្រវត្តិថា ជាមុខសញ្ញា«ចោរ» ដ៏សកម្មបំផុតដែលតែងដើរបន្លំខ្លួនធ្វើជាភ្ញៀវកំដរតាមរោងការ ឬតាមរោងបុណ្យនានា រួចឆក់ឱកាសពេលស្ងាត់លួចយកព្រទ្យសម្បត្តិរបស់ម្ចាស់កម្មវិធី ឬភ្ញៀវកំដរកម្មវិធីអស់គ្មានសល់មិនថា ទូរស័ព្ទ កាបូបលុយ ឬ ម៉ូតូឡើយ តែពេលនេះ ក្រុមបិសាចរាត្រីមកពីស្រុកមោងប្ញស្សីទាំង០២នាក់នេះ អស់លក្ខណ៍ជាប់អន្ទាក់ប្រជាពលរដ្ឋនិងសមត្ថកិច្ចស្រុកបាណន់ហើយ ។
ជនទាំង០២នាក់នេះ ត្រូវប្រជាពលរដ្ឋនិងសមត្ថកិច្ចមូលដ្ឋានដេញប្រផាប់ចាប់ប្រភីងបាននៅវេលាទៀបភ្លឺ ថ្ងៃទី០៦ កក្កដា នៅភូមិបុះខ្នុរ ឃុំចែងមានជ័យ ស្រុកបាណន់ ក្រោយពីពួកគេបានបន្លំខ្លួនចូលលួចយកទូរស័ព្ទជាច្រើនគ្រឿង និងកាបូបលុយរបស់ភ្ញៀវដែលដេកកំដបុណ្យសព ។ បិសាចរាត្រីទាំង០២នាក់ ម្នាក់ឈ្មោះ ឆាយ ឈួ ភេទប្រុស អាយុ៤៣ឆ្នាំ និងម្នាក់ទៀតឈ្មោះ ផល សុភ័ក្រ ភេទប្រុស អាយុ៣៤ឆ្នាំ ពួកគេរស់នៅភូមិរាមគន់ ឃុំគារ ស្រុកមោងឬស្សី ។
ជនទាំង០២នាក់ត្រូវបានកំណត់ជាមុខសញ្ញា «ចោរ» ជិះម៉ូតូផ្សងព្រេងដើរលួចទ្រព្យសម្បត្តិគេស្ទើរគ្រប់ទីកន្លែង ជាពិសេស បន្លំខ្លួនធ្វើជាភ្ញៀវតាមរោងការ ឬតាមរោងបុណ្យ រួចឆក់ឱកាសលួចខ្ទេចលួចខ្ទីរតែម្ដង នៅពេលម្ចាស់កម្មវិធី ឬភ្ញៀវដេកលក់ ។ នាយប៉ុស្ដិ៍នគរបាល ឃុំចែងមានជ័យ លោក ថាប់ ជិនហាប់ បានឲ្យដឹងថា ជនសង្ស័យទាំង០២នាក់ បានជិះម៉ូតូឌុបគ្នាទៅបន្លំលួចលុយ និងទូរស័ព្ទភ្ញៀវ ដែលកំដររោងបុណ្យសពនៅភូមិបុះខ្នុរ តែចុងក្រោយត្រូវកម្លាំងរបស់លោក និង ប្រជាពលរដ្ឋស្ទាក់ចាប់បានទាំង០២នាក់ ដកហូតបានទាំងវត្ថុតាងផងដែរ ។
លោកនាយប៉ុស្ដិ៍បាននិយាយពីសកម្មភាពបិសាចរាត្រីទាំង០២នាក់នេះថា នៅវេលាម៉ោងប្រហែល៣រំលងអធ្រាត្រឈានចូលថ្ងៃទី០៦ កក្កដា ពួកគេបានជិះម៉ូតូឌុបគ្នាទៅកាន់ភូមិនោះ ។ ពេលទៅដល់ជនម្នាក់បានដើរចូលរោងបុណ្យបន្លំជាភ្ញៀវកំដរសព តែភ្នែករំពៃរកមើលទ្រព្យម្ចាស់បុណ្យឬភ្ញៀវនៅទីនោះ រីឯជនម្នាក់ឈប់ម៉ូតូរង់ចាំនៅឯផ្លូវ តែអ្នកកំដរបុណ្យសពបានឃើញពីសកម្មភាពជនម្នាក់នោះដែលគួរឲ្យសង្ស័យ ក៏នាំគ្នាតាមដានយ៉ាងសម្ងាត់ ។
លោកមេប៉ុស្ដិ៍បាននិយាយថា ជនម្នាក់នោះមិនបានដឹងថា មានអ្នកកំដបុណ្យតាមដានសកម្មភាពខ្លួនទេ ស្រាប់តែបានធ្វើសកម្មភាពលួចយកទូរស័ព្ទជាច្រើនគ្រឿងពេលម្ចាស់ដេកលក់ ហើយលួចបានកាបូបលុយមួយទៀត ។ លោកថា ពេលនោះ ម្ចាស់បុណ្យនិងសាច់ញាតិ ក៏ភ្ញាក់ស្រែកផ្អើលឆោឡោនាំគ្នាដេញចាប់ តែជននេះបានរត់រួច ។ អ្នកភូមិបានទូរស័ព្ទហៅលោកឲ្យជួយអន្តរាគមន៍ភ្លាមៗ ហើយប្រាប់ថា គេឃើញមានមនុស្សម្នាក់ដែលគួរឲ្យសង្ស័យជាបក្សពួកចោរឈប់ម៉ូតូលើផ្លូវ ទើបលោកចាត់កម្លាំងរបស់លោកសហការជាមួយប្រជាការពារភូមិតាមស្ទាក់ឃាត់ខ្លួនអ្នកជិះម៉ូតូដែលគួរឲ្យសង្ស័យនោះតែម្ដង ដើម្បីសួរនាំ ។
ក្រោយពីឃាត់បានអ្នកជិះម៉ូតូនោះសួរនាំទើបដឹងពិតប្រាកដថា ជាបក្សពួកតែមួយជាមួយជនម្នាក់បន្លំខ្លួនចូលលួចទូរស័ព្ទក្នុងរោងបុណ្យ លុះនៅវេលាទៀបភ្លឺ ទើបស្ទាក់ចាប់បានជនដៃដល់ម្នាក់ដែល ចូលលួចក្នុងរោងបុណ្យដែលទំនងជនម្នាក់នេះ វង្វេងដើរឡើងលើថ្នល់ ដូចដើរចូលអន្ទាក់សមត្ថកិច្ចនិងប្រជាពលរដ្ឋដែលកំពុងតាមរកស្រាប់ ។ ជាមួយនឹងការឃាត់ខ្លួននេះ សមត្ថកិច្ចដកហូតបានវត្ថុតាងបាន ទូរស័ព្ទចំនួន០៣គ្រឿង ដែលជារបស់ម្ចាស់កម្មវិធីបុណ្យ និងភ្ញៀវកំដរបុណ្យ និងកាបូបលុយមួយ ដែលមានប្រាក់ខ្មែរ ប្រាក់ដុល្លា នាឡិកា និងគ្រឿងអល័ង្កាមួយចំនួនផង ។
បើតាមសមត្ថកិច្ចដែលធ្លាប់ស្គាល់ពីប្រវត្តិជនសង្ស័យទាំង០២នាក់ខាងលើនេះ បាននិយាយដែរថា ជនទាំង០២នាក់ធ្លាប់ដើរប្រព្រឹត្ត «អំពើរចោរកម្ម» បែបនេះស្ទើរគ្រប់ទីកន្លែង ជាពិសេស ដើរប្រព្រឹត្តតាមកម្មវិធីនានា ។ ជនទាំង០២នាក់នេះលួចមិនរើសមុខ មិនថា ទូរស័ព្ទ កាបូបលុយ ឬ សម្ភារផ្សេងៗឡើយ ឲ្យតែលក់បានលុយគឺលួយយកទាំងអស់ ។ ជាពិសេស ម៉ូតូដែលនៅតាមផ្ទះ ឬ នៅតាមរោងបុណ្យ ឬ រោងការនេះតែម្ដង ឲ្យតែម្ចាស់ប្រហែសបិសាចរាត្រីប្រចាំស្រុកមោងឬស្សី ស៊ីដាច់បាត់ភ្លាមរំពេចត្រិមមួយប៉ព្រឹចភ្នែកប៉ុណ្ណោះ។
នេះជាប្រវត្តិខ្លះៗរបស់ជនទុច្ចរិតទាំង០២នាក់ ដែលសមត្ថកិច្ចជំនាញធ្លាប់ដឹង និងធ្លាប់តាមដានសកម្មភាពពួកគេកន្លងមក ។ យ៉ាងណាពេលនេះ កម្លាំងជំនាញ បាននិងកំពុងរៀបចំសំំណុំរឿងបញ្ជូនបិសាចរាត្រីទាំង០២នាក់នេះទៅកាន់សាលាដំបូងខេត្តហើយ ៕
ចែករំលែកព័តមាននេះ