ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា កាលពីថ្ងៃទី៨ ឧសភា កន្លងមក បានជំរុញឱ្យរដ្ឋាភិបាលប៉ាគីស្ថានបើកការស៊ើបអង្កេតលើបញ្ហាដែលថា តើជំនួយប្រភេទណាខ្លះ ដែលមេដឹកនាំភេរវកម្មអាល់កៃដាអូសាម៉ា ប៊ីនឡាដេន ប្រហែលជាទទួលបានក្នុងប្រទេសរបស់ខ្លួន ។ លោកអូបាម៉ា បានទទូចដូច្នេះក្នុងអំឡុងពេលនៃបទសម្ភាសន៍មួយនៅពេលលោកអញ្ជើញចូលរួមក្នុងកម្មវិធីជជែកកម្សាន្តតាមទូរទស្សន៍ CBS ។ លោកប្រធានាធិបតីថ្លែងទៀតថា យើងគិតថា មានបណ្តាញផ្តល់ការគាំទ្រសម្រាប់ប៊ីនឡាដេន ប៉ុន្តែយើងមិនដឹងថា បណ្តាញផ្តល់ជំនួយនោះនៅក្នុងរដ្ឋាភិបាលប៉ាគី ស្ថាន ឬក៏អត់នោះទេ ។
បទសម្ភាសន៍នេះធ្វើឡើងរយៈពេលមួយសប្តាហ៍ក្រោយពីកងកុំម៉ង់ដូពិសេសរបស់អាេមរិកបាញ់សម្លាប់ប៊ីនឡាដេន ក្នុងប្រតិបត្តិការប្រឆាំងនិវេសនដ្ឋាននៅតំបន់ក្បែរទីក្រុងអ៊ីស្លាម៉ាបាដ រដ្ឋធានីប៉ាគីស្ថាន ។
កន្លែងលាក់ខ្លួនរបស់ប៊ីនឡាដេន នោះធ្វើឱ្យគេសង្ស័យថា អាជ្ញាធរប៉ាគីស្ថាន ប្រហែលជាដឹងអំពីកន្លែងលាក់ខ្លួនរបស់ប៊ីនឡាដេន ប៉ុន្តែធ្វើជាមិនដឹង ។ ទោះបីជាបែបណា ការស្លាប់របស់ប៊ីនឡាដេន ធ្វើឱ្យទំនាក់ទំនងរវាងសហរដ្ឋអាមេរិក និងប៉ាគីស្ថាន មានភាពជូរចត់យ៉ាងខ្លាំង។
មន្ត្រីជាន់ខ្ពស់អាមេរិកអះអាងថា ប៉ាគីស្ថាននៅតែជាសម្ព័ន្ធមិត្តដ៏សំខាន់របស់អាេមរិក ក្នុងការប្រយុទ្ធប្រឆាំងភេរវកម្ម ប៉ុន្តែទាមទារឱ្យប៉ាគីស្ថានឆ្លើយសំណួរថាតើហេតុអ្វីបានជាប៊ីនឡាដេន អាចរស់នៅក្នុងទឹកដីប៉ាគីស្ថានដល់ទៅជាង៥ឆ្នាំ៕
ចែករំលែកព័តមាននេះ