ខេត្តបាត់ដំបង ៖ ក្រុមចោរហារយដែលគេប៉ាន់ស្មានជាបឋមថា មានគ្នាច្រើននាក់ មានប្រុស មានស្រី ជិះម៉ូតូប្រមាណពី០៣ ទៅ០៤គ្រឿងបានប្រើល្បិចចូលទៅ «ប្លន់» នៅកន្លែងវេរលុយ«ទ្រូម៉ានី»…
ខេត្តបាត់ដំបង ៖ ក្រុមចោរហារយដែលគេប៉ាន់ស្មានជាបឋមថា មានគ្នាច្រើននាក់ មានប្រុស មានស្រី ជិះម៉ូតូប្រមាណពី០៣ ទៅ០៤គ្រឿងបានប្រើល្បិចចូលទៅ «ប្លន់» នៅកន្លែងវេរលុយ«ទ្រូម៉ានី» យកលុយអស់ប្រហែល៣,០០០ដុល្លារ រួចនាំគ្នាជិះម៉ូតូគេចខ្លួនដោយសុវត្ថិភាព កាលពីវេលាម៉ោង៧និង៣០នាទីព្រឹកថ្ងៃទី ៣០ មិថុនា ដែលមានទីតាំងនៅក្បែរស្ដុបបាណន់ ស្ថិតក្នុងភូមិវត្តគរ សង្កាត់វត្តគរ ក្រុងបាត់ដំបង ។
ប្រភពព័ត៌មានបានឲ្យដឹងថា ម្ចាស់ទីតាំងវេរលុយ «ទ្រូម៉ានី» និងជាជនរងគ្រោះផង ឈ្មោះ ផុន ម៉ាលីណែត ភេទស្រី អាយុ៣០ឆ្នាំ រស់នៅចំណុចកើតហេតុ ។ ព័ត៌មានបឋមដែលគេទទួលបានពីជនរងគ្រោះបានឲ្យដឹងថា បើតាមការពិនិត្យនៅក្នុងហេតុការណ៍ក្រុមចោរអាចមានគ្នាច្រើននាក់ មានស្រី មានប្រុស ហើយជិះម៉ូតូពី០៣ ទៅ០៤គ្រឿង ដែលមួយចំនួនបានចូលធ្វើសកម្មភាព ខណៈមួយចំនួនទៀតរង់ចាំនៅខាងក្រៅ ។
ប្រភពបានស្រង់សំដីជនរងគ្រោះទៀតថា ដំបូងមានស្ត្រីម្នាក់ចូលទៅសួររកទិញផលិតផល ហើយពេលនោះ ក៏មានមនុស្សម្នាក់ចូលសុំដូរលុយដែរ ។ ស្ត្រីម្នាក់នោះឲ្យគាត់យកផលិតផលចេញមកក្រៅ ស្របពេលនោះស្រាប់តែមានគ្នាវាបន្លំខ្លួនចូលទៅខាងក្នុងបន្ទប់ «ទ្រូម៉ានី» រើកកាយប្លន់យកកាបូបលុយ រួចនាំគ្នាឡើងជិះម៉ូតូយ៉ាងប្រសេកប្រសាចគេចខ្លួនបាត់អស់ ។ ប៉ុន្តែជនរងគ្រោះបានបញ្ជាក់ដែរថា ពេលក្រុមចោរប្លន់យកបានកាបូបលុយ គាត់បានដេញតាមប្រទាញប្រទង់ដណ្ដើមយកកាបូបមកវិញដែរ តែដណ្ដើមមិនបាន ។
គាត់បានបន្ថែមថា ពេលនោះ មានការភ្ញាក់ផ្អើលយ៉ាងខ្លាំង ជនម្នាក់ដែលកាន់កាបូប បានឡើងជិះម៉ូតូដែលបក្សពួករង់ចាំក្បែរនោះ ហើយបានដកលុយខ្មែរមួយដុំពីក្នុងកាបូបបាចចោលពេញថ្នល់ តែនៅមានប្រាក់ដុល្លារមួយបាច់ទៀត នៅក្នុងកាបូបប្រហែលជិត៣,០០០ដុល្លារ ។ ក្រុមចោរបានជិះម៉ូតូដង្ហែរគ្នា ឆ្ពោះទៅទិសខាងត្បូង (ផ្លូវទៅស្រុកបាណន់) តែបានបន្សល់ទុកសកម្មភាពនៅក្នុងកាមេរ៉ាសុវត្ថិភាព ។
សាក្សីម្នាក់បាននិយាយថា មុនពេលក្រុមចោរធ្វើសកម្មភាពប្លន់នៅកន្លែងទ្រូម៉ានី គេឃើញមនុស្សប្រុសម្នាក់បានកាន់លុយបាត ទៅដូរនៅផ្ទះលក់ចាប់ហួយក្បែរនោះ តែគេមិនបានដូរឲ្យទេ។ លុះក្រោយមក ទើបជនម្នាក់នោះទៅដូរនៅផ្ទះ ទ្រូម៉ានី ក៏ស្រាប់តែមានអំពើ«ប្លន់» កើតឡើងតែម្ដង។ បើតាមពិនិត្យលើភិនភាគជនសង្ស័យនោះ គឺធ្លាប់ទៅដូរលុយនៅទីនោះច្រើនលើកហើយ តែគេមិនដឹងពីសមាសភាព ។
សាក្សីដទៃទៀតដែលស្ថិតក្នុងហេតុការណ៍នេះដែរ បាននិយាយថា ដំបូងគេឃើញមានមនុស្សប៉ុន្មាននាក់ បានចូលទៅកន្លែងទ្រូម៉ានី តែគេពុំចាប់អារម្មណ៍ថា ជានរណាទេ។ ប៉ុន្តែពេលនោះគេ
ក៏ឃើញជនចម្លែកឈប់ម៉ូតូនៅម្ខាងថ្នល់ ដែលខ្លះឈប់នៅក្បែរកន្លែងទ្រូម៉ានី ។ លុះបន្តិចក្រោយមក ស្រាប់តែគេឃើញម្ចាស់ផ្ទះស្រែករត់តាមប្រទាញប្រទង់ជាមួយជនម្នាក់រត់ឡើងម៉ូតូជិះចេញទៅ ។ ពេលនោះ គេឃើញមានអ្នកបើករថយន្តរកដេញបុកជនសង្ស័យដែរ តែត្រូវអ្នកជិះម៉ូតូផ្សេងទៀតដែលគេសង្ស័យជាបក្សពួកចោរ បានជិះរារាំងរថយន្តនោះ ហើយពួកគេជិះដង្ហែរគ្នា គេចទៅទិសខាងត្បូង យ៉ាងប្រសេកប្រសាចពេញថ្នល់ ។
នៅក្នុងកាមេរ៉ាសុវត្ថិភាព ជាក់ស្ដែង គេឃើញមនុស្សប្រុសស្រីពីរនាក់ អង្គុយរង់ចាំលើម៉ូតូខាងមុខផ្ទះ ដែលគេសង្ស័យជាបក្សពួកចោរ ។ ពេលនោះ គេឃើញបុរសម្នាក់ពាក់ក្រហម ពាក់មួកសុវត្ថិភាពដើរយ៉ាងលឿនហួសទៅ ទើបអ្នកជិះម៉ូតូជិះចេញតាមក្រោយ ។ សាក្សីនិយាយទៀតថា អ្នកជិះម៉ូតូពីរនាក់ប្រុស ស្រី និងមនុស្សប្រុសម្នាក់ពាក់អាវក្រហមដើរនោះ គឺជាបក្យពួកតែមួយ ហើយនៅមានបក្សពួកមួយចំនួនទៀត ដែលឈប់ម៉ូតូនៅក្បែរនោះរង់ចាំគ្នា ។ នេះបើតាមគេសង្កេតឃើញនៅក្នុងពេលកើតហេតុ។
ដោយឡែក បើនិយាយពីសកម្មភាពប្រព្រឹត្តបទល្មើសរបស់ក្រុមចោរហារយវិញ យោងតាមការបំភ្លឺបឋមពីជនរងគ្រោះ និងសាក្សីនានា ជុំវិញកន្លែងកើតហេតុ គេបានធ្វើការសន្និដ្ឋានជំហានដំបូងថា វាជាអំពើ «ប្លន់» ដែលក្រុមជនសង្ស័យមានគ្នាច្រើន និងចូលទៅអុកឡុកជនរងគ្រោះ តាមរយៈការដូរលុយ និងរកទិញផលិតផល នៅពេលម្ចាស់ធ្វេសប្រហែល ក៏បន្លំខ្លួនចូលទៅប្លន់យកកាបូបលុយតែម្ដង។
យ៉ាងណាក្ដី បើតាមសមត្ថិកិច្ចបានប្រាប់ថា ពេលនេះជនរងគ្រោះបានទៅដាក់បណ្ដឹងនៅកន្លែងសមត្ថកិច្ចហើយ។ ប៉ុន្តែការស៊ើបអង្កេតរកមុខសញ្ញាក្រុមជនសង្ស័យ ហាក់ពុំទាន់មានតម្រុយនៅឡើយទេ ៕
ចែករំលែកព័តមាននេះ