ខេត្តកំពង់ចាម ៖ ប្រើសឈ្មោល១ក្បាលមានទម្ងន់ជាង២០០គីឡូក្រាម បានរួចចេញពីក្នុងទ្រុងដែលព្រះចៅអធិការវត្តសន្ធររង្សីចិញ្ចឹម ស្ថិតនៅភូមិអន្លង់សំឡី ឃុំខ្ពបតាងួន ស្រុកស្ទឹងត្រង់ កាលពីវេលាម៉ោង៨និង៤៥នាទីព្រឹក ថ្ងៃទី៨ ឧសភា ២០១១ ។ ពេលរួចចេញពីទ្រុងនោះសត្វប្រើសឈ្មោលមួយក្បាលនេះ ប្រៀបបានទៅនឹងដំរីចុះប្រេង
ខេត្តកំពង់ចាម ៖ ប្រើសឈ្មោល១ក្បាលមានទម្ងន់ជាង២០០គីឡូក្រាម បានរួចចេញពីក្នុងទ្រុងដែលព្រះចៅអធិការវត្តសន្ធររង្សីចិញ្ចឹម ស្ថិតនៅភូមិអន្លង់សំឡី ឃុំខ្ពបតាងួន ស្រុកស្ទឹងត្រង់ កាលពីវេលាម៉ោង៨និង៤៥នាទីព្រឹក ថ្ងៃទី៨ ឧសភា ២០១១ ។ ពេលរួចចេញពីទ្រុងនោះសត្វប្រើសឈ្មោលមួយក្បាលនេះ ប្រៀបបានទៅនឹងដំរីចុះប្រេងដេញវ័ធមនុស្សក្មេងចាស់ប្រុសស្រីបណ្តាលឱ្យអ្នកភូមិនាំគ្នារត់បាតជើង.សព្រាត និងបណ្តាលឲ្យប្រជាពលរដ្ឋម្នាក់ស្លាប់ និងម្នាក់របួស ហើយដោយខ្លាចមានបញ្ហាគ្រោះថ្នាក់កាន់តែធ្ងន់ធ្ងរនោះប្រជាពលរដ្ឋក៏សំណូមពរឲ្យសមត្ថកិច្ចបាញ់ប្រហារប្រើសនោះសម្លាប់ចោលតែម្តង ។
តាមលោកអនុសេនីយ៍ទោ ខេង សុខណា នាយប៉ុស្តិ៍រដ្ឋបាលឃុំខ្ពបតាងួន បានប្រាប់ឲ្យដឹងថា ប្រជាពលរដ្ឋដែលត្រូវប្រើសដេញវ័ធធ្លាយពោះស្លាប់ឈ្មោះឌុច ស៊ន ភេទប្រុស អាយុ៦០ឆ្នាំ និងអ្នករងរបួសឈ្មោះម៉ុន លីន ភេទប្រុស អាយុ៦០ឆ្នាំដូចគ្នា ត្រូវភ្លៅខាងឆ្វេង រស់នៅភូមិខ្ពបតាងួន ឃុំខ្ពបតាងួន មានចម្ងាយពីវត្តប្រហែលជិត១គីឡូម៉ែត្រ។ លោកនាយប៉ុស្តិ៍បន្តថា សត្វប្រើសដែលរត់រួចចេញពីក្នុងទ្រុងនោះត្រូវបានព្រះចៅអធិការវត្តយកមកចិញ្ចឹមតាំងពីនៅតូចម៉្លេះ រហូតមកដល់ពេលនេះ៤ទៅ៥ឆ្នាំហើយ។ ដោយឡែកនៅព្រឹកថ្ងៃទី៨ ឧសភា ដោយសារតែប្រើសឡើងកវារមាស់ស្បែក និងស្នែងក៏បានវ័ធទ្រុងសំណាញ់រហូតដល់ធ្លាយរួចបោលចេញមកខាងក្រៅវត្ត រំពេចនោះព្រះសង្ឃ និងពុទ្ធបរិស័ទក៏នាំគ្នារត់ដេញតាមពីក្រោយកៀងឲ្យចូលទ្រុងវិញ តែវាមិនព្រមចូលសោះបែរជារត់ចេញទៅកាន់តែឆ្ងាយទៅៗ។
លោកនាយប៉ុស្តិ៍រៀបរាប់ទៀតថា លុះពេលបោលមកដល់ភូមិខ្ពបតាងួន សត្វប្រើសនេះបានដេញជល់ក្មេងៗដែលកំពុងដើរតាមផ្លូវ ។ បន្ទាប់មកបុរសចំណាស់ម្នាក់ឈ្មោះស៊ន បានកាន់ដំបងឈើដេញកំញើញឲ្យប្រើសចេញ តែមិនចេញបែរជាដេញវ័ធបុរសរូបនេះត្រូវឆ្អឹងជំនីរខាងស្តាំរយះហូរឈាមស្រោចពេញខ្លួនប្រាណ ហើយព្យាយាមរត់មកឡើងជណ្តើរផ្ទះក៏ត្រូវប្រើសកំណាចនោះដេញវ័ធត្រូវពោះថែមទៀតបណ្តាលឱ្យស្លាប់។ ពេលនោះប្រជាពលរដ្ឋនៅក្នុងភូមិជាច្រើននាក់បានយកកំណាត់ឈើ និងដំបងវែងៗដេញប្រើសនោះ ឯបុរសចំណាស់ឈ្មោះលីន បានយកដងចបទៅរុញដេញក៏ត្រូវប្រើសវ័ធត្រូវភ្លៅខាងឆ្វេងរងរបួសហូរឈាមផងដែរ ហើយបច្ចុប្បន្នកំពុងសម្រាកព្យាបាលនៅផ្ទះ។
លោកខេង សុខណា បានបញ្ជាក់ថា ប្រើសឈ្មោល១ក្បាលនេះ មិនព្រមបោលទៅណាទៀតទេ ដែលធ្វើឲ្យប្រជាពលរដ្ឋខ្លាចរអាគ្រប់ៗគ្នា ដោយវានៅតែក្រវែលត្រង់ឈាមដែលវ័ធត្រូវមនុស្សស្លាប់។ ក្នុងស្ថានភាពបែបនេះ រូបលោក (សុខណា) ក៏បានទូរស័ព្ទសុំគោលការណ៍ពីលោកអធិការនគរបាលស្រុកស្ទឹងត្រង់ និងលោកគ្រូព្រះចៅអធិការវត្តសន្ធររង្សី ហើយត្រូវបានអនុញ្ញាតឲ្យបាញ់ប្រើសនោះសម្លាប់ចោលតែម្តង ដើម្បីជៀសវាងកុំឲ្យគ្រោះថ្នាក់ដល់ប្រជាពលរដ្ឋផ្សេងទៀត។ ខណៈទទួលបានភ្លើងខៀវនេះហើយ រូបលោកនិងមន្ត្រីប៉ុស្តិ៍ក៏បានបាញ់ប្រើសនោះត្រូវចំក្បាល១គ្រាប់ជាហេតុបណ្តាលឲ្យដួលប្រកាច់ងាប់១រំពេច៕
ចែករំលែកព័តមាននេះ