ខេត្តបាត់ដំបង ៖ រឿង «ជ-ន-អ-គ-តិ-លួចដកបំផ្លាញទង់ជាតិ ដាក់លំអតាមដងផ្លូវជាតិលេខ៥៧ នៅក្នុងទឹកដីឃុំស្នឹង ស្រុកបាណន់»ជិតកន្លះឆ្នាំកន្លងមកហើយ អាជ្ញាធរនិងសមត្ថកិច្ចហាក់ពុំមានសមត្ថភាពស៊ើបអង្កេតវែករកមុខជនអគតិដែលលួចបំផ្លាញសម្បត្តិសាធារណៈទាំងនេះឡើយ ។ រហូតមកដល់ពេលនេះ…
ខេត្តបាត់ដំបង ៖ រឿង «ជ-ន-អ-គ-តិ-លួចដកបំផ្លាញទង់ជាតិ ដាក់លំអតាមដងផ្លូវជាតិលេខ៥៧ នៅក្នុងទឹកដីឃុំស្នឹង ស្រុកបាណន់»ជិតកន្លះឆ្នាំកន្លងមកហើយ អាជ្ញាធរនិងសមត្ថកិច្ចហាក់ពុំមានសមត្ថភាពស៊ើបអង្កេតវែករកមុខជនអគតិដែលលួចបំផ្លាញសម្បត្តិសាធារណៈទាំងនេះឡើយ ។
រហូតមកដល់ពេលនេះ មិនត្រឹមតែលួចដកបំផ្លាញទង់ជាតិប៉ុណ្ណោះទេ ជនអគតិថែមទាំងលួចដកយកទង់គណបក្សដែលបំពាក់ជាមួយគ្នាតាមបង្គោលភ្លើងអមសងខាងផ្លូវអស់ជាច្រើនទង់ទៀត តែអាជ្ញាធរនិងសមត្ថកិច្ចនៅតែមិនខ្វាយខ្វល់ដដែល បើទោះជាប្រជាពលរដ្ឋបានរាយការណ៍ជាបន្តបន្ទាប់ក្ដី ។
យោងលើហេតុការណ៍ដែលបានកើតឡើងដដែលៗនេះ ប្រជាពលរដ្ឋក្នុងមូលដ្ឋានហាក់បង្ហាញពីការខ្វាយខ្វល់ចំពោះរឿង «បាត់ដងទង់ជាតិ» ដែលជាសម្បត្តិសាធារណៈនៅតាមដងផ្លូវនេះ តែបែរជាអាជ្ញាធរ និងសមត្ថកិច្ចមិនអើពើធ្វើព្រងើយកន្ដើយក្នុងរឿងនេះទៅវិញ បើទោះជាពលរដ្ឋបានផ្ដល់ព័ត៌មាននេះយ៉ាងណាក្ដី ។
នេះជារឿងដដែលៗដែលបានកើតឡើងនៅក្នុងទឹកដីអាណាចក្រឃុំស្នឹង ស្រុកបាណន់ ដែលសមត្ថកិច្ចហាក់ពុំមានសមត្ថភាពក្នុងការទប់ស្គាត់ ឬស៊ើបអង្កេត ស្រាវជ្រាវស្វែងរកមុខសញ្ញាជនសង្ស័យ ។ បើតាមប្រភពព័ត៌មានបានឲ្យដឹងថា ទង់ជាតិ និងទង់គណបក្សប្រជាជនកម្ពុជា ដែលគេបំពាក់រួមគ្នាភ្ជាប់នឹងបង្គោលភ្លើងសូឡាអមសងខាងផ្លូវជាតិលេខ៥៧ ក្នុងទឹកដីឃុំស្នឹង ត្រូវបានជនមិនស្កាល់មុខលួចដកយកអស់ជាច្រើនទង់ ។
ជាពិសេស នៅក្នុងភូមិសំរោង តែពុំឃើញអាជ្ញាធរ ឬកម្លាំងសមត្ថកិច្ចចុះសួរនាំឡើយ ។ ប្រភពបានបញ្ជាក់ថា នេះមិនមែនជាលើកដំបូងទេដែលជនអគតិបានលួចបំផ្លាញទង់ជាតិនៅតាមដងផ្លូវ ។ គេសង្កេតឃើញនៅតាមដងផ្លូវជាតិលេខ៥៧ ដែលឆ្លងកាត់ទឹកដីឃុំស្នឹង អាជ្ញាធរបានបំពាក់បង្គោលភ្លើងសូឡាបំភ្លឺអមសងខាងផ្លូវរាប់រយបង្គោល ហើយថែមទាំងបានចងទង់ជាតិភ្ជាប់លើបង្គោលលំអទៀតផង ។
ប៉ុន្តែក្រោយមក ស្រាប់តែមានជនអគតិលួចដកយកទង់ជាតិនោះអស់ជាច្រើនទង់ជាបន្តបន្ទាប់ ដោយគ្មាននរណាបានដឹងពីគោលបំណងនៃជនអគតិដែលព្យាយាមបំផ្លាញទ្រព្យសម្បត្តិសាធារណៈទាំងនោះឡើយ ។
កាលណោះ ប្រជាពលរដ្ឋបានរាយការណ៍ប្រាប់អាជ្ញាធរមូលដ្ឋានដែរ តែហាក់គ្មានមន្ត្រីណាម្នាក់ខ្វាយខ្វល់ចុះសួរនាំឡើយ ។ អ្នកភូមិដែលបានប្រទះឃើញសកម្មភាពនេះបាននិយាយថា កាលជនមិនស្គាល់មុខលួចដកយកទង់ជាតិដំបូង គឺគេតែងឃើញធ្វើឡើងនៅពេលយប់ ។ ក្រុមជនទុច្ចរិតជិះរថយន្តម៉ាកហ្វតពណ៌.សបានបើកទៅឈប់ក្បែរតាមបង្គោលភ្លើង រួចចុចកញ្ចក់ចុះអើតដកយកទង់ជាតិចេញពីបង្គោលភ្លើងអស់ជាច្រើនទង់នៅក្នុងទឹកដីភូមិសំរោង ។ អ្នកភូមិបានបញ្ជាក់ថា កាលនោះ គេបានរាយការណ៍ប្រាប់អាជ្ញាធរភ្លាមៗដែរ តែគេមិនដែលឃើញមានអាជ្ញាធរ ឬសមត្ថកិច្ចចុះមកសួរនាំឡើយ ។
រហូតមកដល់ពេលនេះ ជនមិនស្គាល់មុខបានលួចដកយកទាំងទង់ជាតិ ទាំងទង់គណបក្សនយោបាយទៀត ដែលបានបំពាក់លើបង្គោលភ្លើងជាមួយគ្នា នៅតែគ្មានអ្នកអើពើដដែល ។ បើតាមសាក្សីដដែលបានបញ្ជាក់ថា ទង់ជាតិនិងទង់គណបក្សប្រជាជនដែលគេទើបនឹងបំពាក់ជាមួយគ្នា នៅលើបង្គោលភ្លើងសូឡាតាមដងផ្លូវនោះ ទើបបានប្រហែល០១ថ្ងៃប៉ុណ្ណោះ (មុនហែបក្ស) ក៏ត្រូវជនមិនស្គាល់មុខលួចដកបំផ្លាញចោលជាបន្តបន្ទាប់ ។ ហើយរហូតមកដល់ថ្ងៃទី០៣ កក្កដា នេះ ទៅហើយនៅតែពុំមានមន្ត្រីណាម្នាក់អើពើទៀត ។
អភិបាលស្រុកបាណន់ លោក ស្រេង សុខា បានប្រាប់កោះសន្តិភាព តាមទូរស័ព្ទនៅព្រឹកថ្ងៃទី ០៣
កក្កដា យ៉ាងខ្លីដូច្នេះថា «ខ្ញុំមិនបានដឹងរឿងនេះទេ ព្រោះពុំមានអ្នករាយការណ៍ តែចាំមើលខ្ញុំសួរនាំសិន» ។
កន្លងមក អាជ្ញាធរនិងសមត្ថកិច្ចមូលដ្ឋានតែងចាត់ទុកបទល្មើសបែបនេះថា «ជារឿងកំប៉ិកកំប៉ុក» ទើបគេមិនសូវខ្វាយខ្វល់ មិនយកចិត្តទុកដាក់ មិនចុះសួរនាំទេ តែបើមានថ្នាក់លើសួរដេញដោល ទើបម្នាក់ៗធ្វើភ្នែកសក្បុះចុះសួរនាំរំខានដល់ពលរដ្ឋ ។
សូម្បីតែជនអគតិលួចទង់ជាតិតាមដងផ្លូវម្ដងហើយ ម្ដងទៀត ក៏នៅតែពុំមានមន្ត្រីម្នាក់ណាអើពើដែរ ឥឡូវជនអគតិថែមទាំងលួចដកយកទង់គណបក្សអស់ជាច្រើនកន្លែងទៀត នៅសល់តែបង្គោលភ្លើងទៅហើយ នៅតែមិនទាន់រំខានដល់អាជ្ញាធរ ឬសមត្ថកិច្ចឡើយ ព្រោះគេគិតថា វាជា«បទល្មើសកំប៉ិកកំប៉ុក» ។
ចែករំលែកព័តមាននេះ