ខេត្តស្វាយរៀង ៖ ដើមពោធិ៍មួយដើមត្រូវបានមនុស្សអគតិនាំគ្នាគាស់យកទៅលក់ឱ្យយួន ធ្វើឱ្យប្រជាពលរដ្ឋជាពុទ្ធសាសនិកដែលចាត់ទុករុក្ខជាតិនេះថា ជាកន្លែងសក្ការៈមានការព្រួយបារម្ភយ៉ាងខ្លាំងព្រោះភ័យខ្លាចអស់ដើមពោធិ៍ពីទួលបុរាណដែលប្រជាពលរដ្ឋធ្លាប់ទៅធ្វើបុណ្យ ហើយសុំឱ្យអាជ្ញាធរមានសមត្ថកិច្ចជួយទប់ស្កាត់ ជាពិសេសក្រសួងធម្មការ និងសាសនា គួរតែមានវិធានការចាប់ជនប្រព្រឹត្តល្មើសយកទៅផ្តន្ទាទោស ។
កាលពីថ្ងៃទី៤ ឧសភា វេលាម៉ោង៧ព្រឹកនៅភូមិធ្មល់ សង្កាត់ចេក ក្រុងស្វាយរៀង ប្រជាពលរដ្ឋឈ្មោះហេង យ៉ែម អាយុ៦៣ឆ្នាំ បានប្រាប់កោះសន្តិភាពថា ដើមពោធិ៍មួយដើមមានអាយុកាលជិត៤០ឆ្នាំមកហើយ ដែលមានទំហំមុខកាត់ប្រមាណ១,២០ម៉ែត្រ កម្ពស់១៥ម៉ែត្រ មានមែក សាខាដុះនៅលើទួលភូមិចាស់ពីបុរាណ ជាទីកន្លែងប្រជាពលរដ្ឋក្នុងភូមិទុកជាទីសក្ការបូជា បានត្រូវគេជីកគាស់ ។ ប្រជាពលរដ្ឋមានជំនឿថា ដើមពោធិ៍មួយដើមនេះមានទេវតាថែរក្សាមានអ្នកតាម្ចាស់ស្រុកនៅក្រោមដើមពេលមានមនុស្សឈឺតែងតែទៅបន់ស្រន់ដោយយកតង្វាយមានចេក ស្រា មាន់ស្ងោរ ក្បាលជ្រូក ទៀនធូបទៅថ្វាយនៅក្រោមដើមពោធិ៍ ដើម្បីសុំសេចក្តីសុខ និងសុំឱ្យជាសះស្បើយ ។ លុះពេលធ្វើការបន់ស្រន់ហើយតែងជាសះស្បើយ ពេលធ្វើបុណ្យឡើងអ្នកតាសុំទឹកភ្លៀងតែងមានទឹកភ្លៀងធ្លាក់គ្រប់គ្រាន់ផលស្រូវមានទិន្នផលខ្ពស់ ស្រុកភូមិសម្បូរសប្បាយ ។
គាត់បន្តថា ម្យ៉ាងទៀតដើមពោធិ៍គឺជារុក្ខជាតិសក្ការបូជាតំណាងឱ្យព្រះពុទ្ធបរមគ្រូ គង់ផ្សព្វផ្សាយព្រះធម៌ដល់ពុទ្ធបរិស័ទដែលមិនគួរមនុស្សអគតិ មកគាស់បំផ្លាញយកទៅលក់ឱ្យបរទេសដូច្នេះទេ ។
ទាក់ទិននឹងករណីខាងលើ លោកចៅសង្កាត់ចេកបានឱ្យដឹងថា ក្រុមជនល្មើសបានធ្វើសកម្មភាពតាំងពីថ្ងៃទី៣ ឧសភា ឆ្នាំ២០១១ វេលាម៉ោង៧ព្រឹក រហូតដល់ម៉ោង១រសៀល ដោយជួលកម្មករជីកក្រឡឹងគស់ រួចយកត្រង់សឺន័រអារកាត់ផ្តាច់ឫស ហើយទាល់តែមកដល់ថ្ងៃទី៤ ឧសភា ទើបប្រជាពលរដ្ឋដឹងប្តឹងមកលោកមេភូមិនិងប្តឹងរូបលោកជាចៅសង្កាត់ ។ ក្រោយពីទទួលបានពាក្យបណ្តឹងលោកក៏បានដឹកនាំកម្លាំងទៅបញ្ឈប់សកម្មភាពនោះជាបន្ទាន់ ដោយក្រុមជនល្មើសជួលអេស្កាវ៉ាទ័រស្ទូចដើមពោធិ៍ដាក់លើរថយន្តកាម៉ាស់ដើម្បីដឹកយកទៅលក់នៅប្រទេសវៀតណាម តែត្រូវសមត្ថកិច្ចភូមិឃុំទប់ស្កាត់មិនឱ្យស្ទូច ។ ពេលនោះក្រុមឈ្មួញក៏បានបញ្ឈប់សកម្មភាព តែគួរឱ្យស្តាយយ៉ាងខ្លាំង ព្រោះដើមពោធិ៍ដាច់ឫសអស់ទៅហើយ ទោះបី ជាយ៉ាងណាលោកបានឱ្យឈ្មួញកាយដីលប់កប់ដើមពោធិ៍នេះវិញ ហើយក៏រាយការណ៍ជូនទៅអាជ្ញាធរក្រុង-ខេត្តរួចហើយដែរ ។ លោកចៅសង្កាត់បានបញ្ជាក់ថា ដើមពោធិ៍នេះដុះលើដីកម្មសិទ្ធិរបស់ឈ្មោះម៉ូញ ជាអ្នកថែរក្សា ទើបគេលក់ឱ្យឈ្មួញក្នុងតម្លៃប្រមាណជាង៣.០០០ដុល្លារ ហើយបើដឹកចូលដល់ប្រទេសវៀតណាម បានតម្លៃ៥.២០០ដុល្លារ។ ដោយសារតែឈ្មួញហ៊ានឱ្យតម្លៃថ្លៃនេះហើយទើបប្រជាពលរដ្ឋខ្លះលួចគាស់លក់បែបនេះ ។
ចំណែកក្រុមប្រជាពលរដ្ឋវិញបានសម្តែងនូវការខកចិត្តយ៉ាងខ្លាំង ចំពោះចំណាត់ការរបស់លោកចៅសង្កាត់ចេក ដែលមិនព្រមចាប់ក្រុមជនល្មើសយកទៅផ្តន្ទាទោសតាមច្បាប់ ជាពិសេសក្រុមឈ្មួញមួយក្រុមនេះ ពួកគេតែងតែដើរទិញដើមពោធិ៍ ដើមជ្រៃ ដើមរាំងភ្នំ តាមទីទួលបុរាណ តាមវត្តអារាមជាហូរហែ។ ពួកគាត់លើកឡើងថា ល្មមចាត់វិធានការបង្ក្រាបក្រុមឈ្មួញទាំងនេះហើយមិនគួរដោះលែងទេ ហើយបើមិនទប់ស្កាត់ទេ ដើមឈើដ៏កម្រអស់នេះនឹងផុតពូជជាមិនខានឡើយ៕
ចែករំលែកព័តមាននេះ